News Continuous Bureau | Mumbai
Mahim Dumper Accident મુંબઈના માહિમ વિસ્તારમાં મહાનગરપાલિકા (BMC) ના કચરાના ડમ્પરે એક વરિષ્ઠ મહિલાને જોરદાર ટક્કર મારતા ગંભીર અકસ્માત સર્જાયો છે. શહેરના વ્યસ્ત રસ્તાઓ પર અનિયંત્રિત ગતિએ દોડતા પાલિકાના વાહનો અને ડ્રાઈવરોની ગંભીર બેદરકારીને કારણે આ દુર્ઘટના ઘટી હોવાનું પ્રાથમિક રીતે જણાઈ રહ્યું છે. આ અકસ્માતને પગલે સ્થાનિક રહીશોમાં પાલિકા તંત્ર અને ટ્રાફિક પોલીસ સામે ભારે રોષ જોવા મળી રહ્યો છે.
રસ્તો ઓળંગી રહેલા વૃદ્ધાને ડમ્પરે મારી જોરદાર ટક્કર
મળતી માહિતી મુજબ, માહિમના એક વ્યસ્ત માર્ગ પર જ્યારે વરિષ્ઠ મહિલા રસ્તો ઓળંગી રહ્યા હતા, ત્યારે પાલિકાના કચરાના ડમ્પરના ચાલકે કાબૂ ગુમાવ્યો હતો. ટક્કર એટલી જોરદાર હતી કે વૃદ્ધા રસ્તા પર ફસડાઈ પડ્યા હતા અને તેમને શરીરે ગંભીર ઈજાઓ પહોંચી હતી. અકસ્માત થતા જ આસપાસના લોકો તાત્કાલિક મદદ માટે દોડી આવ્યા હતા અને લોહીલુહાણ હાલતમાં વૃદ્ધાને નજીકની હોસ્પિટલમાં સારવાર માટે ખસેડ્યા હતા, જ્યાં તેમની હાલત ગંભીર હોવાનું કહેવાય છે.
માહિમ પોલીસ દ્વારા ડ્રાઈવરની અટકાયત અને તપાસ
માહિમ પોલીસેઆ મામલે ગુનો નોંધી ડ્રાઈવરની અટકાયત કરવાની તજવીજ હાથ ધરી છે. અકસ્માત સર્જનાર ડમ્પરને પોલીસે જપ્ત કરી તેને મિકેનિકલ ટેસ્ટ માટે મોકલી આપ્યું છે. પોલીસ એ તપાસ કરી રહી છે કે આ અકસ્માત પાછળ કોઈ યાંત્રિક ખામી જવાબદાર હતી કે ડ્રાઈવરની માનવીય ભૂલ. ડ્રાઈવર વિરુદ્ધ બેદરકારીથી વાહન ચલાવવા અને અન્યની જિંદગી જોખમમાં મૂકવા બદલ કાયદેસરની કાર્યવાહી શરૂ કરવામાં આવી છે.
આ સમાચાર પણ વાંચો : ONGC Theft Gang: મુંબઈના દરિયામાં ONGC પ્લેટફોર્મ પર ચોરી કરતી ગેંગ ઝડપાઈ: ₹૧૫ લાખનો મુદ્દામાલ જપ્ત, માછીમારીના બહાને કરતા હતા લૂંટ
ભારે વાહનોના પ્રવેશ અને ગતિ મર્યાદા પર ઉઠ્યા સવાલો
માહિમ જેવા ગીચ રહેણાંક વિસ્તારોમાં પાલિકાના ડમ્પરો અને અન્ય ભારે વાહનોની અવરજવર માટે ચોક્કસ સમય મર્યાદા હોવી જોઈએ તેવી માંગ રહીશો કરી રહ્યા છે. અવારનવાર બનતા આવા અકસ્માતોને કારણે લોકોમાં ભયનો માહોલ છે. રહીશોનો આક્ષેપ છે કે ડમ્પર ચાલકો ઘણીવાર ટ્રાફિકના નિયમોનું ઉલ્લંઘન કરે છે અને સાંકડા રસ્તાઓ પર પણ તેજ ગતિએ વાહન ચલાવે છે. પાલિકા તંત્ર આ બાબતે કડક પગલાં ભરે તેવી લોક માંગ ઉઠી છે.
