News Continuous Bureau | Mumbai
BCI NALSAR Row હૈદરાબાદ સ્થિત નેશનલ એકેડેમી ઓફ લીગલ સ્ટડીઝ એન્ડ રિસર્ચ (NALSAR) યુનિવર્સિટી ઓફ લોના વિવાદને લઈને સુપ્રીમ કોર્ટમાં (Supreme Court of India) ચીફ જસ્ટિસ ઓફ ઈન્ડિયા (CJI) જસ્ટિસ સૂર્યકાંતની (CJI Surya Kant) અધ્યક્ષતાવાળી બેન્ચે બાર કાઉન્સિલ ઓફ ઈન્ડિયાની (BCI) આકરી ઝાટકણી કાઢી છે. દીક્ષાંત સમારોહમાં CJI ના આગમનનો વિરોધ કરવા બદલ BCI દ્વારા ૨૦૨૬ બેચના વિદ્યાર્થીઓનું વકીલ તરીકેનું નોંધણી (Enrolment) રોકવાના પરિપત્ર સામે CJI એ સ્પષ્ટ કહ્યું કે, વિદ્યાર્થીઓને શાંતિપૂર્ણ વિરોધ કરવાનો અધિકાર છે અને BCI એ બિનજરૂરી દખલગીરી ન કરવી જોઈએ.
BCI NALSAR Row – “આ મારા અને વિદ્યાર્થીઓ વચ્ચેનો સંવાદ છે, દખલગીરી કરનાર BCI કોણ?”
વરિષ્ઠ અધિવક્તા કે. પરમેશ્વર દ્વારા આ મામલો સુપ્રીમ કોર્ટ સમક્ષ રજૂ કરવામાં આવ્યો ત્યારે CJI સૂર્યકાંત, જસ્ટિસ જોયમાલ્ય બાગચી અને જસ્ટિસ વી. મોહનાની ખંડપીઠે આકરી નારાજગી વ્યક્ત કરી હતી. CJI એ સ્પષ્ટ શબ્દોમાં ટકોર કરી હતી કે, “વિદ્યાર્થીઓએ મને પત્ર લખ્યો છે અને આ સંવાદ મારા તેમજ વિદ્યાર્થીઓ વચ્ચેનો છે. તેમાં વચ્ચે પડીને આવો પરિપત્ર જાહેર કરનાર BCI કોણ છે?” અદાલતે નિર્દેશ આપ્યો હતો કે વિદ્યાર્થીઓ કે ફેકલ્ટી સભ્યો સામે કોઈપણ પ્રકારની શિક્ષાત્મક કે કડક કાર્યવાહી કરવામાં આવશે નહીં.
BCI NALSAR Row – યુવા વયે અભિપ્રાય આપવાનો અને લોકશાહી વિરોધનો અધિકાર
પોતાના વિદ્યાર્થી કાળનું સ્મરણ કરતાં ચીફ જસ્ટિસે જણાવ્યું હતું કે તેઓ પોતે પણ કોલેજ સમયમાં વિદ્યાર્થી પ્રવૃત્તિઓ અને આંદોલનોમાં સક્રિય રહ્યા છે. તેમણે નોંધ્યું કે જો વિદ્યાર્થીઓ કાયદેસર અને શાંતિપૂર્ણ રીતે પોતાનો અવાજ ઉઠાવતા હોય તો તેમને રોકી શકાય નહીં. યુવા વયે કોઈ ખોટો દ્રષ્ટિકોણ રજૂ કરે તો પણ તેનાથી તેમનો વિરોધ કરવાનો લોકતાંત્રિક અધિકાર છીનવાઈ જતો નથી. CJI એ વિદ્યાર્થીઓને વહેલી તકે વકીલાતનું લાયસન્સ મેળવીને સુપ્રીમ કોર્ટ બારમાં જોડાવા પ્રોત્સાહિત કર્યા હતા.
BCI NALSAR Row – વિવાદ બાદ બાર કાઉન્સિલ ઓફ ઈન્ડિયાનો આદેશ પરત ખેંચાયો
ઉલ્લેખનીય છે કે BCI ચેરમેન મનન કુમાર મિશ્રા દ્વારા NALSAR ના વિદ્યાર્થીઓ અને ફેકલ્ટી વિરુદ્ધ તપાસ રિપોર્ટ માગતો અને રાજ્ય બાર કાઉન્સિલોને તેમના રજિસ્ટ્રેશન અટકાવવાનો આદેશ આપતો પત્ર જારી કરાયો હતો. જોકે, દેશભરમાં સર્જાયેલા ભારે વિરોધ અને કાનૂની જગતની તીખી પ્રતિક્રિયા બાદ BCI એ આ પરિપત્ર સંપૂર્ણપણે પાછો ખેંચી લીધો છે. સુપ્રીમ કોર્ટે BCI ને નોટિસ પાઠવીને બે સપ્તાહમાં આ મામલે સત્તાવાર ખુલાસો રજૂ કરવા આદેશ કર્યો છે.
👉 આ સમાચાર વાચો:
Trump Tariff war ચીન સામે ટ્રમ્પનું આક્રમક વલણ, આ વસ્તુ પર 100% ટેરિફ લાગુ કરવાનો નવો આદેશ
