News Continuous Bureau | Mumbai
Mumbai Bhandup Assault Case। મુંબઈના ભાંડુપ વિસ્તારમાં એક ચોંકાવનારી અને હૃદયકંપાવનારી ઘટના સામે આવી છે. પોતાની માતા સાથે મોબાઈલ પર વારંવાર વાતચીત અને ચેટિંગ કરવાના સંશયમાં એક ૧૭ વર્ષના સગીરે તેના જ ૨૪ વર્ષીય ખાસ મિત્ર પર ધોળા દિવસે કોયતા (દાતરડું) વડે જીવલેણ હુમલો કર્યો છે. આ ભયાનક હુમલામાં યુવક ગંભીર રીતે ઘાયલ થયો છે. કાંજુરમાર્ગ પોલીસે આ મામલે સગીર વિરૂદ્ધ હત્યાના પ્રયાસનો (Attempt to Murder) ગુનો નોંધી તેને કસ્ટડીમાં લીધો છે અને આગળની કાર્યવાહી માટે ડોંગરીના બાળ સુધાર ગૃહમાં મોકલી આપ્યો છે.
૫ વર્ષ જૂની મિત્રતાનો લોહિયાળ અંત
કાંજુરમાર્ગ પોલીસ પાસેથી મળતી વિગતો અનુસાર, ઈજાગ્રસ્ત યુવકની ઉંમર ૨૪ વર્ષ છે, જે ભાંડુપ ગામમાં રહે છે અને એક ખાનગી કંપનીમાં નોકરી કરે છે. હુમલો કરનાર ૧૭ વર્ષીય સગીર અને ભોગ બનનાર યુવક છેલ્લા પાંચ વર્ષથી એકબીજાના પાકા મિત્રો હતા. બંનેનું એકબીજાના ઘરે પણ નિયમિત આવવા-જવાનું હતું. આ દરમિયાન યુવકની ઓળખાણ સગીરના માતા-પિતા સાથે પણ થઈ હતી અને તેની પાસે સગીરની માતાનો મોબાઈલ નંબર હતો. પોલીસ તપાસમાં બહાર આવ્યું છે કે, યુવક અવારનવાર સગીરની માતા સાથે ફોન પર વાત કરતો અને મેસેજ પર ચેટિંગ કરતો હતો. આશરે બે મહિના પહેલાં, સગીરે તેના મિત્રના મોબાઈલમાં પોતાની માતા સાથેના ચેટ મેસેજ પ્રત્યક્ષ જોઈ લીધા હતા, જેનાથી બંને વચ્ચે ભારે વિવાદ થયો હતો.
નાહુર સ્ટેશન જતી વખતે રસ્તામાં આંતરીને કર્યા ઉપરાઉપરી ઘા
ઘટનાના દિવસે યુવક પોતાના કામ અર્થે નાહુર રેલ્વે સ્ટેશન તરફ જઈ રહ્યો હતો. તે ભાંડુપ ગામના ભીમજ્યોત મંડળ નજીક પહોંચ્યો ત્યારે ગુસ્સે ભરાયેલા સગીરે તેને રસ્તામાં આંતર્યો હતો. કશું પણ બોલ્યા વિના તેણે પોતાની પાસે છુપાવી રાખેલા તીક્ષ્ણ કોયતા વડે મિત્ર પર તૂટી પડ્યો હતો. તેણે માથા અને ગળાના ભાગે ઉપરાઉપરી ઘા ઝીંકીને તેને લોહીલુહાણ કરી દીધો હતો. યુવકની ચીસાચીસ સાંભળીને સ્થાનિક રહીશો તેને બચાવવા માટે દોડી આવ્યા હતા. પરંતુ હિંસક બનેલા સગીરે હાથમાં કોયતો લહેરાવીને લોકોને ધમકાવ્યા હતા, જેના લીધે આખા ભરચક વિસ્તારમાં અફરાતફરી અને ભયનો માહોલ સર્જાયો હતો.
ઈજાગ્રસ્ત યુવકની હાલત નાજુક
હુમલા બાદ આરોપી સગીર ઘટનાસ્થળેથી નાસી છૂટ્યો હતો. સ્થાનિક લોકોએ લોહીલુહાણ હાલતમાં ઘાયલ યુવકને નજીકની હોસ્પિટલમાં પહોંચાડ્યો હતો, જ્યાં પ્રાથમિક સારવાર બાદ તેની ગંભીર સ્થિતિને જોતાં વધુ સારવાર માટે સાયન હોસ્પિટલમાં (Sion Hospital) ખસેડવામાં આવ્યો છે, જ્યાં તેની હાલત હજુ પણ નાજુક હોવાનું કહેવાય છે. કાંજુરમાર્ગ પોલીસે હોસ્પિટલ પહોંચીને ભોગ બનનાર યુવકનું નિવેદન નોંધ્યું હતું અને તેના આધારે સગીર વિરૂદ્ધ ગુનાહિત કાવતરું અને હત્યાના પ્રયાસ સહિતની વિવિધ કલમો હેઠળ ગુનો દાખલ કર્યો હતો. પોલીસે નાસી છૂટેલા સગીરને ટૂંક સમયમાં જ શોધી કાઢીને તાબામાં લીધો હતો અને કાનૂની પ્રક્રિયા બાદ ડોંગરી જુવેનાઇલ જસ્ટિસ બોર્ડ (બાળ સુધાર ગૃહ) માં મોકલી આપ્યો છે.
👉 આ સમાચાર વાચો:
Mira Road POCSO Case Arrest। બળાત્કાર અને પોક્સો (POCSO) કેસનો ફરાર આરોપી મિરા રોડ પરથી ઝડપાયો ૨૯ મે સુધી પોલીસ કસ્ટડી
