News Continuous Bureau | Mumbai
Mumbai Weather Monsoon Update મુંબઈગરાઓની ચોમાસાની લાંબી પ્રતીક્ષાનો આખરે અંત આવ્યો છે અને મુંબઈમાં સત્તાવાર રીતે નૈઋત્યનું ચોમાસું બેસી ગયું છે. મંગળવારે સવારથી જ મુંબઈના મોટાભાગના વિસ્તારોમાં વાદળછાયા વાતાવરણ વચ્ચે ધોધમાર વરસાદ શરૂ થઈ ગયો છે, જેનાથી સમગ્ર મુંબઈમાં ઠંડક પ્રસરી ગઈ છે. હવામાન વિભાગ (IMD) દ્વારા મુંબઈ અને આસપાસના વિસ્તારો માટે આગામી ૨૪ થી ૪૮ કલાક અત્યંત સાનુકૂળ હોવાનું જણાવીને ભારે વરસાદનો મોટો સંકેત આપ્યો છે.
Mumbai Weather Monsoon Update – આગામી ૩ કલાક મુંબઈ અને ઉપનગરો માટે ભારે, વિજળીના કડાકા સાથે વરસાદની આશંકા
પ્રાદેશિક હવામાન કેન્દ્રના જણાવ્યા અનુસાર, મુંબઈ શહેર અને મુંબઈ ઉપનગરોમાં આગામી ૩ કલાક માટે તીવ્ર પવન અને વીજળીના કડાકા-ભડાકા સાથે ભારે વરસાદ આવવાની સંભાવના વ્યક્ત કરવામાં આવી છે, જેને પગલે નાગરિકોને બિનજરૂરી બહાર ન નીકળવા અને સાવચેતી રાખવાની સલાહ આપવામાં આવી છે. આ વર્ષે દર વર્ષની સરખામણીએ ચોમાસું મોડું બેઠું છે. જૂનના છેલ્લા અઠવાડિયામાં ચોમાસાએ મહારાષ્ટ્રમાં ગતિ પકડી છે. મુંબઈ પર તોળાઈ રહેલું પાણીની તંગીનું મોટું સંકટ (Water Crisis) આ વરસાદને કારણે મહદઅંશે હળવું થાય તેવી આશા છે.
Mumbai Weather Monsoon Update – કાંદિવલી, બોરીવલી અને અંધેરી સહિતના વિસ્તારોમાં ‘યલો એલર્ટ’ જાહેર
મુંબઈના પશ્ચિમી ઉપનગરો જેવા કે કાંદિવલી, બોરીવલી, માલાડ, અંધેરી, ગોરેગાંવ અને દહીંસરમાં સવારથી જ મેઘરાજાએ જોરદાર બેટિંગ શરૂ કરી છે. હવામાન વિભાગે આજે મુંબઈ અને તેના સેટેલાઈટ શહેરો માટે વરસાદનું ‘યલો એલર્ટ’ (Yellow Alert) જાહેર કર્યું છે. ૨૩ જૂનના રોજ નૈઋત્યના મોસમી પવનોએ મહારાષ્ટ્રના અલીબાગ, પુણે, નિઝામાબાદ, દંતેવાડા, બલાંગીર અને ગયા સુધી સીમા વિસ્તારી લીધી છે અને આગામી કલાકોમાં તે મુંબઈ સહિત મહારાષ્ટ્રના બાકીના ભાગોને સંપૂર્ણપણે આવરી લેશે.
Mumbai Weather Monsoon Update – નાસિક સહિત અન્ય જિલ્લાઓમાં પણ તાપમાનમાં ભારે ઘટાડો
મુંબઈ ઉપરાંત મહારાષ્ટ્રના અન્ય જીલ્લાઓમાં પણ ચોમાસું સક્રિય થઈ ગયું છે. નાસિક (Nashik) જિલ્લા માટે પણ આજે વરસાદનું યલો એલર્ટ જારી કરવામાં આવ્યું છે. છેલ્લા ૨૪ કલાકમાં મહારાષ્ટ્રના મોટાભાગના શહેરોમાં મહત્તમ તાપમાનમાં (Maximum Temperature) નોંધપાત્ર ઘટાડો નોંધાયો છે, જેનાથી લોકોને કાળઝાળ ગરમી અને બફારામાંથી મોટી રાહત મળી છે. મુંબઈ મહાનગરપાલિકા (BMC) અને આપત્તિ વ્યવસ્થાપન તંત્ર પણ નીચાણવાળા વિસ્તારોમાં પાણી ભરાવાની સ્થિતિને પહોંચી વળવા માટે હાઈ-એલર્ટ પર છે.
👉 આ સમાચાર વાચો:
Tej Pratap Yadav Theft Case વિશ્વાસુ જ નીકળ્યો ચોર; તેજ પ્રતાપના ઘરેથી શું શું ચોરીને ભાગ્યો પીએ? જાણો હાઈપ્રોફાઈલ કેસની વિગતો
