News Continuous Bureau | Mumbai
Goregaon Drug Overdose Case:ગોરેગાંવના મ્યુઝિક કોન્સર્ટમાં ડ્રગ્સના ઓવરડોઝને કારણે બે તેજસ્વી વિદ્યાર્થીઓના મોતના મામલે મુંબઈ પોલીસે મોટી સફળતા મેળવી છે. પોલીસે આ કેસમાં મુખ્ય ડ્રગ સપ્લાયરની કલ્યાણથી ધરપકડ કરી છે. કલ્યાણની સ્થાનિક પોલીસની મદદથી પાર પાડવામાં આવેલા આ ઓપરેશનમાં પોલીસે ભારે જહેમત અને હાઈ-વોલ્ટેજ ડ્રામા બાદ આરોપીને તેના ઘરેથી ઝડપી લીધો હતો.
મેડિકલના વિદ્યાર્થીઓના મોતથી હચમચી ગયું હતું મુંબઈ
ગત 11 એપ્રિલના રોજ ગોરેગાંવમાં યોજાયેલા મ્યુઝિક કાર્યક્રમમાં ડ્રગ્સના સેવનને કારણે 24 વર્ષીય યુવતી અને 28 વર્ષીય યુવકનું કરુણ મોત નીપજ્યું હતું. મૃત્યુ પામનાર બંને પ્રતિષ્ઠિત કોલેજના મેડિકલના વિદ્યાર્થીઓ હતા. હજુ પણ એક 25 વર્ષીય યુવતી આઈસીયુ (ICU) માં જિંદગી અને મરણ વચ્ચે ઝોલા ખાઈ રહી છે. પોલીસ તપાસમાં બહાર આવ્યું છે કે આ વિદ્યાર્થીઓએ સીધો જ કલ્યાણના આ સપ્લાયરનો સંપર્ક કરીને જીવલેણ નશીલા પદાર્થો મેળવ્યા હતા.
આ સમાચાર પણ વાંચો : Chocolate Theft in Borivali: બોરીવલી સુપર માર્કેટમાંથી ₹12 હજારની ચોકલેટ ચોરનાર 19 વર્ષીય યુવક ઝડપાયો
કલ્યાણમાં એક કલાક સુધી ચાલ્યો હાઈ-વોલ્ટેજ ડ્રામા
મુંબઈ પોલીસની ટીમને બાતમી મળી હતી કે આરોપી કલ્યાણના ખડકપાડા વિસ્તારમાં તેના ઘરે છુપાયો છે. જ્યારે પોલીસ આઠમા માળે આવેલા તેના ફ્લેટ પર પહોંચી ત્યારે પરિવારે અંદરથી દરવાજો ખોલવાની મનાઈ કરી દીધી હતી. શરૂઆતમાં આરોપીના પિતાએ પોલીસને ગેરમાર્ગે દોરવાનો પ્રયાસ કર્યો હતો અને દાવો કર્યો હતો કે તેનો પુત્ર શહેરની બહાર છે. લગભગ એક કલાક સુધી ચાલેલી સમજાવટ અને કડક ચેતવણી બાદ, જ્યારે પોલીસે દરવાજો તોડવાની તૈયારી કરી, ત્યારે આખરે આરોપીએ દરવાજો ખોલ્યો હતો.
બિલ્ડરના ઓઠ હેઠળ ચાલતું હતું ડ્રગ્સનું નેટવર્ક
પોલીસ તપાસમાં જાણવા મળ્યું છે કે આરોપી વ્યવસાયે બિલ્ડર હોવાનો દાવો કરે છે, પરંતુ હકીકતમાં તે હાઈ-પ્રોફાઈલ પાર્ટીઓમાં ડ્રગ્સ સપ્લાય કરવાનું મુખ્ય કામ કરતો હતો. તેના પિતા વિરુદ્ધ પણ અગાઉ અનેક ગુનાઓ નોંધાયેલા હોવાનું બહાર આવ્યું છે. ધરપકડ સમયે આરોપીના ઘરે સંબંધીઓ હાજર હતા અને તેણે તાજેતરમાં જ પોતાનો જન્મદિવસ ઉજવ્યો હોવાનું પણ સામે આવ્યું છે. પોલીસ હવે તેના નેટવર્ક અને અન્ય સાથીદારોની શોધખોળ કરી રહી છે.
