News Continuous Bureau | Mumbai
Europe Scorching Heat Deaths વૈશ્વિક ક્લાઈમેટ ચેન્જના કારણે યુરોપના દેશોમાં આ વર્ષે પડેલી અભૂતપૂર્વ અને કાળઝાળ ગરમીને પગલે ૮૫૪ શહેરોમાં ૫૦,૩૯૧થી વધુ લોકોએ જીવ ગુમાવ્યા હોવાનો આંતરરાષ્ટ્રીય સંશોધન અહેવાલમાં ચોંકાવનારો ઘટસ્ફોટ થયો છે.
Europe Scorching Heat Deaths – ૨૦૦૦ પછીનો સૌથી ઘાતક ઉનાળો, ૫૦ હજારથી વધુ મોત
પ્રતિષ્ઠિત વિજ્ઞાન જર્નલ ‘નેચર હેલ્થ’ (Nature Health) માં પ્રકાશિત થયેલા તાજેતરના વિશ્લેષણાત્મક અહેવાલ મુજબ, વર્ષ ૨૦૦૦ પછી યુરોપના દેશો માટે આ વર્ષનો ઉનાળો ઇતિહાસનો સૌથી જીવલેણ સાબિત થયો છે. યુરોપના ૮૫૪ નાના-મોટા શહેરોમાં આકરી હીટવેવ (Extreme Heatwave) ના કારણે કુલ ૫૦,૩૯૧ લોકોનાં મોત નીપજ્યાં છે. આશ્ચર્યજનક બાબત એ છે કે કુલ મૃત્યુઆંક પૈકી ૩૨,૬૧૯ લોકોના અકાળ મૃત્યુ પાછળ સીધું ક્લાઈમેટ ચેન્જ (Climate Change) અને માનવસર્જિત ગ્લોબલ વોર્મિંગ જવાબદાર હોવાનું સામે આવ્યું છે. ૨૦૨૨ના વર્ષમાં નોંધાયેલા ૨૯,૪૮૦ મોતના આંકડાની સરખામણીએ આ વર્ષે ૭૧ ટકાનો ચિંતાજનક વધારો જોવા મળ્યો છે.
Europe Scorching Heat Deaths – સરેરાશ કરતાં ૧૨ ડિગ્રી ઊંચું તાપમાન અને બે સપ્તાહમાં ત્રીજા ભાગના મોત
હવામાન વિશ્લેષકોના તારણ મુજબ, જૂન અને જુલાઈ મહિના દરમિયાન તાપમાનનો પારો સામાન્ય સરેરાશ કરતાં ૫.૩ ડિગ્રીથી લઈને કેટલાક વિસ્તારોમાં અધધ ૧૨ ડિગ્રી સેલ્સિયસ સુધી ઊંચો નોંધાયો હતો. કુલ મોતના ત્રીજા ભાગના મૃત્યુ માત્ર ૧૭ જૂનથી ૧ જુલાઈ વચ્ચેના બે અઠવાડિયાના ગાળામાં જ નોંધાયા હતા. યુરોપના ચાર મુખ્ય દેશો ઇટાલી (Italy), ફ્રાન્સ (France), સ્પેન (Spain) અને જર્મની (Germany) માં સ્થિતિ સૌથી વધુ વણસી હતી, જ્યાં શહેરી વિસ્તારો હીટ આઇલેન્ડમાં ફેરવાઈ ગયા હતા અને હોસ્પિટલોમાં દર્દીઓની લાંબી કતારો લાગી ગઈ હતી.
Europe Scorching Heat Deaths – વૃદ્ધો માટે હીટવેવ બની જીવલેણ, ઇન્ફ્રાસ્ટ્રક્ચર સુધારવાની ચેતવણી
આ જીવલેણ ગરમીનો સૌથી મોટો ભોગ વયોવૃદ્ધ નાગરિકો બન્યા છે. અહેવાલ અનુસાર, મૃતકોમાં ૫૦ ટકાથી વધુ લોકો ૮૫ વર્ષથી વધુ ઉંમરના વરિષ્ઠ નાગરિકો હતા, જ્યારે ૨૦ થી ૪૪ વર્ષની વયજૂથના ૮૦૦થી વધુ યુવાનોએ પણ અતિશય હીટસ્ટ્રોકને કારણે દમ તોડ્યો હતો. લંડનની ઇમ્પિરિયલ કોલેજ (Imperial College London) ના સંશોધકોએ ચેતવણી આપી છે કે યુરોપ પૂર્વ-ઔદ્યોગિક કાળ કરતાં ૨.૫ ડિગ્રી સેલ્સિયસ વધુ ગરમ થઈ ચૂક્યું છે અને તેનું વર્તમાન ઈન્ફ્રાસ્ટ્રક્ચર આટલી આકરી ગરમી સહન કરવા સક્ષમ નથી. માત્ર એર કન્ડીશનીંગ કે કૂલિંગ સિસ્ટમ પૂરતી નથી, પરંતુ અશ્મિભૂત ઈંધણનો વપરાશ તાત્કાલિક ઘટાડવો અનિવાર્ય બની ગયો છે.
👉 આ સમાચાર વાચો:
Myanmar Training Camp Case મ્યાનમાર ટ્રેનિંગ કેમ્પ કેસ અમેરિકી નાગરિક મેથ્યુ વેનડાઈક ભારત પરત ફર્યો, દિલ્હીની કોર્ટમાં થયો હાજર!
