News Continuous Bureau | Mumbai

Borivali Bogus call centre : મુંબઈમાં ફરી એક વાર બોગસ કોલ સેન્ટર ઝડપાયું છે. શહેરના બોરીવલી વિસ્તારમાંથી બોગસ કોલ સેન્ટર ઝડપાયું છે. જે અમેરિકન નાગરિકો સાથે છેતરપિંડી કરતું હતું. મુંબઈ પોલીસના ક્રાઈમ બ્રાન્ચ યુનિટે આ કેસમાં 4 લોકોની ધરપકડ કરી છે. પ્રાપ્ત પ્રાથમિક માહિતી અનુસાર, મુંબઈ પોલીસ ક્રાઈમ બ્રાન્ચ યુનિટ 12 ને ગુપ્ત માહિતી મળી હતી કે  બોરીવલી (વેસ્ટ)માં વજીરાનાકા સ્થિત એક નિર્માણાધીન ઈમારતમાં ત્રીજા માળે એક બોગસ કોલ સેન્ટર ચાલી રહ્યું છે. આ કોલ સેન્ટર અમેરિકન નાગરિકોને તેમના માઈક્રોસોફ્ટ વિન્ડોઝમાં સમસ્યા હોવાનું કહીને છેતરપિંડી કરી રહ્યું હતું. પોલીસને મળેલી માહિતીના આધારે, તેઓએ બોરીવલીમાં અર્પણ એપાર્ટમેન્ટમાં દરોડો પાડ્યો.

 Borivali Bogus call centre : પોલીસે 4 આરોપીઓની ધરપકડ કરી

આ દરોડામાં પોલીસે 4 આરોપીઓની ધરપકડ કરી હતી. સાથે જ તેમની પાસેથી 6 લેપટોપ, 20 મોબાઈલ ફોન, 2 વાઈફાઈ રાઉટર, 6 સ્પીકર્સ અને લગભગ 2.41 લાખ રૂપિયાની અન્ય વસ્તુઓ જપ્ત કરવામાં આવી છે. પોલીસે આઇટી એક્ટ અને ભારતીય ન્યાયિક સંહિતાની વિવિધ કલમો હેઠળ કેસ નોંધ્યો છે. ધરપકડ બાદ, બધા આરોપીઓને કોર્ટમાં રજૂ કરવામાં આવ્યા, જ્યાં તેમને પોલીસ કસ્ટડીમાં મોકલી દેવામાં આવ્યા. 

આ સમાચાર પણ વાંચો : Uddhav Thackeray : ઉદ્ધવ ઠાકરેનું મોટું નિવેદન કહ્યું-‘મારી હાલત જાપાન જેવી થઇ ગઈ છે, દરરોજ લાગી રહ્યા છે આંચકા’, જાણો કેમ આવું કહ્યું..

Borivali Bogus call centre  : આ રીતે કરતા હતા છેતરપિંડી 

આરોપીની કાર્યપદ્ધતિનું વર્ણન કરતા પોલીસે જણાવ્યું હતું કે તેઓ યુએસના નાગરિકોને લેપટોપ અને ડેસ્કટોપ પર નકલી પોપ-અપ્સ મોકલતા હતા. જેમાં તેમના સોફ્ટવેરમાં સમસ્યાઓ હોવાનું દર્શાવવામાં આવતું હતું. આ સાથે જ તેઓ એક ટોલફ્રી નંબર પણ પૂરો પાડતા હતા. જ્યારે ટાર્ગેટેડ લોકો તેમનો સંપર્ક કરે ત્યારે સ્કેમર્સ માઈક્રોસોફ્ટના કર્મચારી હોવાનો ડોળ કરતા અને કોમ્પ્યુટર ઠીક કરવાના બહાને ચાલાકીથી તેમની બેંકની વિગતો મેળવી લેતા અને ત્યારબાદ તેમના ખાતામાંથી ભંડોળની ઉચાપત કરતા હતા.