News Continuous Bureau | Mumbai
સરકારના અનેક પ્રયાસો બાદ પણ તેલના ભાવ આસમાને આંબી રહ્યા છે. છેવટે કેન્દ્ર સરકારે વધતા છૂટક ભાવનો રોકવા અને તેમની ઉપલબ્ધતા વધારવા માટે ખાદ્ય તેલ અને તેલીબિયાંના સંગ્રહખોરી અને કાળાબજારીને રોકવા માટે નિરીક્ષણ અભિયાન શરૂ કર્યું છે.
ભારત તેની માંગના 60 ટકાથી વધુને પહોંચી વળવા ખાદ્ય તેલની આયાત પર નિર્ભર છે, વૈશ્વિક ભૌગોલિક રાજકીય પરિસ્થિતિને કારણે છેલ્લા કેટલાક મહિનામાં વિવિધ પ્રકારના રસોઈ તેલના છૂટક ભાવમાં તીવ્ર વધારો જોવા મળ્યો છે. અનેક સરકારી પગલાંઓ છતાં ભાવને અંકુશમાં રાખવામાં સરકાર નિષ્ફળ રહી છે અને હવે ખાદ્યતેલો અને તેલીબિયાંના સંગ્રહખોરી અને કાળાબજારીને રોકવાના નામે પહેલી એપ્રિલથી તપાસ અભિયાન શરૂ કરવામાં આવ્યું છે, તેથી વેપારીઓને ફક્ત હેરાનગતીનો જ સામનો કરવો પડવાનો છે, એવી નારાજગી ઓલ ઈન્ડિયા એડીબલ ઓઇલ ટ્રેડર્સ ફેડરેશને અને કોન્ફેડરેશન ઓફ ઓલ ઈન્ડિયા ટ્રેડર્સ (CAIT) સાથે સંકળાયેલા વેપારીઓએ વ્યક્ત કરી છે.
આ સમાચાર પણ વાંચો : થઈ જાવ તૈયાર. એલઆઈસીનો આઈપીઓ આટલા હજાર કરોડનો હશે. તોડશે તમામ આંતરરાષ્ટ્રીય રેકોર્ડ.
કેન્દ્ર સરકારના અધિકારીના કહેવા મુજબ રાજ્ય સરકારના અધિકારીઓ સાથે કેન્દ્રીય ટીમ વિવિધ તેલીબિયાં અને ખાદ્ય તેલ ઉત્પાદક રાજ્યોમાં નિરીક્ષણ કરી રહી છે. ઉત્તર પ્રદેશ, મધ્યપ્રદેશ અને મહારાષ્ટ્ર જેવા મોટા રાજ્યોને તેમાં આવરી લેવામાં આવી રહ્યા છે. આગામી દિવસોમાં ઝુંબેશ વધુ તીવ્ર કરવામાં આવવાના સંકેત પણ સરકારે આપ્યા છે.
સરકારી અધિકારીના કહેવા મુજબ સરકારે પહેલેથી જ ખાદ્ય તેલ પરની આયાત ડ્યૂટી માં ઘટાડો કર્યો છે, આ વર્ષના અંત સુધી સ્ટોક હોલ્ડિંગ મર્યાદામાં વધારો કર્યો છે અને બંદરો પર જહાજો ઉપરાંત ખાનગી વેપારીઓ દ્વારા આયાતની સુવિધા આપી છે. સ્ટોક લિમિટ ઓર્ડરના અમલ માટે કડક પાલનની ખાતરી કરવા માટે આઠ કેન્દ્રીય ટીમો નિયુક્ત કરવામાં આવી છે.
સરકારે પોતાના સત્તાવાર નિવેદનમાં જણાવ્યું હતું કે, "આઠ રાજ્યોના પસંદગીના જિલ્લાઓમાં જમીન સ્તરે ખાદ્ય તેલ અને તેલીબિયાંના સ્ટોકની તપાસ કરવા માટે તપાસ ચાલી રહી છે, જેમાં છૂટક વિક્રેતાઓ, જથ્થાબંધ વેપારીઓ, મોટા સાંકળના છૂટક વિક્રેતાઓ અને પ્રોસેસર્સનો સમાવેશ થાય છે." મહારાષ્ટ્ર, ઉત્તર પ્રદેશ, મધ્યપ્રદેશ, રાજસ્થાન, તેલંગાણા, ગુજરાત, પશ્ચિમ બંગાળ અને દિલ્હી. આવશ્યક ચીજવસ્તુ અધિનિયમની જોગવાઈઓ અનુસાર ઉલ્લંઘન કરનારાઓ સામે કડક કાર્યવાહી શરૂ કરવામાં આવશે એવું પણ આ નિવેદનમાં જણાવાયું છે.
સરકારના કહેવા મુજબ સૂર્યમુખી તેલમાં રશિયા અને યુક્રેન બે મુખ્ય સપ્લાયર છે, અને ખાનગી વેપારીઓ અન્ય દેશોમાંથી સ્ત્રોત મેળવવાનો પ્રયાસ કરી રહ્યા છે, પરંતુ તે ખૂબ ઓછી માત્રામાં હશે. ગ્રાહક બાબતોના મંત્રાલય દ્વારા જાળવવામાં આવેલા ડેટા અનુસાર, છેલ્લા ત્રણ મહિનામાં સોયાબીન તેલ, સૂર્યમુખી તેલ અને પામ તેલના સરેરાશ છૂટક ભાવમાં તીવ્ર ઉછાળો આવ્યો છે.
અહીં ઉલ્લેખનીય છે કે સૂર્યમુખી તેલનો સરેરાશ છૂટક ભાવ 4 એપ્રિલે 184.58 રૂપિયા પ્રતિ કિલોગ્રામ હતો જે આ વર્ષે પહેલી જાન્યુઆરીએ 161.71 રૂપિયા પ્રતિ કિલો હતો. એ જ રીતે, સોયાબીન તેલનો સરેરાશ છૂટક ભાવ કિલોદીઠ રૂ. 148.59 થી વધીને રૂ. 162.13 પ્રતિ કિલોગ્રામ થયો છે, જ્યારે પામ તેલનો ભાવ રૂ. 128.28 પ્રતિ કિલોથી વધીને રૂ. 151.59 પ્રતિ કિલોગ્રામ થયો છે.
4 એપ્રિલના રોજ સીંગદાણાના તેલની સરેરાશ કિંમત 181.74 રૂપિયા પ્રતિ કિલોગ્રામ હતી, પરંતુ સરસવના તેલમાં પ્રતિ કિલોગ્રામ રૂ. 2.78 વધીને આ સમયગાળામાં રૂ. 188.54 પર પહોંચી ગયા હતા.
