News Continuous Bureau | Mumbai
Global Recognition। ગરમાગરમ પાઉં, મસાલેદાર બટાકા વડા, તીખીચટપટી ચટણી અને મોંમાં પાણી લાવી દેતો કુરકુરો ચુરો… આ સ્વાદિષ્ટ વર્ણન સાંભળતા જ મુંબઈગરાંના મોંમાં પાણી આવી જાય છે. છેલ્લા ઘણા દાયકાઓથી મુંબઈના લોકોના દિલ પર રાજ કરનાર અસલ દેશી સ્ટ્રીટ ફૂડ ‘વડાપાઉં’ એ હવે સાત સમુદ્ર પાર વૈશ્વિક સ્તરે પોતાનો ડંકો વગાડ્યો છે. વિશ્વભરના પરંપરાગત અને લોકપ્રિય ખાદ્યપદાર્થોનું રેન્કિંગ કરનારા આંતરરાષ્ટ્રીય પ્લેટફોર્મ ‘ટેસ્ટએટલાસ’ (TasteAtlas) દ્વારા દુનિયાની સર્વશ્રેષ્ઠ સેન્ડવિચની યાદી જાહેર કરવામાં આવી છે. આ પ્રતિષ્ઠિત વૈશ્વિક રેસમાં લંડન, પેરિસ અને ન્યૂયોર્કની મોંઘીદાટ વાનગીઓને પાછળ છોડીને મુંબઈના દાદર સ્થિત પ્રખ્યાત ‘અશોક વડાપાઉં’ એ સ્થાન મેળવ્યું છે, જે દરેક ભારતીય માટે ગર્વની વાત છે.
પાંચ દાયકાથી કીર્તિ કોલેજ પાસે ચાલે છે આ પ્રખ્યાત અશોક વડાપાઉંનો સ્ટોલ
મુંબઈના દાદર વિસ્તારમાં આવેલી કીર્તિ કોલેજ ની બિલકુલ નજીક હોવાને કારણે આ સ્ટોલ આખા દેશમાં કીર્તિ કોલેજના વડાપાઉં તરીકે પણ ખૂબ જાણીતો છે. છેલ્લા પાંચથી છ દાયકા એટલે કે આશરે ૫૦ વર્ષથી વધુ સમયથી આ સ્ટોલ મુંબઈગરાંના સ્વાદની જરૂરિયાતો પૂરી કરી રહ્યો છે. આ સ્ટોલની સૌથી મોટી ખાસિયત એ છે કે આટલા વર્ષો પછી પણ તેમણે પોતાના વડાપાઉંની અસલી પરંપરાગત ચટપટી ચવ અને ગુણવત્તામાં સહેજ પણ ફેરફાર થવા દીધો નથી. તેમની ખાસ લસણની ચટણી, ગરમ વડા અને સાથે મળતો ખાસ ક્રિસ્પી ચુરો ખાવા માટે મુંબઈના ખૂણે-ખૂણેથી લોકો અહીં લાઈનો લગાવે છે.
ટેસ્ટએટલાસ દ્વારા ૪.૧-સ્ટાર રેટિંગ સાથે વિશ્વની શ્રેષ્ઠ સેન્ડવિચમાં સ્થાન મળ્યું
હવે આ જ દેશી સ્વાદ આંતરરાષ્ટ્રીય સ્તરે ચમક્યો છે. વૈશ્વિક ફૂડ ગાઈડ ‘ટેસ્ટએટલાસ’ ના તાજેતરના અહેવાલમાં મુંબઈના આ પ્રખ્યાત અશોક વડાપાઉં ને વિશ્વની સર્વશ્રેષ્ઠ સેન્ડવિચની પ્રતિષ્ઠિત યાદીમાં ૨૫મું સ્થાન આપીને નવો ઈતિહાસ રચવામાં આવ્યો છે. ટેસ્ટએટલાસ દ્વારા આ વડાપાઉંને વૈશ્વિક સ્તરે શાનદાર ૪.૧-સ્ટાર રેટિંગ આપવામાં આવ્યું છે. વડાપાઉંની ખાસિયત એ છે કે તે માત્ર સ્વાદ પૂરતો મર્યાદિત નથી, પરંતુ તે સામાન્ય માણસના ખિસ્સાને પરવડે તેવો અને ખૂબ જ સરળતાથી મળી જતો પૌષ્ટિક ખોરાક છે, જ્યાં મજૂરથી લઈને સેલિબ્રિટીઝ એક જ લાઈનમાં ઉભા રહીને સ્વાદ માણે છે.
વર્ષ ૧૯૬૬ માં દાદર સ્ટેશન બહારથી થઈ હતી શરૂઆત, હવે ગ્લોબલ ઓળખ બની
આ વડાપાઉંના ઈતિહાસ વિશે એવું કહેવાય છે કે તેની શરૂઆત વર્ષ ૧૯૬૬ માં દાદર રેલ્વે સ્ટેશનની બહાર એક નાના સ્ટોલ પર થઈ હતી. દિવંગત શિવસેના પ્રમુખ બાળાસાહેબ ઠાકરેએ મરાઠી માણસોને બિઝનેસમાં આગળ વધારવા માટે આપેલી પ્રેરણામાંથી આ વાનગીનો જન્મ થયો હતો અને જોતજોતામાં તે આખા મુંબઈની લાઈફલાઈન અને ઓળખ બની ગઈ. એક સમય હતો જ્યારે વડાપાઉં માત્ર મુંબઈ પૂરતું મર્યાદિત હતું, પરંતુ આજે દિલ્હી, કોલકાતા, ચેન્નઈ અને બેંગલુરુ જેવા મેટ્રો શહેરોમાં પણ તેની ભારે માંગ છે. ટેસ્ટએટલાસના આ વૈશ્વિક સન્માન બાદ હવે આ અસલ મહારાષ્ટ્રીયન સ્ટ્રીટ ફૂડને આંતરરાષ્ટ્રીય સ્તરે એક નવી ઓળખ મળી છે.
👉 આ સમાચાર વાચો:
US Trade Action। અમેરિકાની નવી ટ્રેડ પોલિસીથી ભારતને મોટો ઝટકો, ચીન અને બાંગ્લાદેશ પર પણ એક્શન
