News Continuous Bureau | Mumbai
કિંમતી ધાતુઓના બજારમાં અત્યારે હાહાકાર મચેલો છે. ૨૯ જાન્યુઆરી ૨૦૨૬ના રોજ જ્યારે ચાંદીએ પ્રતિ કિલો ₹૪.૨૦ લાખની ઐતિહાસિક સપાટી વટાવી હતી, ત્યારે કોઈએ ધાર્યું નહોતું કે આટલો મોટો ક્રેસ જોવા મળશે. ગણતરીના દિવસોમાં ચાંદી તેના ઉચ્ચતમ સ્તરથી પ્રતિ કિલો ₹૧,૮૦,૧૫૭ જેટલી સસ્તી થઈ ચુકી છે.મંગળવારે સપ્તાહના બીજા ટ્રેડિંગ દિવસે પણ મલ્ટી કોમોડિટી એક્સચેન્જ (MCX) પર ચાંદીનો ભાવ ખૂલતાની સાથે જ ધડામ નીચે પટકાયો હતો. સોમવારના બંધ ભાવ ₹૨,૩૯,૮૯૧ની સામે આજે ચાંદી ₹૨,૩૫,૨૦૬ પર ટ્રેડ થતી જોવા મળી હતી. આમ, માત્ર એક દિવસમાં ચાંદીના ભાવમાં ₹૪,૬૮૫નો મોટો ઘટાડો નોંધાયો છે.
સોનામાં પણ ગાબડું: હાઈ લેવલથી ₹૩૮,૦૦૦નો ઘટાડો
ચાંદીની પાછળ પાછળ સોનાના ભાવમાં પણ સતત ઘટાડો ચાલુ છે. ૨૯ જાન્યુઆરીએ ૨૪ કેરેટ સોનાનો ભાવ પ્રતિ ૧૦ ગ્રામ ₹૧,૯૩,૦૯૬ના સ્તરે પહોંચી ગયો હતો. જોકે, ત્યારબાદ શરૂ થયેલો ઘટાડો અટકવાનું નામ નથી લેતો. મંગળવારે ૧૦ ગ્રામ સોનાનો વાયદો ₹૧,૫૩,૫૫૦ના સ્તરે આવી ગયો છે, જે તેના ઓલ ટાઈમ હાઈથી આશરે ₹૩૮,૩૩૬ સસ્તું છે.
આ સમાચાર પણ વાંચો : France as India’s ‘New Russia’: શું રશિયાને રિપ્લેસ કરશે ફ્રાન્સ? મુંબઈમાં પીએમ મોદી અને ઇમેન્યુઅલ મેક્રોન વચ્ચેની આજની મુલાકાત કેમ છે ઐતિહાસિક; જાણો અંદરની વિગત
કેમ ફૂટી રહ્યો છે ચાંદીનો પરપોટો?
બજારના નિષ્ણાતો માને છે કે જાન્યુઆરીના અંતમાં ચાંદીના ભાવમાં જે ઉછાળો આવ્યો હતો તે જરૂરિયાત કરતા વધુ હતો. આટલી ઝડપી વૃદ્ધિ બાદ નફો બુક કરવાની હોડ જામતા અને વૈશ્વિક બજારોમાં માંગ ઘટતા હવે ભાવ તળિયે બેસી રહ્યા છે. ફેબ્રુઆરી મહિનામાં અત્યાર સુધીમાં લગભગ દરરોજ સોના-ચાંદીના ભાવમાં ઘટાડો જોવા મળ્યો છે.
રોકાણકારો માટે હવે શું?
સોના-ચાંદીમાં થયેલા આ મોટા કડાકાને કારણે લાંબા ગાળાના રોકાણકારો ચિંતિત છે. જોકે, લગ્નની સીઝન હોવાથી સામાન્ય ગ્રાહકો માટે આ રાહતના સમાચાર છે. નિષ્ણાતોના મતે, જ્યાં સુધી આંતરરાષ્ટ્રીય બજારમાં સ્થિરતા નહીં આવે ત્યાં સુધી કિંમતી ધાતુઓમાં હજુ પણ ઉતાર-ચઢાવ જોવા મળી શકે છે.
