ન્યુઝ કન્ટિન્યુઝ બ્યુરો
મુંબઈ, ૭ જૂન ૨૦૨૧
સોમવાર
તહેવારો અને લગ્નસરાનો સમય નજીક આવતાં લોકો સોનાના ભાવ ઘટવાની કાગડોળે રાહ જોઈ રહ્યા છે. અમુક સંશોધનાત્મક લેખ અનુસાર ઑગસ્ટ-સપ્ટેમ્બર ૨૦૨૧માં ઘટવાની શરૂઆત થશે. જો અમેરિકાના સામાન્ય વ્યાજદર વધીને ૨.૫ ડૉલર થાય તો સોનાના ભાવ પર લાંબા સમય માટે નકારાત્મક અસર થવાની શક્યતા છે, એવું વર્લ્ડ ગોલ્ડ કાઉન્સિલના વિશ્લેષકોનું માનવું છે.
બીજી તરફ ધાતુઓની તેજીનો નવો તબક્કો શરૂ થતાં એવું મનાય છે કે સોનાના ભાવ ઔંસ (૩૧.૧૦૩૪૭ ગ્રામ) દીઠ ૨,૧૦૦ ડૉલરની સપાટી આંબી જાય એવી શક્યતા છે. ઉપરાંત, ૬ ઑગસ્ટ ૨૦૨૦ની ઐતિહાસિક ૨,૧૦૭ની સપાટીને પણ વટાવી જાય તો નવાઈ નહિ. ગત અઠવાડિયે સોનાના ભાવ ફરી એકવાર ૧,૯૦૦ ડૉલર વટાવી ગયા હતા.
ખુશખબર! હવે ખાતાધારકોને અઠવાડિયાના સાતેય દિવસ મળશે આ સુવિધા; રિઝર્વ બૅન્કે કરી આ મોટી જાહેરાત
ઉલ્લેખનીય છે કે એપ્રિલ ૨૦૦૪માં સોનાના ભાવ ૨૫૬ ડૉલરની નજીક હતા, જે ૨૦૧૧માં ૧,૮૨૮ ડૉલર થયા હતા. જે ૪૫૦ ટકાનો ઉછાળો દર્શાવે છે. જો આવી જ તેજી ફરી સર્જાય તો સોનાની એક દાયકાની તેજી ૬,૫૦૦ થઈ શકે છે એવું એક મીડિયા રીપૉર્ટમાં જણાવાયું છે.
