ન્યૂઝ કંટીન્યૂઝ બ્યૂરો
મુંબઈ
19 સપ્ટેમ્બર 2020
ભારતની ડિજિટલ પેમેન્ટ એપ્લિકેશન પેટીએમને ગૂગલે ગઈકાલે (શુક્રવારે) પ્લે સ્ટોર પરથી હટાવી દીધી હતી. જેના કારણે અનેકવિધ લોકોના પૈસા ડૂબી ગયા હોવાની ભીતિ સેવાઇ રહી હતી. જોકે, પેટીએમની એપ્લિકેશન આઇઓએસ પરથી હટાવવામાં આવી નહોતી અને ફક્ત ચાર કલાકમાં જ ફરીવાર પેટીએમ પ્લેસ્ટોર પર ઉપલબ્ધ થતા વપરાશકારોએ હાશકારો અનુભવ્યો હતો. રિપોર્ટ્સ અનુસાર, ગૂગલની પોલિસીનું ઉલ્લંઘન કર્યું હોવાથી પેટીએમ પર કાર્યવાહી કરાઈ હતી. ગૂગલે એક પોસ્ટમાં જણાવ્યું હતું કે તે રમતોને સટ્ટાબાજીમાં પ્રોત્સાહન આપતી એપ્લિકેશંસને મંજૂરી આપતું નથી અને આવી એપ્લિકેશનો ગૂગલ પ્લે સ્ટોર પરથી દૂર કરવામાં આવશે.
આ દરમિયાન પેટીએમના સ્થાપક વિજય શેખર શર્માએ જણાવ્યું હતું કે, ‘પ્લે સ્ટોરની ગેમ્બલિંગ પોલિસીનો અમારી એપને કારણે ઉલ્લંઘન થતું હોય તેવા કારણોસર અમારી એપને ગૂગલ પ્લેસ્ટોર પરથી હટાવી દેવામાં આવી હતી પરંતુ અમારી તમામ પ્રકારની પ્રવૃતિઓ કાયદાની મર્યાદામાં છે. અમે હાલના સંજોગોમાં કેશબેક ઓફર એપમાંથી દૂર કરી દીધી છે. જેથી ગૂગલે અમારી એપને ફરીવાર રિસ્ટોર કરવાની મંજૂરી આપતા એપ ફરીવાર પ્લે સ્ટોર પર ઉપલબ્ધ થઈ ગઈ છે. પેટીએમના તમામ યુઝર્સના પૈસા તેમજ એકાઉન્ટ બિલકુલ સુરક્ષિત છે.’
ઉલ્લેખનીય છે કે ભારતમાં આઈપીએલ જેવી મોટી રમતગમત શરૂ થાય તે પહેલા આવી એપ્સ મોટી સંખ્યામાં લોંચ કરવામાં આવે છે. ઇન્ડિયન પ્રીમિયર લીગ (આઈપીએલ) ની નવી સીઝન યુએઇમાં આજથી શરૂ થવાની છે.
