News Continuous Bureau | Mumbai
FDA Action Mumbai મહારાષ્ટ્રના ફૂડ એન્ડ ડ્રગ એડમિનિસ્ટ્રેશન (FDA Maharashtra) વિભાગે મુંબઈમાં અન્ન સુરક્ષાના નિયમોનું ઉલ્લંઘન કરનારી હોટલો અને રેસ્ટોરન્ટ્સ સામે એક અત્યંત મોટી અને કડક ઝુંબેશ શરૂ કરી છે. એફડીએ (FDA) ના નવનિયુક્ત કમિશનર અને આકરા નિર્ણયો માટે જાણીતા આઈએએસ (IAS) અધિકારી તુકારામ મુંઢેના (Tukaram Mundhe) સીધા આદેશ પર મુંબઈની ૬ પ્રતિષ્ઠિત હોટલો, બેકરી અને ક્લબો પર ધડાધડ દરોડા પાડવામાં આવ્યા છે. આ તપાસ દરમિયાન ખોરાકની ગુણવત્તામાં ગંભીર ખામીઓ અને નિયમોનો ભંગ જોવા મળતાં કમિશનરે ત્વરિત એક્શન લઈને તમામ ૬ સંસ્થાઓના અન્ન સુરક્ષા પરવાના સસ્પેન્ડ કરી દીધા છે, જેનાથી હોટલ ઉદ્યોગમાં ભારે ફફડાટ વ્યાપી ગયો છે.
FDA Action Mumbai – નરીમાન પોઇન્ટના પ્રખ્યાત રેસ્ટોરન્ટ અને બોરીવલીની બેકરી સહિત અનેક વિસ્તારોમાં લેવાયા આકરા પગલાં
એફડીએ (FDA) ની સત્તાવાર યાદી અનુસાર, મુંબઈના પોશ વિસ્તાર ગણાતા નરીમાન પોઇન્ટ ખાતે આવેલા ‘ફ્લિન્ટ એન્ડ વાર્સા’ (Flint & Warsa) નામના રેસ્ટોરન્ટની ૨૭ જૂનના રોજ ઓચિંતી તપાસ કરવામાં આવી હતી. આ તપાસ દરમિયાન ત્યાં પીરસવામાં આવતા ખાદ્યપદાર્થોમાં ખોટા બ્રાન્ડિંગ ના ગંભીર પ્રકારો સામે આવ્યા હતા. અન્ન સુરક્ષા ધારાના ઉલ્લંઘન બદલ આ રેસ્ટોરન્ટનું લાયસન્સ તાત્કાલિક અસરથી સસ્પેન્ડ કરાયું છે. આ ઉપરાંત, બોરીવલી પશ્ચિમમાં આવેલી ‘એમ. કે. બેકરી’ માં (M.K. Bakery) રીનોવેશનનું (નૂતનીકરણ) કામ ચાલુ હોવા છતાં અત્યંત અસ્વચ્છ વાતાવરણમાં ખાદ્યપદાર્થોનું ઉત્પાદન થતું ઝડપાયું હતું. આ બેકરી ઉપરાંત ભંડુપ, સાંતાક્રુઝ અને વાંદ્રા (બાંદ્રા) વિસ્તારની નામાંકિત હોટલો સામે પણ આવી જ કડક કાર્યવાહી કરવામાં આવી છે.
FDA Action Mumbai – તુકારામ મુંઢેની કાર્યવાહીના નામે ‘બંટી-બબલી’ સક્રિય, બોગસ એફડીએ અધિકારીઓની ટોળકી સામે ગુનો દાખલ
મુંબઈમાં કમિશનર તુકારામ મુંઢેની આ ધડાધડ કાર્યવાહીના ડરનો ફાયદો ઉઠાવીને કેટલાક તોડબાજો પણ સક્રિય થયા હોવાની ચોંકાવનારી ઘટના સામે આવી છે. બોરીવલી પશ્ચિમ વિસ્તારમાં આવેલી ‘આહાર હોટલ’ (Ahaar Hotel) પર એફડીએ (FDA) ના નકલી અધિકારી બનીને એક ‘બંટી અને બબલી’ ની જોડીએ દરોડો પાડ્યો હતો. આ નકલી અધિકારીઓએ હોટલ માલિકને ફૂડ સેમ્પલ ચેક કરવાના નામે લાયસન્સ રદ કરવાની અને કાનૂની કાર્યવાહી કરવાની ભયાનક ધમકી આપી હતી. તેમણે ‘ફૂડ કોર્પોરેશન ઓફ ઇન્ડિયા’ (FCI) નું નકલી આઈડી કાર્ડ પણ બતાવ્યું હતું. જો કે, હોટલ માલિકને શંકા જતાં તેમણે તુરંત પોલીસનો સંપર્ક સાધ્યો હતો, જેથી આ ભાંડો ફૂટી ગયો હતો અને પોલીસે બંને નકલી અધિકારીઓ વિરુદ્ધ સત્તાવાર ગુનો નોંધી વધુ તપાસ હાથ ધરી છે.
FDA Action Mumbai – ગ્રાહકોને પીવાનું શુદ્ધ પાણી મફત આપવું ફરજિયાત, બોર્ડ લગાવવા કમિશનરનો નવો આદેશ
પોતાની કડક કાર્યશૈલી માટે જાણીતા કમિશનર તુકારામ મુંઢેએ મુંબઈની તમામ હોટલો અને રેસ્ટોરન્ટ્સ માટે એક નવો મોટો આદેશ પણ જાહેર કર્યો છે. તેમણે સ્પષ્ટ કર્યું છે કે, કોઈ પણ હોટલમાં ગ્રાહક આવે એટલે તેની સામે સીધી મોંઘી મિનરલ વોટરની બોટલ લાવીને મૂકવી નહીં. તમામ હોટલોએ ગ્રાહકોને શુદ્ધ અને સુરક્ષિત પીવાનું પાણી (Drinking Water) સંપૂર્ણપણે મફત ઉપલબ્ધ કરાવવું પડશે અને હોટલમાં આ અંગેનું સ્પષ્ટ ‘બોર્ડ’ લગાવવું પણ ફરજિયાત રહેશે. જો કોઈ ગ્રાહક પોતે સામેથી બોટલના પાણીની માંગણી કરે, તો જ તેને પેકેજ્ડ વોટર આપવાનું રહેશે. ઉલ્લેખનીય છે કે, લાંચખોરીના વિવાદો બાદ તુકારામ મુંઢેએ ૨૫ મે ૨૦૨૬ ના રોજ એફડીએ કમિશનર તરીકેનો ચાર્જ સંભાળ્યો હતો. વિભાગે નાગરિકોને કોઈ પણ ફરિયાદ માટે ટોલ-ફ્રી નંબર ૧૮૦૦૨૨૨૩૬૫ પણ જાહેર કર્યો છે.
👉 આ સમાચાર વાચો:
Banking News સાવધાન! શું ૧ જુલાઈથી બંધ થઈ જશે ૨૦૦૫ પહેલાંની ચલણી નોટો? કેન્દ્ર સરકારે આપ્યો આ જવાબ
