News Continuous Bureau | Mumbai
Kandivali Child Labour મુંબઈના પશ્ચિમી ઉપનગર કાંદિવલી (પશ્ચિમ) સ્થિત ચારકોપ ઇન્ડસ્ટ્રીયલ એસ્ટેટમાં ચાલી રહેલી ગારમેન્ટ ફેક્ટરીમાંથી પોલીસે ૧૩ સગીર બાળમજૂરોને (Child Labour) સુરક્ષિત રીતે મુક્ત કરાવ્યા છે. બાળકો પાસેથી જોખમી અને ભારે પરિશ્રમવાળું કામ કરાવવા બદલ કાંદિવલી પોલીસે ગારમેન્ટ ફેક્ટરીના માલિક અને સંચાલક વિરુદ્ધ કાયદેસરનો ગુનો નોંધી સઘન તપાસ શરૂ કરી છે.
Kandivali Child Labour – એન્ટી ટેરરિઝમ સેલ (ATC) દ્વારા ફેક્ટરીમાં ઓચિંતો દરોડો
પોલીસ દ્વારા જારી કરવામાં આવેલી સત્તાવાર અખબારીયાદી અનુસાર, વરિષ્ઠ અધિકારીઓના માર્ગદર્શન હેઠળ એન્ટી ટેરરિઝમ સેલની (ATC) ટીમને ચારકોપ ઇન્ડસ્ટ્રીયલ એરિયામાં બાળમજૂરી કરાવાતી હોવાની ગુપ્ત બાતમી મળી હતી. બાતમીના આધારે પોલીસે તાત્કાલિક વિશેષ ટીમ બનાવી ફેક્ટરી પરિસરમાં ઓચિંતો દરોડો પાડ્યો હતો, જ્યાં ૧૩ સગીર વયના બાળકો કોઈપણ પાયાની સુરક્ષા કે સંભાળ વિના અત્યંત અમાનવીય સ્થિતિમાં કામ કરતા ઝડપાયા હતા.
Kandivali Child Labour – પશ્ચિમ બંગાળથી લાવવામાં આવ્યા હતા ૧૩ થી ૧૭ વર્ષના સગીરો
પ્રાથમિક પોલીસ પૂછપરછમાં સામે આવ્યું છે કે મુક્ત કરાયેલા તમામ બાળકો ૧૩ થી ૧૭ વર્ષની વયજૂથના છે. આ બાળકોને આર્થિક મજબૂરીનો લાભ ઉઠાવી પશ્ચિમ બંગાળના વર્ધમાન, નદિયા અને હુગલી જિલ્લાઓમાંથી મુંબઈ લાવવામાં આવ્યા હતા. ફેક્ટરીમાં તેમની પાસેથી કલાકો સુધી સતત સિલાઈ અને પેકિંગ જેવી ભારે મજૂરી કરાવવામાં આવતી હતી.
Kandivali Child Labour – જુવેનાઇલ જસ્ટિસ એક્ટ હેઠળ કાર્યવાહી, પુનર્વસન શરૂ
પોલીસે ફેક્ટરીના માલિક અને સંચાલક વિરુદ્ધ જુવેનાઇલ જસ્ટિસ એક્ટ (Juvenile Justice Act) અને બાળમજૂરી નિવારણ અધિનિયમ (Child Labour Prohibition Act) ની વિવિધ કલમો હેઠળ ગુનો દાખલ કર્યો છે. મુક્ત કરાવવામાં આવેલા તમામ બાળકોને બાળ કલ્યાણ સમિતિ (CWC) સમક્ષ રજૂ કરીને સરકારી આશ્રયસ્થાને ખસેડવામાં આવ્યા છે, જ્યાંથી તેમને સુરક્ષિત રીતે તેમના વતન અને પરિવારજનો પાસે મોકલવાની પુનર્વસન પ્રક્રિયા શરૂ કરવામાં આવી છે.
👉 આ સમાચાર વાચો:
Fake CEO Cyber Fraud કંપનીના નકલી CEO બની કર્મચારીઓને ખંખેરતી ટોળકીનો પર્દાફાશ બિહારઝારખંડથી ૨ ગઠિયા ઝડપાયા, ₹૪૮.૬૦ લાખ ફ્રીઝ
