News Continuous Bureau | Mumbai
India ATM Cash Crunch દેશભરમાં એટીએમમાંથી કેશ ઉપાડતા ગ્રાહકો માટે ચિંતાજનક સમાચાર સામે આવ્યા છે. હવે લોકોને જરૂરિયાત મુજબ પૂરતી રોકડ રકમ મેળવવામાં મુશ્કેલી પડી શકે છે અને આગામી સમયમાં દેશભરમાં એટીએમ સેવાઓ લથડી જવાની આશંકા છે. કોન્ફેડરેશન ઓફ એટીએમ ઇન્ડસ્ટ્રી એટલે કે કેટમી દ્વારા ઈન્ડિયન બેંક એસોસિએશનને આ અંગે સત્તાવાર માહિતી આપવામાં આવી છે. બિઝનેસ સ્ટાન્ડર્ડના અહેવાલ મુજબ, દેશના મોટાભાગના વિસ્તારોમાં એટીએમ મશીનો હાલમાં રોકડની ભારે કટોકટીનો સામનો કરી રહ્યા છે, જેના કારણે એટીએમ દ્વારા થતા વ્યવહારોની સંખ્યામાં પણ નોંધપાત્ર ઘટાડો જોવા મળ્યો છે.
India ATM Cash Crunch: માર્ચ અને એપ્રિલ મહિનામાં કેશ સપ્લાયમાં મોટો ઘટાડો
કેટમીના અહેવાલ અનુસાર, ચાલુ વર્ષના માર્ચ અને એપ્રિલ મહિનામાં દેશભરના એટીએમમાં રોકડની ભારે અછત જોવા મળી હતી. બેંકો અને કરન્સી ચેસ્ટ તરફથી એટીએમ ઓપરેટરોને મશીનમાં લોડ કરવા માટે પૂરતી રોકડ ઉપલબ્ધ કરાવવામાં આવી નહોતી. આંકડાકીય વિગતો મુજબ, માર્ચ મહિનામાં એટીએમ માટે 94,000 કરોડ રૂપિયાની જરૂરિયાત હતી, પરંતુ તેની સામે માત્ર 61,000 કરોડ રૂપિયા એટલે કે જરૂરિયાતના માત્ર 64 ટકા કેશ જ મળી શકી હતી. આ જ રીતે એપ્રિલ મહિનામાં પણ ભારે અછત વચ્ચે માત્ર 54,000 કરોડ રૂપિયા જ ઉપલબ્ધ કરાવવામાં આવ્યા હતા, જે દર્શાવે છે કે દેશભરમાં રોકડની તંગી કેટલી ગંભીર છે.
India ATM Cash Crunch: ગ્રામીણ અને અર્ધ-શહેરી વિસ્તારો પર સૌથી વધુ અસર થશે
રોકડની આ અછતને કારણે દેશના અનેક રાજ્યોમાં એટીએમ સેવાઓ પર માઠી અસર પડી શકે છે. કેટમીએ ઈન્ડિયન બેંક્સ એસોસિએશન અને ભારતીય રિઝર્વ બેંકના કરન્સી મેનેજમેન્ટ વિભાગને આ અંગે પત્ર લખીને તાત્કાલિક હસ્તક્ષેપ કરવા વિનંતી કરી છે. પત્રમાં જણાવવામાં આવ્યું છે કે ઘણા રાજ્યોમાં એટીએમમાં ફરીથી કેશ ભરવા માટે જરૂરી રોકડ મળી રહી નથી. આ સંકટની સૌથી મોટી અસર ગ્રામીણ અને અર્ધ-શહેરી વિસ્તારોના લોકો પર થવાની સંભાવના છે, કારણ કે આ વિસ્તારોમાં હજુ પણ વસ્તીનો મોટો હિસ્સો રોકડ વ્યવહારો પર જ નિર્ભર રહે છે.
India ATM Cash Crunch: ખર્ચમાં વધારો અને ડિજિટલ પેમેન્ટ બન્યા મુખ્ય કારણ
એટીએમ ઓપરેટરોના જણાવ્યા અનુસાર, હાલમાં મળી રહેલી ઈન્ટરચેન્જ ફી તેમની કામગીરીના ખર્ચને પહોંચી વળવા માટે પૂરતી નથી. જ્યારે એક બેંકના ગ્રાહક બીજા બેંકના એટીએમનો ઉપયોગ કરે ત્યારે બેંકો વચ્ચે અંદરોઅંદર ચૂકવાતી આ ફી હાલમાં 19 રૂપિયા છે. બીજી તરફ, ગાર્ડનો પગાર, ઈંધણના ભાવ અને કેશ ટ્રાન્સપોર્ટેશનનો ખર્ચ સતત વધી રહ્યો છે. આ ઉપરાંત, બેંકો દ્વારા ફ્રી લિમિટ પૂરી થયા પછી ગ્રાહકો પર પ્રતિ ટ્રાન્ઝેક્શન ચાર્જ વધારીને 23 રૂપિયા કરાતા લોકો હવે ડિજિટલ પેમેન્ટ તરફ વધુ વળ્યા છે. આના કારણે એટીએમ ટ્રાન્ઝેક્શનની સંખ્યામાં પણ અંદાજે 10.40 ટકાનો ઘટાડો નોંધાયો છે.
👉 આ સમાચાર વાચો:
Hormuz Strait Crisis| ઈરાન અને ઓમાનનો મોટો માસ્ટરપ્લાન; ટોલ ટેક્સનું નામ બદલીને શરૂ કરી દીધી કરોડોની નવી વસૂલાત
