News Continuous Bureau | Mumbai
મુંબઈના ગોરેગાંવ વિસ્તારમાં પૈસા બમણા કરવાની લાલચમાં એક વેપારીએ ₹7 લાખ ગુમાવ્યા હોવાની ચોંકાવનારી ઘટના બની છે. ઠગબાજોએ એક વિશેષ કેમિકલ અને પાવડર દ્વારા અસલી જેવી જ નોટો છાપવાનો દાવો કરી વેપારીને વિશ્વાસમાં લીધો હતો. છેતરપિંડી આચરીને આરોપીઓ વેપારીના ઘરમાંથી જ રોકડ રકમ લઈને ફરાર થઈ ગયા હતા.ફરિયાદી વેપારી પંખાના રેગ્યુલેટર એસેમ્બલ કરવાનો વ્યવસાય કરે છે. આરોપીઓએ વેપારીને લાલચ આપી હતી કે તેમની પાસે એવું કેમિકલ છે જે અસલી નોટની હૂબહૂ નકલ બનાવી શકે છે. આ જાળમાં ફસાયેલા વેપારીએ મિત્રો પાસેથી ઉછીના અને બેંકમાંથી ઉપાડીને કુલ ₹7 લાખની વ્યવસ્થા કરી હતી.
રૂમમાં જ કેમિકલ છાંટવાનું નાટક કરી આચરી ઠગાઈ
આરોપીઓ વેપારીના ઘરે પહોંચ્યા હતા અને પરિવારને રૂમની બહાર મોકલી દીધા હતા. તેમણે વેપારીની નજર સામે જ નોટો પર સફેદ પાવડર છાંટવાનું નાટક કર્યું હતું. અત્યંત ચાલાકીથી તેમણે અસલી નોટોના બંડલ કાઢી લીધા અને તેના સ્થાને સફેદ કાગળના બંડલ મૂકી તેને ટુવાલ અને બ્રાઉન પેપરમાં વીંટાળી દીધા હતા.
આ સમાચાર પણ વાંચો : Rapido Driver’s Unique Scam: રેપિડો ડ્રાઈવરની અનોખી ઠગાઈ: એરપોર્ટ પર ફેક બુકિંગ કરી કંપનીને ચૂનો લગાવનાર ડ્રાઈવર જેલભેગો.
“એક કલાક સુધી પેકેટ ખોલતા નહીં”
ઠગબાજોએ વેપારીને કડક સૂચના આપી હતી કે કેમિકલની અસર થવા માટે આ પેકેટને એક કલાક સુધી ખોલવું નહીં. વેપારી જ્યારે એક કલાકની રાહ જોઈ રહ્યો હતો ત્યારે બંને ઠગબાજો રોકડ લઈને નવ-દો-ગ્યારા થઈ ગયા હતા. સમય પૂરો થતા જ્યારે વેપારીએ પેકેટ ખોલ્યું ત્યારે તેમાં અસલી નોટોને બદલે માત્ર રદ્દી સફેદ કાગળના ટુકડા જોવા મળ્યા હતા.
CCTV અને મોબાઈલ લોકેશનથી તપાસ શરૂ
ગોરેગાંવ પોલીસે આ મામલે છેતરપિંડીનો ગુનો નોંધીને તપાસના ચક્રો ગતિમાન કર્યા છે. પોલીસ આરોપીઓના મોબાઈલ નંબર અને વિસ્તારના સીસીટીવી (CCTV) ફૂટેજ તપાસી રહી છે. પોલીસને શંકા છે કે આ કોઈ વ્યવસ્થિત ટોળકી છે જે ‘બ્લેક મની’ ડબલ કરવાના નામે નિર્દોષ લોકોને નિશાન બનાવી રહી છે.
