News Continuous Bureau | Mumbai
Javed Jaffrey Wife Cheated Mumbai। મુંબઈમાં બોલિવૂડના જાણીતા અભિનેતા અને કોમેડિયન જાવેદ જાફરીના પત્ની હબીબા જાફરી સાથે ૧૬.૨૪ કરોડથી વધુની છેતરપિંડી આચરવામાં આવી હોવાનો સનસનાટીભર્યો મામલો સામે આવ્યો છે. મુંબઈ ક્રાઈમ બ્રાન્ચના પ્રોપર્ટી સેલે આ હાઈપ્રોફાઈલ કેસમાં કડક કાર્યવાહી કરીને એક મુખ્ય ઉદ્યોગપતિની ધરપકડ કરી લીધી છે. આ આખા કૌભાંડમાં બૃહન્મુંબઈ મહાનગરપાલિકા (BMC) ના એક વોર્ડના આસિસ્ટન્ટ કમિશનર સહિત કુલ છ લોકો વિરૂદ્ધ બાંદ્રાના ખાર પોલીસ સ્ટેશનમાં સત્તાવાર ગુનો દાખલ કરવામાં આવ્યો છે.
પાલિકાની નકલી નોટિસથી થઈ શરૂઆત
પોલીસની પ્રાથમિક તપાસ અનુસાર, આ હાઈ-પ્રોફાઈલ કૌભાંડની શરૂઆત ત્યારે થઇ હતી, જ્યારે હબીબા જાફરીને અંધેરી સ્થિત તેમના બંગલાના પ્રોપર્ટી ટેક્સ અંગે મુંબઈ મહાનગરપાલિકાની એક નકલી નોટિસ મળી હતી. આ નોટિસ આવ્યા બાદ એક પરિચિત વ્યક્તિના માધ્યમથી જાફરી પરિવારની મુલાકાત પાલિકાના એક આસિસ્ટન્ટ કમિશનર સાથે કરાવવામાં આવી હતી. તે પાલિકા અધિકારીએ ટેક્સનું સેટલમેન્ટ કરાવી આપવાનો ખોટો ભરોસો આપ્યો હતો અને ત્યારબાદ જાફરી પરિવારને બાંદ્રા (વેસ્ટ) વિસ્તારના એક મોટા કોમર્શિયલ પ્રોજેક્ટમાં રોકાણ કરવાની લલચામણી સલાહ આપી હતી.
બંગલા અને ફ્લેટ વેચીને કરોડો રૂપિયા ટ્રાન્સફર કર્યા
આ કેસના અન્ય એક મુખ્ય આરોપીએ પોતાની ઓળખ મોટા બિલ્ડરો સાથે હોવાની આપીને દાવો કર્યો હતો કે આ પ્રોજેક્ટમાં અગાઉથી ૧૫૦ કરોડનું મોટું રોકાણ થઈ ચૂક્યું છે. આરોપીઓએ જાફરી પરિવારના બંગલે આવીને નકશાઓ અને પ્રોજેક્ટના આકર્ષક વીડિયો બતાવીને તેમનો વિશ્વાસ જીતી લીધો હતો. ઠગોની આ માયાજાળમાં ફસાઈને જાવેદ જાફરી, હબીબા જાફરી અને તેમના પરિવારે પોતાના ફ્લેટ અને બંગલા વેચીને કરોડો રૂપિયા આરોપીઓની શંકાસ્પદ કંપનીઓના બેંક ખાતામાં ટ્રાન્સફર કર્યા હતા. આ મોટી રકમમાં રોકડા, વિદેશી ચલણ અને મોંઘી લક્ઝરી ઘડિયાળોનો પણ સમાવેશ થાય છે.
ઘરે બેઠા બાયોમેટ્રિક લઈને નકલી રજિસ્ટ્રેશન કર્યું
આ આયોજનબદ્ધ કૌભાંડનો સૌથી ચોંકાવનારો ભાગ એ હતો કે ટોળકીના કેટલાક આરોપીઓ સરકારી મશીન જેવા દેખાતા હાઈટેક ડિવાઈસ લઈને જાફરી પરિવારના ઘરે પહોંચ્યા હતા. ત્યાં તેમણે હબીબા જાફરીના ફોટો, ફિંગરપ્રિન્ટ (અંગૂઠાનું નિશાન) અને સહીઓ લઈને સરકારી રજિસ્ટ્રીની પ્રક્રિયા પૂરી થઈ હોવાનો દાવો કર્યો હતો અને નકલી દસ્તાવેજો પધરાવી દીધા હતા. જ્યારે જાફરી પરિવારે અસલી દસ્તાવેજો માંગ્યા ત્યારે બિલ્ડર પાસે હોવાનું કહીને દર વખતે બહાના કાઢવામાં આવતા હતા.
બોલિવૂડના અન્ય કલાકારો પણ નિશાના પર હોવાની આશંકા
આખરે છેતરપિંડીનો અહેસાસ થતાં જાફરી પરિવારે પોલીસનો સંપર્ક કર્યો હતો. પૂછપરછ દરમિયાન ઝડપાયેલા મુખ્ય આરોપીએ નકલી સરકારી દસ્તાવેજો બનાવ્યા હોવાની કબૂલાત કરી લીધી છે અને કોર્ટે તેને ૧૯ મે સુધી પોલીસ કસ્ટડીમાં મોકલી આપ્યો છે. મુંબઈ ક્રાઈમ બ્રાન્ચને આશંકા છે કે આ શાતિર ટોળકીએ આ જ મોડસ ઓપરેન્ડીથી બોલિવૂડના અન્ય કલાકારો અને પ્રભાવશાળી લોકોને પણ અગાઉ ચૂનો લગાવ્યો હોઈ શકે છે. મુંબઈમાં અગાઉ MTNL કેબલ ચોરી અને મેડિકલ ઈન્સ્યોરન્સ કૌભાંડો સામે આવ્યા બાદ હવે સેલિબ્રિટી સાથેની આ કરોડોની ઠગાઈએ ખળભળાટ મચાવ્યો છે. હાલમાં ગુનામાં સામેલ પાલિકાના આસિસ્ટન્ટ કમિશનર સહિતના અન્ય ફરાર આરોપીઓને ઝડપી પાડવા માટે પોલીસે ચક્રો ગતિમાન કર્યા છે.
👉 આ સમાચાર વાચો:
Mumbai MTNL Cable Theft Case। મુંબઈમાં ૭ લાખના MTNL કેબલની ચોરીનો પર્દાફાશ પત્રકારની સતર્કતાથી ભાંડો ફૂટ્યો, BMC કોન્ટ્રાક્ટરો શંકાના ઘેરામાં
