News Continuous Bureau | Mumbai
મુંબઈ લોકલના ફર્સ્ટ ક્લાસ ડબ્બામાં મુસાફરી કરવી પણ હવે સુરક્ષિત રહી નથી. કલ્યાણ પૂર્વમાં રહેતા ૩૨ વર્ષીય મહિલા અંધેરીની એક ખાનગી કંપનીમાં નોકરી કરે છે. જ્યારે તેઓ કલ્યાણ સ્ટેશનના પ્લેટફોર્મ નંબર ૬ પરથી મુંબઈ તરફ જતી ફાસ્ટ લોકલમાં ચઢી રહ્યા હતા, ત્યારે આ આઘાતજનક ઘટના બની હતી.જ્યારે પીડિત મહિલા ડબ્બામાં પ્રવેશી રહ્યા હતા, ત્યારે અંદર ઉભેલી એક અજાણી મહિલાએ તેમને અટકાવ્યા અને કહ્યું કે અંદર જગ્યા નથી. વિવાદ વધતા તે મહિલાએ પીડિતા ને બહાર ધકેલવાનો પ્રયાસ કર્યો અને ગુસ્સામાં આવીને પીડિતા ના હાથ પર જોરથી બચકું ભરી લીધું. આટલેથી ન અટકતા, તેણે પીડિતાની આંગળી પકડીને જોરથી મરોડી નાખી હતી.
દુખાવો સહન કરીને પણ નોકરી પર ગયા
આ અચાનક થયેલા હુમલાથી પીડિતા ને અસહ્ય પીડા થઈ હતી, પરંતુ ઓફિસ પહોંચવાના દબાણને કારણે તેમણે તે જ હાલતમાં મુસાફરી ચાલુ રાખી. સાંજે ઘરે પરત ફર્યા બાદ દુખાવો વધતા તેઓ ડોક્ટર પાસે ગયા, જ્યાં ખબર પડી કે તેમની આંગળીમાં ગંભીર ઈજા થઈ છે અને હાથ પર બચકાના નિશાન પણ છે. ત્યારબાદ તેમણે કલ્યાણ રેલ્વે પોલીસ (GRP) સ્ટેશનમાં ફરિયાદ નોંધાવી હતી.
આ સમાચાર પણ વાંચો : AI Impact Summit Delhi: ગુગલના CEO સુંદર પિચાઈ અને ફિનલેન્ડના પીએમ ભારત પહોંચ્યા, જાણો એઆઈ સમિટની તમામ મોટી અપડેટ્સ.
સીસીટીવી ફૂટેજ દ્વારા શોધખોળ શરૂ
રેલ્વે પોલીસે અજાણી મહિલા વિરુદ્ધ ગુનો નોંધીને તપાસ હાથ ધરી છે. કલ્યાણ સ્ટેશનના પ્લેટફોર્મ નંબર ૬ પરના સીસીટીવી ફૂટેજ તપાસવામાં આવી રહ્યા છે જેથી આરોપી મહિલાની ઓળખ થઈ શકે. પોલીસ એ પણ તપાસી રહી છે કે તે મહિલા કયા સ્ટેશને ઉતરી હતી. મુંબઈ લોકલમાં મહિલાઓ વચ્ચેના આવા હિંસક વિવાદોએ હવે સુરક્ષા પર સવાલો ઉભા કર્યા છે.
