News Continuous Bureau | Mumbai
Mumbai BEST Bus Fire। મુંબઈના સાયન વિસ્તારમાં આવેલા પ્રતીક્ષા નગર બેસ્ટ બસ ડેપોમાં રવિવારે મધ્યરાત્રિએ આગનું મોટું તાંડવ જોવા મળ્યું હતું. ડેપોમાં પાર્ક કરેલી બેસ્ટની બે બસોમાં માત્ર દોઢ કલાકના ગાળામાં એક પછી એક અચાનક ભીષણ આગ ફાટી નીકળી હતી. મધ્યરાત્રિના અંધારામાં લાગેલી આ આગને કારણે સમગ્ર ડેપો પરિસરમાં ભારે અફરાતફરી અને ભયનો માહોલ સર્જાયો હતો. ઘટનાની જાણ થતાં જ ફાયર બ્રિગેડની ટીમે તાત્કાલિક ઘટનાસ્થળે પહોંચીને ભારે જહેમત બાદ બંને બસોમાં લાગેલી આગ પર કાબૂ મેળવ્યો હતો. સદનસીબે આ અકસ્માત સમયે બંને બસો ખાલી હોવાના કારણે મોટી જાનહાનિ ટળી છે, પરંતુ બંને વાહનો સંપૂર્ણપણે બળીને ખાખ થઈ ગયા છે.
દોઢ કલાકની અંદર જ બે બસો બળીને ખાખ
મળતી માહિતી મુજબ, પ્રતીક્ષા નગર ડેપોમાં આગની પ્રથમ ઘટના મધ્યરાત્રિએ આશરે ૧૨.૧૫ વાગ્યે બની હતી. પાર્ક કરેલી બસમાંથી અચાનક ધુમાડો અને આગની જ્વાળાઓ નીકળતી જોઈને ડેપોના કર્મચારીઓએ તાત્કાલિક ફાયર બ્રિગેડને જાણ કરી હતી. ફાયર ફાઈટરો જ્યારે પ્રથમ બસની આગ ઓલવવાની કામગીરી કરી રહ્યા હતા, તેના થોડા જ સમયમાં એટલે કે આશરે દોઢ કલાક પછી ત્યાં જ ઉભેલી અન્ય એક બસે પણ અચાનક જ જોરદાર પકડી લીધો હતો. એક જ રાતમાં ઉપરાઉપરી બે બસો સળગવાને કારણે ડેપો પ્રશાસનની ચિંતા વધી ગઈ હતી, પરંતુ ફાયર જવાનોની સમયસૂચકતાને કારણે આગ વધુ ફેલાતી અટકી હતી.
એક બસ કુલાબા રૂટની હતી, જ્યારે બીજી બસ આઈપીએલ મેચ માટે રખાઈ હતી અનામત
પ્રશાસન દ્વારા આપવામાં આવેલી વિગતો અનુસાર, આ બંને બસો રોજિંદા ઉપયોગમાં લેવાતી હતી. આમાંની પ્રથમ બસ કુલાબા વિસ્તારમાંથી પોતાની નિયમિત પેસેન્જર ફેરી પૂર્ણ કરીને પ્રતીક્ષા નગર ડેપોમાં પરત આવી હતી અને ત્યાં પાર્ક કરવામાં આવી હતી. જ્યારે સળગી ગયેલી બીજી બસ મુંબઈમાં યોજાનારી આઈપીએલ ક્રિકેટ મેચોના સંદર્ભમાં મુસાફરોની સુવિધા માટે રિઝર્વ રાખવામાં આવી હતી. રાત્રિના સમયે બંને બસોમાં કોઈ પણ મુસાફર અથવા ડ્રાઈવર-કંડક્ટર હાજર નહોતા, જેના કારણે મોટી હોનારત થતાં બચી ગઈ હતી.
આગનું ચોક્કસ કારણ હજુ અકબંધ
આ બંને હાઈ-ટેક બસોમાં એક જ રાતમાં અચાનક આગ કેવી રીતે લાગી, તે અંગે હજુ સુધી કોઈ સત્તાવાર માહિતી સામે આવી નથી. બસોમાં આગ શોર્ટ સર્કિટના કારણે લાગી હતી કે પછી એન્જિનમાં કોઈ ગંભીર ટેકનિકલ ખામી સર્જાઈ હતી, તે દિશામાં બેસ્ટ પ્રશાસન અને ફાયર વિભાગના નિષ્ણાતો દ્વારા ઝીણવટભરી તપાસ શરૂ કરવામાં આવી છે. ડેપો સત્તાવાળાઓ હાલમાં પરિસરના સીસીટીવી ફૂટેજ પણ ચકાસી રહ્યા છે જેથી ઘટનાની ચોક્કસ કડી મેળવી શકાય. આ ઘટનાને પગલે મુંબઈમાં દોડતી અન્ય સરકારી બસોની સુરક્ષા અને મેઈન્ટેનન્સ પર પણ સવાલો ઊભા થઈ રહ્યા છે.
👉 આ સમાચાર વાચો:
Donald Trump Iran Threat| સવારસવારમાં જ ઈરાન પર ભડક્યા ડોનાલ્ડ ટ્રમ્પ, બોમ્બ અને ફાઈટર જેટના AI પિક્ચરે વધાર્યું વૈશ્વિક સસ્પેન્સ
