News Continuous Bureau | Mumbai
Mumbai Ludo Crime। આજના ડિજિટલ યુગમાં સોશિયલ મીડિયા અને ઓનલાઈન ગેમિંગ એપ્સ સગીર વયના બાળકો માટે કેટલી હદે જોખમી સાબિત થઈ રહી છે, તેનો એક આંખ ઉઘાડનારો કિસ્સો દક્ષિણ મુંબઈમાં સામે આવ્યો છે. પ્રસિદ્ધ ઓનલાઈન ગેમ ‘લુડો’ રમતી વખતે એક અજાણ્યા ગેમરના સંપર્કમાં આવીને પ્રેમજાળમાં ફસાયેલી અને ઘરમાંથી ૧૦,૫૦,૦૦૦ (૧૦.૫ લાખ રૂપિયા) ની રોકડ રકમ લઈને ભાગી ગયેલી ૧૭ વર્ષની સગીરાને મુંબઈ પોલીસે ફિલ્મી ઢબે ઓપરેશન પાર પાડીને ગુજરાતમાંથી હેમખેમ બચાવી લીધી છે. અહેવાલ મુજબ, પોલીસે સગીરાની કસ્ટડી મેળવી તેની પાસેથી બાકીની મોટી રોકડ રકમ પણ જપ્ત કરી લીધી છે.
લુડો ગેમના ચેટ બોક્સમાં થયો સંપર્ક, જોધપુરમાં મોટો બંગલો હોવાનો આરોપીએ કર્યો ખોટો દાવો
સર જે.જે. માર્ગ પોલીસ સ્ટેશનમાંથી મળતી સત્તાવાર વિગતો અનુસાર, દક્ષિણ મુંબઈના સ્ક્રેપ અને કાપડના મોટા વ્યવસાય સાથે જોડાયેલા એક પ્રતિષ્ઠિત પરિવારની ૧૭ વર્ષની પુત્રી તાજેતરમાં જ ધોરણ ૧૦ ની પરીક્ષા પાસ કરી ચૂકી છે. તે પોતાના મોબાઈલમાં ઓનલાઈન લુડો ગેમ રમવાની ભારે શોખીન હતી. ગેમ રમતી વખતે તેની અંદર આવતા ઇન્ટિગ્રેટેડ ચેટ અને વોઈસ કોલિંગ ફીચર દ્વારા તેનો સંપર્ક એક અજાણ્યા યુવક સાથે થયો હતો. પોલીસ તપાસમાં બહાર આવ્યું છે કે, આરોપી યુવકે સગીરા સામે પોતે અતિશય શ્રીમંત હોવાનો દેખાવ કર્યો હતો અને રાજસ્થાનના જોધપુરમાં તેનો પોતાનો મોટો બંગલો હોવાનો ખોટો દાવો કર્યો હતો. તેણે સગીરાને લગ્નની લાલચ આપીને પોતાના પ્રેમની જાળમાં ફસાવી દીધી હતી. આરોપીએ તેને મુંબઈનું ઘર છોડીને જોધપુર આવી જવા માટે સતત દબાણ કર્યું હતું અને સાથે એમ પણ કહ્યું હતું કે તું ઘરેથી નીકળે ત્યારે ઘરમાં રાખેલી મોટી રોકડ રકમ અને કિંમતી સામાન પણ સાથે લેતી આવજે.
રાતોરાત લાખોની રોકડ ગાયબ થતાં પરિવારના હોશ ઊડ્યા, મુંબઈ પોલીસે નોંધી અપહરણની FIR
આરોપીના બહેકાવવામાં આવીને આ સગીરા પરિવારના તમામ સભ્યો સૂતા હતા ત્યારે ઘરમાંથી ૧૦.૫ લાખની રોકડ રકમ લઈને ભાગી ગઈ હતી. સવારે દીકરી ઘરે ન મળતાં અને કબાટમાંથી લાખોની રોકડ ગાયબ જોતાં પરિવારના હોશ ઊડી ગયા હતા. ઘણી શોધખોળ બાદ પણ કોઈ પત્તો ન મળતાં સગીરાની માતાએ જે.જે. માર્ગ પોલીસ સ્ટેશનમાં ફરિયાદ નોંધાવી હતી. પોલીસે ભારતીય ન્યાય સંહિતા (BNS) ની કલમ ૧૩૭(૨) હેઠળ અપહરણનો ગુનો નોંધી તપાસ શરૂ કરી હતી. પીએસઆઈના નેતૃત્વમાં બનેલી મુંબઈ પોલીસની વિશેષ ટીમે સીસીટીવી ફૂટેજ, સોશિયલ મીડિયા એકાઉન્ટ્સ અને ટેકનિકલ સર્વેલન્સના આધારે તપાસ શરૂ કરી ત્યારે ચોંકાવનારી કડી મળી કે સગીરા મુંબઈથી ઉપડેલી એક ખાનગી લક્ઝરી બસમાં બેસીને ગુજરાત થઈને જોધપુર તરફ જઈ રહી છે.
ગુજરાત ક્રાઈમ બ્રાન્ચ સાથે મળીને હાઈવે પર નાકાબંધી, ૩૦ થી વધુ બસો ચેક કરીને સગીરાને બચાવી
મુંબઈ પોલીસે સ્થિતિની ગંભીરતા જોઈને તુરંત જ ગુજરાત ક્રાઈમ બ્રાન્ચનો સંપર્ક સાધ્યો અને સંયુક્ત ટીમ બનાવીને સુરત-વડોદરા હાઈવે પર મોટું છટકું ગોઠવ્યું હતું. પોલીસે હાઈવે પર કડક નાકાબંધી કરીને વહેલી સવારના ગાળામાં ત્યાંથી પસાર થતી ૩૦ થી વધુ ખાનગી લક્ઝરી બસોને અટકાવીને સઘન ચેકિંગ હાથ ધર્યું હતું. આખરે, એક બસમાંથી મુંબઈ પોલીસે સગીરાને સુરક્ષિત રીતે શોધી કાઢી હતી. પોલીસે જ્યારે સગીરાની બેગ ચેક કરી ત્યારે તેની પાસેથી બાકીના પૈસા મળી આવ્યા હતા. પૂછપરછ દરમિયાન સામે આવ્યું કે મુંબઈથી ભાગ્યા બાદ તેણે રસ્તામાં કપડાંની શોપિંગ કરી હતી અને એક મોંઘો નવો મોબાઈલ ફોન ખરીદ્યો હતો, જેમાં તેણે આશરે ₹૧ લાખ જેટલી રકમ વાપરી નાખી હતી. પોલીસે સગીરાને સુરક્ષિત રીતે મુંબઈ લાવીને તેના પરિવારને સોંપી દીધી છે અને ફરાર આરોપીને પકડવા માટે રાજસ્થાનમાં દરોડા પાડ્યા છે. મુંબઈ પોલીસે તમામ વાલીઓને ખાસ અપીલ કરી છે કે તેઓ પોતાના બાળકોની ડિજિટલ ગેમિંગ અને અજાણ્યા લોકો સાથેની ઓનલાઈન વાતચીત પર સતત નજર રાખે.
👉 આ સમાચાર વાચો:
Mumbai Traffic Police 2026। મુંબઈ ટ્રાફિક પોલીસ એક્શન મોડમાં રોડફૂટપાથ ખાલી કરાવવા માટે ૧૬ દિવસમાં ૮૪,૦૦૦ થી વધુ વાહનચાલકો દંડાયા
