News Continuous Bureau | Mumbai
India Semiconductor Mission 2.0 વૈશ્વિક ટેકનોલોજી અને ઈલેક્ટ્રોનિક્સ માર્કેટમાં ચીનના એકચક્રી શાસનને જોરદાર ટક્કર આપવા માટે ભારતે એક ઐતિહાસિક અને મહત્વાકાંક્ષી પગલું ભર્યું છે. કેન્દ્ર સરકારે દેશને વિશ્વનું ચિપ મેન્યુફેક્ચરિંગ હબ બનાવવા માટે અંદાજે ₹૧.૨૭ લાખ કરોડના જંગી બજેટ સાથે ‘સેમીકોન ઈન્ડિયા ૨.૦’ (Semicon 2.0) મિશનની તૈયારીઓ તેજ કરી દીધી છે. આ મેગા પ્રોજેક્ટ હેઠળ માત્ર સેમિકન્ડક્ટર ફેબ્સ જ નહીં, પરંતુ એડવાન્સ્ડ પેકેજિંગ, ચિપ ડિઝાઈન અને રોમટિરિયલ સપ્લાય ચેઈનનો સંપૂર્ણ દેશી ઢાંચો તૈયાર કરવામાં આવશે. આ પગલાથી ભારત સ્માર્ટફોન, ઈલેક્ટ્રિક વાહનો, ડિફેન્સ સાધનો અને આર્ટિફિશિયલ ઈન્ટેલિજન્સ (AI) માટે જરૂરી ચિપ્સના વૈશ્વિક પુરવઠામાં સુપરપાવર બનવા તરફ આગળ વધશે.
India Semiconductor Mission 2.0 – ₹૧.૨૭ લાખ કરોડનું વિશાળ પ્રોત્સાહન પેકેજ
‘સેમીકોન ૨.૦’ હેઠળ સરકાર અગાઉના ૭૬,૦૦૦ કરોડના પ્રથમ તબક્કા કરતાં પણ ઘણું મોટું આર્થિક પ્રોત્સાહન પૂરું પાડવા જઈ રહી છે. આ યોજના હેઠળ વૈશ્વિક અને સ્થાનિક કંપનીઓને ભારતમાં ફેબ્રિકેશન યુનિટ્સ સ્થાપવા માટે ભારે કેપિટલ સબસિડી, ટેક્સમાં છૂટછાટ અને અત્યાધુનિક ઈન્ફ્રાસ્ટ્રક્ચર ઉપલબ્ધ કરાવવામાં આવશે. આ મિશનનો મુખ્ય હેતુ ભારતને ચિપ આયાત પર નિર્ભર રહેવાને બદલે ચિપ નિકાસકાર દેશ બનાવવાનો છે.
India Semiconductor Mission 2.0 – ચીન પરથી વૈશ્વિક નિર્ભરતા ઘટાડવાની વ્યૂહરચના
હાલમાં વિશ્વભરના દેશો ‘ચાઈના પ્લસ વન’ (China+1) નીતિ અપનાવી રહ્યા છે, ત્યારે ભારત પોતાને સૌથી વિશ્વસનીય અને સ્થિર વૈશ્વિક વિકલ્પ તરીકે પ્રસ્તુત કરી રહ્યું છે. તાઈવાન, અમેરિકા, જાપાન અને યુરોપની ટોચની ટેક જાયન્ટ્સ ભારતમાં સંયુક્ત સાહસો સ્થાપવા આગળ આવી રહી છે. ટાટા ગ્રૂપ અને માઈક્રોન જેવી અગ્રણી કંપનીઓના પ્લાન્ટ્સ નિર્માણધીન છે, ત્યારે ‘સેમીકોન ૨.૦’ નવા ગ્લોબલ પ્લેયર્સને આકર્ષવા માટે ગેમ-ચેન્જર સાબિત થશે.
India Semiconductor Mission 2.0 – લાખો નોકરીઓ અને આત્મનિર્ભરતા તરફ કદમ
સેમિકન્ડક્ટર ઈકોસિસ્ટમના વિસ્તરણથી દેશમાં હાઈ-ટેક એન્જિનિયરિંગ, સંશોધન અને ઉત્પાદન ક્ષેત્રે લાખો ઉચ્ચ કક્ષાની રોજગારીની તકો ઉભી થશે. આ ઉપરાંત, ઓટોમોબાઈલ, કન્ઝ્યુમર ડ્યુરેબલ્સ અને સેટેલાઈટ ટેકનોલોજી માટે વિદેશી સપ્લાયર્સ પરની નિર્ભરતા સંપૂર્ણપણે નાબૂદ થશે. આ મિશન માત્ર દેશની આર્થિક પ્રગતિને જ વેગ નહીં આપે પરંતુ રાષ્ટ્રીય સુરક્ષા અને વ્યૂહાત્મક સ્વાયત્તતાને પણ નવી મજબૂતી બક્ષશે.
