News Continuous Bureau | Mumbai
Mumbai Cyber Fraud। મુંબઈના દહિસર વિસ્તારમાં ફ્રીમાં ફિલ્મો જોવાની લાલચ એક મહિલાને ખૂબ જ મોંઘી પડી છે. ઇન્સ્ટાગ્રામ પર ફ્રી મુવી સ્ટ્રીમિંગની જાહેરાત જોઈને એક અજાણી એપ્લિકેશન ડાઉનલોડ કરતાં જ સાયબર ઠગોએ મહિલાનો આખો મોબાઈલ હેક કરી લીધો હતો. ત્યારબાદ તેના બેંક ખાતામાંથી પીડિતાની મંજૂરી વિના આશરે ૩.૨૫ લાખની રકમ બારોબાર ટ્રાન્સફર કરી લીધી હતી.સામે આવેલા અહેવાલ મુજબ, દહિસર પોલીસે આ મામલે અજ્ઞાત સાયબર ગુનેગાર વિરૂદ્ધ છેતરપિંડી અને ઇન્ફોર્મેશન ટેક્નોલોજી એક્ટ (IT Act) ની વિવિધ કલમો હેઠળ ગુનો નોંધી તપાસ શરૂ કરી છે.
મફતમાં મુવી જોવાની લિંક પર ક્લિક કર્યું, બપોરે ૩ વાગ્યે અચાનક ફોન હેક થયો
દહિસર પોલીસ સ્ટેશનમાંથી મળતી વિગતો અનુસાર, એક ૩૬ વર્ષીય પરિણીત મહિલા દહિસર પૂર્વ વિસ્તારમાં તેના પરિવાર સાથે રહે છે. થોડા દિવસ પહેલા જ્યારે પીડિતા પોતાના મોબાઈલમાં ઇન્સ્ટાગ્રામ સ્ક્રૉલ કરી રહી હતી, ત્યારે તેને એક એપ્લિકેશનની જાહેરાત જોવા મળી હતી, જેમાં દાવો કરવામાં આવ્યો હતો કે આ એપ પર તમામ નવી ફિલ્મો બિલકુલ મફતમાં ઓનલાઈન જોઈ શકાશે. મફતમાં મુવી જોવાની લાલચે મહિલાએ તે જાહેરાત પર આપેલી લિંક પર ક્લિક કરીને એપ્લિકેશન પોતાના ફોનમાં ડાઉનલોડ કરી લીધી હતી. એપ ઇન્સ્ટોલ કર્યા બાદ શરૂઆતમાં મહિલાએ તેના પર મફતમાં કેટલીક ફિલ્મો પણ જોઈ હતી. જો કે, એક દિવસ બપોરે આશરે ૩:૦૦ વાગ્યે જ્યારે તે પોતાના ફોન પર મુવી જોઈ રહી હતી, ત્યારે અચાનક તેનો સ્માર્ટફોન અસાધારણ રીતે વર્તવા લાગ્યો હતો.
હેકર્સે પુરાવા નાશ કરવા આખો મોબાઈલ ‘ફેક્ટરી રીસેટ’ કર્યો, કબાટના બદલે ડિજિટલ ખાતું સાફ
ફોન સ્ક્રીન પર આપોઆપ ‘અપડેટ મોડ’ ચાલુ થઈ ગયો હતો અને તે હેક થઈ ગયો હોય તેમ દેખાતું હતું. આશરે એક કલાક પછી મહિલાએ જોયું તો તેનો આખો ફોન ઓટોમેટીક ‘ફેક્ટરી રીસેટ’ થઈ ગયો હતો અને અંદરનો તમામ પર્સનલ ડેટા ડીલીટ થઈ ગયો હતો. મોબાઈલ આપોઆપ રીસેટ થઈ જતાં મહિલાને કોઈ મોટી ગરબડ હોવાની શંકા ગઈ હતી. તેણે તાત્કાલિક ફોન ચાલુ કરીને યુપીઆઈ એપ ‘ગૂગલ પે’ દ્વારા પોતાનું બેંક એકાઉન્ટ ચેક કર્યું હતું. એકાઉન્ટ સ્ટેટમેન્ટ જોતાં જ તેના પગ નીચેથી જમીન સરકી ગઈ હતી. તેના ખાતામાંથી તેની કોઈ પણ મંજૂરી, ઓટીપી કે જાણ બહાર એક પછી એક કુલ ચાર મોટા ઓનલાઈન ટ્રાન્ઝેક્શન કરવામાં આવ્યા હતા અને કુલ ૩,૨૫,૦૦૦ ની રકમ ઉપાડી લેવામાં આવી હતી.
થર્ડ પાર્ટી લિંકથી વાયરસ ઘુસાડી ‘રિમોટ એક્સેસ’ મેળવ્યો, પોલીસે ગુનો નોંધી આઈપી એડ્રેસ ટ્રેસ કર્યા
પોલીસની પ્રાથમિક તપાસમાં બહાર આવ્યું છે કે, મહિલાએ જેવી જ ઇન્સ્ટાગ્રામ પરથી તે થર્ડ પાર્ટી લિંક દ્વારા નકલી મુવી એપ ડાઉનલોડ કરી, કે તુરંત જ સાયબર ઠગોએ તેના ફોનમાં એક ખતરનાક વાયરસ ઘુસાડી દીધો હતો. આ વાયરસની મદદથી હેકર્સે બેઠા-બેઠા મહિલાના ફોનનો ‘રિમોટ એક્સેસ’ મેળવી લીધો હતો અને તેના આઈડી-પાસવર્ડ ચોરીને ચાર ટ્રાન્ઝેક્શન દ્વારા લાખો રૂપિયા સેરવી લીધા હતા. પુરાવા નાશ કરવા માટે તેમણે ફોનને રીસેટ કરી દીધો હતો. છેતરાયાનો અહેસાસ થતાં જ મહિલાએ સૌપ્રથમ નેશનલ સાયબર ક્રાઈમ હેલ્પલાઈન (1930) નો સંપર્ક કર્યો હતો અને ત્યારબાદ દહિસર પોલીસ સ્ટેશનમાં સત્તાવાર એફઆઈઆર (FIR) નોંધાવી હતી. હાલ દહિસર પોલીસ અને સ્થાનિક સાયબર સેલની ટીમ સંયુક્ત રીતે જે બેંક ખાતાઓમાં પૈસા ટ્રાન્સફર થયા છે તેના આઈપી એડ્રેસના આધારે ઠગોને ટ્રેસ કરવા માટે તપાસ ચલાવી રહી છે.
👉 આ સમાચાર વાચો:
Mumbai Child Marriage। મુંબઈમાં બાળ લગ્ન અને સગીરા પર અમાનુષી અત્યાચાર ગોવંડીમાંથી ૨૬ વર્ષનો પતિ જેલભેગો, સાસુસસરા ફરાર
