News Continuous Bureau | Mumbai
Petrol Diesel Price Today| દેશમાં પેટ્રોલ અને ડીઝલની કિંમતોમાં સતત થઈ રહેલા વધારાથી સામાન્ય જનતા ત્રાહિમામ પોકારી ગઈ છે. અમેરિકા અને ઈરાન વચ્ચે ચાલી રહેલા યુદ્ધના કારણે આંતરરાષ્ટ્રીય સ્તરે ક્રૂડ ઓઈલની સપ્લાય ખોરવાઈ ગઈ છે, જેના કારણે ભારતમાં ઇંધણના ભાવ આસમાને પહોંચ્યા છે. છેલ્લા ૧૦ દિવસમાં તેલ કંપનીઓ દ્વારા ચાર વખત મોંઘવારીનો ઝટકો આપવામાં આવ્યો છે. જો કે, ગઈકાલે સોમવારે થયેલા મોટા વધારા બાદ આજે, મંગળવારે ૨૬ મે ૨૦૨૬ ના રોજ પેટ્રોલ અને ડીઝલના ભાવ સ્થિર રાખવામાં આવ્યા છે, પરંતુ અગાઉ વધેલા ભાવોના કારણે બજેટ સંપૂર્ણપણે ખોરવાઈ ગયું છે.
મુંબઈમાં પેટ્રોલ ૧૧૧.૨૧ અને દિલ્હીમાં ૧૦૨.૧૨ એ પહોંચ્યું
આજે દેશના પ્રમુખ મહાનગરોમાં પેટ્રોલ અને ડીઝલના ભાવની સ્થિતિ જોઈએ તો, મુંબઈમાં પેટ્રોલ પ્રતિ લીટર ૧૧૧.૨૧ રૂપિયા અને ડીઝલ ૯૫.૨૦ રૂપિયા પર સ્થિર છે. દેશની રાજધાની દિલ્હીમાં પેટ્રોલ ૧૦૨.૧૨ રૂપિયા અને ડીઝલ ૯૫.૨૦ રૂપિયા પ્રતિ લીટર વેચાઈ રહ્યું છે. આ સિવાય કોલકાતામાં પેટ્રોલ ૧૧૩.૫૧ રૂપિયા અને ડીઝલ ૯૯.૮૨ રૂપિયા, જ્યારે ચેન્નઈમાં પેટ્રોલ ૧૦૭ રૂપિયા અને ડીઝલ ૯૯.૬૬ રૂપિયા છે. અન્ય શહેરોમાં પટના ખાતે પેટ્રોલ ૧૧૩.૩૫ રૂપિયા, હૈદરાબાદમાં ૧૧૫.૬૯ રૂપિયા અને બેંગલુરુમાં ૧૦૨ રૂપિયા પ્રતિ લીટર પર પહોંચી ગયું છે.
ચાર વર્ષ બાદ ૧૫ મેથી શરૂ થયો ભાવ વધારાનો સિલસિલો
આ વર્ષે ૧૫ મે ૨૦૨૬ ના રોજ ચાર વર્ષના લાંબા ગાળા બાદ પહેલીવાર પેટ્રોલમાં પ્રતિ લીટર ૩ રૂપિયાનો તોતિંગ વધારો ઝીંકવામાં આવ્યો હતો. ત્યારબાદ ૧૯ મેના રોજ ફરી ૯０ પૈસા વધારવામાં આવ્યા હતા. વાત અહીં જ ન અટકી અને ૨૩ મેના રોજ ત્રીજી વખત ભાવમાં ૮૭ પૈસાનો ઉમેરો કરાયો હતો. છેલ્લે ગઈકાલે ૨૫ મેના રોજ કંપનીઓએ ચોથો મોટો પ્રહાર કરતા પેટ્રોલમાં ૨.૬૧ રૂપિયા અને ડીઝલમાં ૨.૭૧ રૂપિયાનો વધારો કર્યો હતો, જેના કારણે દિલ્હી સહિતના ઘણા શહેરોમાં પેટ્રોલ ૧૦０ રૂપિયાની ઐતિહાસિક સપાટીને પાર કરી ગયું છે.
હોર્મુઝની ખાડી બંધ થતાં ઓઈલની ભારે તંગી
ઓઈલ માર્કેટના નિષ્ણાતોના મતે, વૈશ્વિક સ્તરે તેલ સપ્લાય માટેનો સૌથી મહત્વનો દરિયાઈ માર્ગ ‘હોર્મુઝ ખાડી’ (Strait of Hormuz) હાલમાં અમેરિકા અને ઈરાન વચ્ચેના સૈન્ય સંઘર્ષને કારણે બંધ છે. આ કારણે કાચા તેલની ભારે તંગી સર્જાઈ રહી છે અને કંપનીઓ પર દબાણ વધી રહ્યું છે. જો આગામી દિવસોમાં પણ આ યુદ્ધ આ જ રીતે ચાલુ રહેશે, તો માત્ર પેટ્રોલ-ડીઝલ જ નહીં પરંતુ સીએનજી અને અન્ય જીવનજરૂરી ચીજવસ્તુઓના ભાવમાં પણ મોટો ભડકો થઈ શકે છે. સામાન્ય લોકોને આશા છે કે આ વૈશ્વિક કટોકટી વહેલી તકે શાંત થાય જેથી મોંઘવારીમાંથી રાહત મળી શકે.
👉 આ સમાચાર વાચો:
US Secretary Marco Rubio Taj Mahal| તાજમહેલની મુલાકાતે પહોંચેલા અમેરિકી વિદેશ મંત્રી માર્કો રુબિયો પર ઈરાનનો પલટવાર, નિવેદન વાયરલ
