News Continuous Bureau | Mumbai
BMC Headquarter Harassment Case| મુંબઈ મહાનગરપાલિકાના મુખ્યાલયમાં એક વરિષ્ઠ અધિકારી દ્વારા મહિલા કર્મચારીની જાતીય સતામણી કરવામાં આવી હોવાની ચોંકાવનારી ઘટના સામે આવી છે. આઝાદ મેદાન પોલીસે આ મામલે ૫૨ વર્ષીય ઓફિસ સુપરિન્ટેન્ડેન્ટ વિરુદ્ધ ગુનો નોંધી વધુ તપાસ હાથ ધરી છે.
જોઇનિંગના સમયથી જ પરેશાન કરતો હતો અધિકારી
મળતી માહિતી મુજબ, ૨૮ વર્ષીય પીડિત મહિલા કર્મચારી BMC મુખ્યાલયમાં કાર્યરત છે. મહિલાએ પોલીસને આપેલી ફરિયાદમાં જણાવ્યું હતું કે, જ્યારથી તેણે ઓફિસમાં જોઈનિંગ કર્યું છે ત્યારથી ઓફિસ સુપરિન્ટેન્ડેન્ટ તેની સાથે અયોગ્ય અને અશ્લીલ વર્તન કરી રહ્યો હતો. તે સતત મહિલાને માનસિક અને જાતીય રીતે પરેશાન કરતો હોવાનો ગંભીર આક્ષેપ કરવામાં આવ્યો છે.
મહિલાએ જાહેરમાં તમાચો ઝીંક્યો છતાં હરકતો ચાલુ રાખી
સૂત્રોના જણાવ્યા અનુસાર, વરિષ્ઠ અધિકારીની હરકતોથી કંટાળીને એક તબક્કે મહિલા કર્મચારીએ ઓફિસના અન્ય સ્ટાફની હાજરીમાં જ તેને જોરદાર તમાચો ઝીંકી દીધો હતો. આ જાહેરમાં મળેલી ચેતવણી અને અપમાન છતાં અધિકારીએ પોતાની હરકતો ચાલુ રાખી હતી અને સતામણી કરવાનું બંધ કર્યું ન હતું. અંતે મહિલાએ હિંમત દાખવી પોલીસના દ્વાર ખખડાવ્યા હતા.
આઝાદ મેદાન પોલીસ દ્વારા કાર્યવાહી
આઝાદ મેદાન પોલીસે પીડિતાની ફરિયાદના આધારે આરોપી અધિકારી વિરુદ્ધ ભારતીય ન્યાય સંહિતા (BNS) ની સંબંધિત કલમો હેઠળ છેડતી અને સતામણીનો ગુનો નોંધ્યો છે. પોલીસ હવે ઓફિસના અન્ય કર્મચારીઓના નિવેદનો નોંધી રહી છે અને તપાસ કરી રહી છે કે શું આ પહેલા પણ આરોપીએ અન્ય કોઈ મહિલા કર્મચારીઓ સાથે આવું વર્તન કર્યું હતું કે કેમ. આ ઘટના બાદ સરકારી કચેરીઓમાં મહિલાઓની સુરક્ષા પર ફરી એકવાર પ્રશ્નાર્થ ચિન્હ ઊભો થયો છે.
👉 આ સમાચાર વાચો:
Leopard in Mumbai Society। દિંડોશીમાં દીપડાનો ફફડાટ ‘રહેજા હાઇટ્સ’માં એક જ મહિનામાં ત્રીજી વખત દીપડો દેખાતા રહીશો ચિંતિત
