News Continuous Bureau | Mumbai
BMC Encroachment Drive Dadar મુંબઈના ધમધમતા વિસ્તારો એવા દાદર, માટુંગા અને પરેલમાં રાહદારીઓને પડતી મુશ્કેલીઓ દૂર કરવા માટે બૃહન્મુંબઈ મહાનગરપાલિકા (BMC) દ્વારા અતિક્રમણ વિરોધી મોટી ઝુંબેશ હાથ ધરવામાં આવી છે. પાલિકા કમિશનરે તાજેતરમાં કરેલી ઓચિંતી તપાસ બાદ પદયાત્રીઓ માટે સુરક્ષિત ફૂટપાથ સુનિશ્ચિત કરવા કડક આદેશો આપ્યા હતા, જેના પગલે પાલિકા પ્રશાસને દબાણો હટાવવાની કામગીરી તેજ કરી છે.પાલિકા દ્વારા G-નોર્થ (દાદર, માહિમ), F-નોર્થ (સાંયન, માટુંગા) અને F-સાઉથ (પરેલ) વોર્ડમાં સઘન તપાસ કરવામાં આવી હતી. કમિશનરે સ્પષ્ટ નિર્દેશ આપ્યા છે કે કોઈ પણ કાર્યવાહી કરતા પહેલા નિયમ મુજબ નોટિસ આપવી અનિવાર્ય છે. ખાસ કરીને એવા સાંકડા ફૂટપાથ જ્યાં ફેરિયાઓના અતિક્રમણને કારણે લોકોએ જોખમી રીતે મુખ્ય રસ્તા પર ચાલવું પડે છે, ત્યાં તાત્કાલિક અસરથી સફાયો કરવામાં આવી રહ્યો છે.
સ્ટેશન અને હોસ્પિટલની આસપાસ ‘નો હોકિંગ ઝોન’
BMC એ શહેરના રસ્તાઓને વધુ સુરક્ષિત બનાવવા માટે અમુક ચોક્કસ વિસ્તારોને પ્રાથમિકતા આપી છે. આ યોજના અંતર્ગત રેલવે સ્ટેશનો, હોસ્પિટલો અને શાળાઓની આસપાસના ૧૫૦ મીટરના ઘેરાવામાં કોઈ પણ પ્રકારનું અતિક્રમણ ચલાવી લેવામાં આવશે નહીં. આ ઉપરાંત, ફ્લાયઓવર નીચેની ખાલી જગ્યાઓ અને મુખ્ય જંક્શન પર થતા ગેરકાયદે પાર્કિંગને પણ દૂર કરવાના આદેશો આપવામાં આવ્યા છે જેથી ટ્રાફિકની સમસ્યા હળવી થઈ શકે.
આ સમાચાર પણ વાંચો : Chandra Grahan 2026: સાવધાન! ૩ માર્ચના રોજ સર્જાશે વર્ષનું પ્રથમ ચંદ્રગ્રહણ; આ રાશિના જાતકો પર તૂટી શકે છે આફત, જાણો સૂતક કાળનો સમય..
ફેરિયાઓ અને રાહદારીઓ વચ્ચે સંતુલન
પાલિકા પ્રશાસને સ્પષ્ટતા કરી છે કે આ મુહિમ ફેરિયાઓની આજીવિકા છીનવવા માટે નથી, પરંતુ વ્યવસ્થા જાળવવા માટે છે. પાત્ર અને નોંધાયેલા ફેરિયાઓ માટે ચોક્કસ ‘હોકર ઝોન’ (Hawker Zone) બનાવવાની યોજના પર કામ ચાલી રહ્યું છે. ફેરિયાઓના દસ્તાવેજોની ચકાસણી અને સર્વે બાદ તેમને કાયદેસર રીતે વ્યવસાય કરવા માટે જગ્યા ફાળવવામાં આવશે, જેથી રાહદારીઓના હક્કો અને ફેરિયાઓની આજીવિકા બંને જળવાઈ રહે.
