News Continuous Bureau | Mumbai
TMKOC Rules OTT। ટેલિવિઝન દુનિયાનો સૌથી લોકપ્રિય અને દર્શકોનો ઓલટાઇમ ફેવરિટ કોમેડી શો ‘તારક મહેતા કા ઉલ્ટા ચશ્મા’ આજે પણ લોકોના દિલ પર રાજ કરી રહ્યો છે. આ શોની ફેન ફોલોઇંગ એટલી મજબૂત છે કે બાળકોથી લઈને વૃદ્ધો સુધીના દરેક વર્ગના લોકો તેને જોવાનું પસંદ કરે છે. હવે આ શો માત્ર ટીવી સ્ક્રીન પૂરતો સીમિત નથી રહ્યો, પરંતુ ઓટીટી (OTT) પ્લેટફોર્મ પર પણ આ શોએ પોતાની બાદશાહત કાયમ રાખી છે. તાજેતરમાં જાહેર થયેલા ઓટીટી રેટિંગ્સના આંકડા મુજબ, જેઠાલાલ અને ગોકુલધામ સોસાયટીના કલાકારોએ બોલિવૂડ સુપરસ્ટાર રણવીર સિંહનીમલ્ટીસ્ટારર ફિલ્મ ‘ધુરંધર’ ને પણ વ્યુઝની રેસમાં ઘણી પાછળ છોડી દીધી છે.
આઈપીએલ બાદ ‘તારક મહેતા..’ દેશમાં સૌથી વધુ જોવાયેલો શો
પ્રખ્યાત ઓડિયન્સ રિસર્ચ એજન્સી ‘ઓરમેક્સ મીડિયા’ (Ormax Media) દ્વારા ભારતમાં ઓટીટી પર સૌથી વધુ જોવાયેલા ટોપ-૧૦ શો અને ફિલ્મોની યાદી જાહેર કરવામાં આવી છે. આ યાદીમાં સૌથી મોટો ઉલટફેર જોવા મળ્યો છે. અપેક્ષા મુજબ, જિયો હોટસ્ટાર પર પ્રસારિત થતી ઇન્ડિયન પ્રીમિયર લીગ એટલે કે આઈપીએલ (IPL) ૧૮૪.૭ મિલિયન વ્યુઝ સાથે પ્રથમ ક્રમે છે. પરંતુ સૌથી આશ્ચર્યજનક બાબત એ છે કે, સોની લિવ (SonyLIV) એપ પર સ્ટ્રીમ થતો શો ‘તારક મહેતા કા ઉલ્ટા ચશ્મા’ ૪.૨ મિલિયન વ્યુઝ મેળવીને દેશભરમાં બીજા સ્થાને રહ્યો છે.
રણવીર સિંહની ફિલ્મ ‘ધુરંધર’ ચોથા ક્રમે ફેંકાઈ
ઓરમેક્સના આ સત્તાવાર રિપોર્ટ અનુસાર, ટેલિવિઝન રિયાલિટી શો ‘લાફ્ટર શેફ સીઝન ૩’ ને ૩.૯ મિલિયન વ્યુઝ સાથે ત્રીજું સ્થાન મળ્યું છે. જ્યારે રણવીર સિંહની હાઇ-બજેટ ફિલ્મ ‘ધુરંધર’ (Dhurandhar) ૩.૬ મિલિયન વ્યુઝ સાથે ચોથા સ્થાને ફેંકાઈ ગઈ છે. જો આ યાદીમાંથી લાઈવ સ્પોર્ટ્સ એટલે કે આઈપીએલને એકબાજુએ રાખવામાં આવે, તો મનોરંજન કેટેગરીની ફિલ્મો અને કાલ્પનિક શોની યાદીમાં ‘તારક મહેતા…’ આખા દેશમાં નંબર-૧ પ્રોપર્ટી સાબિત થઈ છે. આ આંકડા દર્શાવે છે કે બોલિવૂડની મોટી ફિલ્મો કરતાં પણ દર્શકો જેઠાલાલ અને બાબુજીની જુગલબંધી જોવાનું વધુ પસંદ કરે છે.
ટીવી પર સફળતાના ૧૮ વર્ષ પૂર્ણ
અત્રે ઉલ્લેખનીય છે કે, ‘તારક મહેતા કા ઉલ્ટા ચશ્મા’ શો વર્ષ ૨૦૦૮ થી સતત ટીવી પર ટેલિકાસ્ટ થઈ રહ્યો છે, એટલે કે ચાલુ વર્ષે ૨૦૨૬ માં આ સુપરહિટ શોએ પોતાના પ્રસારણના સફળ ૧૮ વર્ષ પૂર્ણ કરી લીધા છે. આટલા લાંબા સમય પછી પણ દર્શકોનો આ શો પ્રત્યેનો ક્રેઝ જરાય ઓછો થયો નથી. સામાન્ય રીતે એવું માનવામાં આવે છે કે ઓટીટી પ્લેટફોર્મ પર માત્ર યુવા કેન્દ્રિત અથવા વેબ સિરીઝ જ ચાલે છે, પરંતુ કૌટુંબિક કોમેડી શો હોવા છતાં ‘તારક મહેતા..’ એ ડિજિટલ સ્પેસમાં પણ નવો રેકોર્ડ બનાવ્યો છે. રણવીર સિંહે તાજેતરમાં જ ડિરેક્ટર ફરહાન અખ્તરની ફિલ્મ ‘ડોન ૩’ છોડ્યા બાદ તેની ફિલ્મ ‘ધુરંધર’ ની ઓટીટી વ્યુઅરશિપ પર મીડિયા જગતની નજર હતી, જ્યાં ટીવીના જેઠાલાલે બાજી મારી લીધી છે.
👉 આ સમાચાર વાચો:
Mumbai Online Loan App Racket। ઓનલાઈન લોન એપ દ્વારા બ્લેકમેલિંગ અને તોડપાણી કરતું મોટું રેકેટ ઝડપાયું મુંબઈ ક્રાઈમ બ્રાન્ચે ૬ આરોપીઓની કરી ધરપકડ
