News Continuous Bureau | Mumbai

Goregaon Kidnapping Attempt પશ્ચિમ મુંબઈના ગોરેગાંવ વિસ્તારમાં એક સગીર બાળકીના અપહરણનો સનસનાટીભર્યો પ્રયાસ નિષ્ફળ રહ્યો છે. ભગત સિંહ નગરમાં બનેલી આ ઘટનામાં એક ૫૦ વર્ષીય મહિલાએ બાળકીને પોતાની સાથે લઈ જવાની કોશિશ કરી હતી, પરંતુ બાળકીની સમયસૂચકતા અને રાહદારીની મદદથી આ મોટું સંકટ ટળ્યું છે.

રસ્તો ભૂલેલી બાળકી અને મહિલાની મેલી મુરાદ

 ઘટનાની વિગતો મુજબ, ભગત સિંહ નગરમાં રહેતી ૯ વર્ષની બાળકી તેની માતાના કહેવાથી નજીકની ચાલમાં પરિચિતના ઘરે ખીર આપવા નીકળી હતી. જોકે, રસ્તામાં તે ભૂલી પડી ગઈ અને ગભરાયેલી હાલતમાં હતી. આ તકનો લાભ ઉઠાવીને ત્યાં હાજર આરોપી મહિલાએ બાળકીને લલચાવી-ફોસલાવીને પોતાની સાથે અજાણી જગ્યાએ લઈ જવાનો પ્રયાસ કર્યો હતો.

હિંમત અને રાહદારીની મદદ

સામાન્ય રીતે આવા સમયે બાળકો વધુ ગભરાઈ જતા હોય છે, પરંતુ આ બાળકીએ અદભૂત હિંમત દાખવી. તેણે મહિલા સાથે જવાને બદલે રસ્તા પરથી પસાર થતા એક રાહદારી પાસે મદદ માંગી હતી. રાહદારીના ફોન પરથી તેણે પોતાની માતાને ફોન કરીને લોકેશન સમજાવ્યું. બાળકીની માતા અને સ્થાનિક લોકો તાત્કાલિક ત્યાં પહોંચી ગયા હતા અને ભાગવાનો પ્રયાસ કરી રહેલી મહિલાને પકડી પાડી હતી.

આ સમાચાર પણ વાંચો : Vile Parle Cyber Fraud:વિલે પાર્લેની મહિલા સાથે લોટરીના નામે ₹૧.૧૨ લાખની છેતરપિંડી: KBC અને લક્ઝરી કારની લાલચ આપી ઠગબાજોએ ખિસ્સા ખાલી કર્યા

પોલીસ તપાસ અને ગેંગની આશંકા

 ગોરેગાંવ પોલીસે આરોપી મહિલા વિરુદ્ધ સગીરના અપહરણના પ્રયાસનો ગુનો નોંધી તેની ધરપકડ કરી છે. છેલ્લા ૧૪ દિવસમાં મુંબઈમાં બનેલી આ ત્રીજી ઘટનાને પગલે પોલીસ હવે તપાસ કરી રહી છે કે શું આ મહિલા કોઈ ‘ચાઈલ્ડ કિડનેપિંગ ગેંગ’ (Child Kidnapping Gang) સાથે જોડાયેલી છે. પોલીસ દ્વારા રહેણાંક વિસ્તારોમાં પેટ્રોલિંગ વધારવાની અને સીસીટીવી ફૂટેજ તપાસવાની સૂચના આપવામાં આવી છે.