News Continuous Bureau | Mumbai
પશ્ચિમ એશિયામાં ચાલી રહેલું યુદ્ધ હવે નિર્ણાયક અને વિનાશક વળાંક પર છે. ઈરાને અમેરિકા તરફથી મધ્યસ્થ દેશ મારફતે મોકલવામાં આવેલા ૪૮ કલાકના યુદ્ધવિરામના પ્રસ્તાવને ઔપચારિક રીતે ઠુકરાવી દીધો છે. આ કૂટનીતિક નિષ્ફળતા બાદ ઈરાને અમેરિકાના એક અત્યંત આધુનિક F-15E સ્ટ્રાઈક ઈગલ લડાકુ વિમાનને તોડી પાડ્યું હોવાનો દાવો કર્યો છે. આ ઘટના સાથે જ બંને દેશો વચ્ચે સીધો સૈન્ય ટકરાવ શરૂ થઈ ગયો છે.
તેહરાનથી ૪૭૦ કિમી દૂર ‘કરુણ નદી’ પાસે વિમાન ક્રેશ થયું
ટેકનિકલ માહિતી અને જીઓલોકેશન મુજબ, અમેરિકી વિમાન તેહરાનથી આશરે ૪૭૦ કિમી દક્ષિણમાં આવેલા ખુઝેસ્તાન પ્રાંતમાં કરુણ નદી પર બનેલા પુલ પાસે ક્રેશ થયું છે. આ વિમાનમાં બે સભ્યોની ટીમ હતી, જેમાંથી એક સભ્યને અમેરિકી સેનાએ સફળતાપૂર્વક બચાવી લીધો છે અને તેની સારવાર ચાલી રહી છે, જ્યારે બીજા પાયલોટની શોધ હજુ જારી છે. ઈરાની મીડિયા IRIB એ તે વિસ્તારનો નકશો પણ જાહેર કર્યો છે જ્યાં સર્ચ ઓપરેશન ચાલી રહ્યું છે.
આ સમાચાર પણ વાંચો: US-Iran Conflict Escalates: તેહરાનનો બહેરીન અને કુવૈત પર હુમલો: અમેરિકાના ૨ ફાઈટર જેટ તોડી પાડ્યા બાદ ઈરાને મચાવ્યો ખળભળાટ.
ઈરાની પ્રમુખનો હુંકાર- ‘અમે રક્ષણ કરવા માટે તૈયાર છીએ’
ઈરાનના રાષ્ટ્રપતિ મસૂદ પેજેશ્કિયન અને વિદેશ મંત્રી અબ્બાસ અરાઘચીએ અમેરિકા સામે આકરા પ્રહારો કર્યા છે. પેજેશ્કિયને જણાવ્યું કે તેમનો દેશ અમેરિકા અને ઈઝરાયેલના હુમલાઓ સામે પોતાની રક્ષા કરવા માટે તમામ ક્ષમતાઓનો ઉપયોગ કરવા તૈયાર છે. બીજી તરફ, અરાઘચીએ ડોનાલ્ડ ટ્રમ્પની ‘સ્ટોન એજ’ (પાષાણ યુગ) વાળી ધમકી પર કટાક્ષ કરતા કહ્યું કે, પાષાણ યુગ અને અત્યારના સમયમાં મોટો તફાવત છે, તે સમયે પશ્ચિમ એશિયામાં તેલ કે ગેસનું ઉત્પાદન થતું નહોતું.
ઈઝરાયેલના બેરૂત પર હુમલા અને હિઝબુલ્લાહની વળતી કાર્યવાહી
એક તરફ ઈરાન સાથે સીધી ટક્કર ચાલી રહી છે, ત્યારે બીજી તરફ ઈઝરાયેલે લેબનાનની રાજધાની બેરૂતમાં હિઝબુલ્લાહના ઠેકાણાઓ પર ભીષણ હુમલા શરૂ કરી દીધા છે. હિઝબુલ્લાહ દ્વારા દક્ષિણ લેબનાનમાં ઈઝરાયેલી સૈનિકો પર કરવામાં આવેલા હુમલા બાદ આ વળતી કાર્યવાહી કરવામાં આવી છે. સમગ્ર મધ્ય પૂર્વમાં અત્યારે યુદ્ધની જ્વાળાઓ ફેલાઈ રહી છે અને કોઈ પણ પક્ષ નમતું જોખવા તૈયાર નથી.
