News Continuous Bureau | Mumbai
મુંબઈના અંધેરી (MIDC) વિસ્તારમાં એક હૃદયદ્રાવક ઘટના સામે આવી છે. આર્થિક તંગી અને બેરોજગારીને કારણે સતત ચાલતા ઘરકંકાસની વચ્ચે, એક વ્યક્તિએ તેની પત્ની અને માત્ર સાત વર્ષના પુત્ર પર તીક્ષ્ણ કોયતા વડે જીવલેણ હુમલો કર્યો છે. આ લોહિયાળ ખેલ માત્ર મોબાઈલ ફોન વાપરવા જેવી સામાન્ય તકરારને કારણે ખેલાયો હતો.ઘટનાની વિગત મુજબ, અંધેરીની એક રેસિડેન્શિયલ બિલ્ડિંગના ૧૩મા માળે રહેતા આ પરિવારમાં લાંબા સમયથી આર્થિક ખેંચતાણ ચાલતી હતી. પત્ની મોબાઈલ ફોન વાપરી રહી હતી, જે બાબતે બેરોજગાર પતિએ વાંધો ઉઠાવ્યો હતો. બોલાચાલી એટલી હદે વધી ગઈ કે ઉશ્કેરાયેલા પતિએ ઘરનો કોયતો ઉપાડી પત્ની પર આડેધડ ઘા કરવાનું શરૂ કર્યું હતું.
માતાને બચાવવા વચ્ચે પડેલો પુત્ર પણ ઈજાગ્રસ્ત
જ્યારે નરાધમ પિતા પોતાની પત્ની પર હિંસક હુમલો કરી રહ્યો હતો, ત્યારે ૭ વર્ષનો માસૂમ પુત્ર તેની માતાને બચાવવા વચ્ચે પડ્યો હતો. નિર્દયી પિતાએ આવેશમાં આવીને પોતાના પેટના જણ્યા પર પણ હુમલો કર્યો, જેમાં બાળકના ડાબા હાથમાં ગંભીર ઈજા થઈ છે. પત્નીને માથાના ભાગે અને બંને હાથો પર ગંભીર ઘા વાગ્યા છે. પાડોશીઓએ ચીસાચીસ સાંભળી પોલીસને જાણ કરતા મોટી દુર્ઘટના ટળી હતી.
આ સમાચાર પણ વાંચો : Major Crackdown at Mumbai Airport: મુંબઈ એરપોર્ટ પર કસ્ટમ વિભાગની સર્જિકલ સ્ટ્રાઈક: ₹૨૩.૫ કરોડનું ડ્રગ્સ અને ₹૮૫ લાખનું સોનું ઝડપાયું; ૩ તસ્કરોની ધરપકડ.
MIDC પોલીસ દ્વારા ધરપકડ અને હોસ્પિટલમાં સારવાર
પોલીસે તાત્કાલિક ઘટનાસ્થળે પહોંચી લોહીલુહાણ હાલતમાં માતા-પુત્રને જોગેશ્વરીની ટ્રોમા કેર હોસ્પિટલમાં દાખલ કર્યા હતા. હાલમાં તેમની સ્થિતિ સ્થિર હોવાનું જાણવા મળી રહ્યું છે. MIDC પોલીસે આરોપી પતિ વિરુદ્ધ હત્યાના પ્રયાસઅને અન્ય ગંભીર કલમો હેઠળ ગુનો નોંધી તેની ધરપકડ કરી લીધી છે.
