News Continuous Bureau | Mumbai
BMC Road Washing Mission મુંબઈમાં વધતા વાયુ પ્રદૂષણ અને ખાડે ગયેલી હવાની ગુણવત્તા (AQI) ને ધ્યાનમાં રાખીને મુંબઈ મહાનગરપાલિકાએ શહેરમાં સફાઈ ઝુંબેશ વધુ તેજ કરવાનો નિર્ણય લીધો છે. શિયાળામાં અને સૂકા હવામાનમાં રસ્તાઓ પર ઉડતી ધૂળ એ પ્રદૂષણનું મુખ્ય કારણ હોવાનું સામે આવ્યું છે. આ ધૂળ રોકવા માટે હવે પાલિકાનો ઘન કચરા વ્યવસ્થાપન વિભાગ મુંબઈના મુખ્ય રસ્તાઓ અને અંદરની ગલીઓના રસ્તાઓ પાણીથી ધોશે.આ ઝુંબેશ માટે પાલિકાએ ૧૨૫ વોટર ટેન્કર ભાડે લેવાની પ્રક્રિયા શરૂ કરી છે અને તે માટે ટેન્ડર મંગાવ્યા છે. અગાઉનો કોન્ટ્રાક્ટ પૂરો થઈ ગયો હોવાથી હવે વધુ વ્યાપક સ્તરે આ નવી સિસ્ટમ લાગુ કરવામાં આવશે.
કેવી હશે નવી વ્યવસ્થા?
આ વર્ષે પાલિકાએ માત્ર મોટા ટેન્કર જ નહીં, પરંતુ અત્યાધુનિક ‘મોબાઈલ વોટર મિસ્ટિંગ’ અને ‘સ્પ્રિંકલર’ સિસ્ટમ પણ તૈનાત કરવાનો નિર્ણય લીધો છે. વાહનો પર આધારિત આ યુનિટ્સ હવામાં રહેલી ધૂળને નીચે બેસાડવામાં મદદ કરશે. ખાસ વાત એ છે કે, મોટા ટેન્કર મુંબઈની સાંકડી ગલીઓમાં જઈ શકતા નથી, તે મુશ્કેલી દૂર કરવા માટે આ વર્ષે નાના કદના ટેન્કર પણ ભાડે લેવામાં આવશે.
૧૫૦ દિવસ ચાલશે સફાઈ અભિયાન
ચોમાસાના ચાર મહિના સિવાય, બાકીના આઠ મહિનામાંથી અંદાજે ૧૫૦ દિવસ આ ટેન્કર મુંબઈના રસ્તાઓ પર દોડશે. બાંધકામો, રસ્તાઓ પરના વાહનોની અવરજવર અને કુદરતી ધૂળને કારણે વધતું પ્રદૂષણ રોકવા માટે આ ઉપાય ફાયદાકારક સાબિત થશે. પાલિકાએ આ માટે બે જૂથોમાં ટેન્ડર પ્રક્રિયા હાથ ધરી છે, જેથી સમગ્ર મુંબઈમાં એકસાથે કામ શરૂ કરી શકાય.
આ સમાચાર પણ વાંચો : Leopard and Black Panther viral video: કેમેરામાં કેદ થયો કુદરતનો કરિશ્મા! એક જ ઘાટ પર તરસ છીપાવતા દેખાયા દીપડો અને બ્લેક પેન્થર, જુઓ દુર્લભ વીડિયો.
નિયમોનું કડક પાલન
રસ્તા ધોવાની સાથે સાથે, મુંબઈ મહાનગરપાલિકાએ બાંધકામ સાઇટ્સ માટે બનાવેલી વાયુ પ્રદૂષણ નિયંત્રણ માર્ગદર્શિકા (Dust Mitigation Norms) ફરી એકવાર કડક રીતે લાગુ કરવાના સંકેત આપ્યા છે. પ્રદૂષણ વધારતા પરિબળો પર પાલિકાની બાજ નજર રહેશે. આ નિર્ણયથી મુંબઈગરાને પ્રદૂષણથી રાહત મળવાની અને શહેરની સુંદરતા વધવાની શક્યતા છે.
