News Continuous Bureau | Mumbai
Mumbai Cyber Fraud મુંબઈના બોરીવલી વિસ્તારમાં સાયબર ઠગાઈની એક અત્યંત ગંભીર ઘટના સામે આવી છે. આધુનિક યુગમાં સાયબર ગુનેગારો હવે જાણીતી કંપનીઓના નામે લોકોને શિકાર બનાવી રહ્યા છે. બોરીવલીમાં રહેતા એક વૃદ્ધને ‘ટાટા પાવર’ (Tata Power) ના અધિકારી હોવાનું કહીને છેતરપિંડી આચરવામાં આવી છે. ઠગએ વૃદ્ધને ડરાવીને તેમના બેંક ખાતામાંથી કુલ ₹૯,૭૫,૯૫૫ ની રકમ પડાવી લીધી છે.
વીજળી કાપી નાખવાની ધમકી આપી રચ્યો ખેલ
આ છેતરપિંડીનો ખેલ ખૂબ જ વ્યવસ્થિત રીતે અને પૂર્વ આયોજિત રણનીતિ મુજબ રચવામાં આવ્યો હતો. ફરિયાદી વૃદ્ધને એક અજાણ્યા નંબર પરથી ફોન આવ્યો હતો, જેમાં ફોન કરનારે પોતાની ઓળખ ટાટા પાવરના અધિકારી તરીકે આપી હતી. ઠગએ ધમકી આપી હતી કે જો તુરંત જ KYC અપડેટ કરવામાં નહીં આવે, તો રાત્રે જ તેમના ઘરનું વીજ જોડાણ કાપી નાખવામાં આવશે. અંધારામાં રહેવાના ડરથી ગભરાયેલા વૃદ્ધને ઠગએ વોટ્સએપ પર એક લિંક મોકલી હતી.
માત્ર ₹૧૦ની લાલચ અને આખું ખાતું સાફ
વૃદ્ધે લિંક પર ક્લિક કરીને પોતાની તમામ સંવેદનશીલ વિગતો ભરી દીધી હતી. ત્યારબાદ, પ્રક્રિયા પૂર્ણ કરવાના બહાને ઠગએ તેમની પાસે UPI દ્વારા માત્ર ₹૧૦ ની ટોકન રકમ ટ્રાન્સફર કરાવી હતી. આ નાની રકમના ટ્રાન્ઝેક્શન દ્વારા ઠગએ વૃદ્ધના ફોન અને બેંક ખાતાનો સંપૂર્ણ ‘રિમોટ એક્સેસ’ મેળવી લીધો હતો. થોડા દિવસો બાદ વૃદ્ધના મોબાઈલ પર એક પછી એક મેસેજ આવવા લાગ્યા અને જોતજોતામાં તેમના ખાતામાંથી ₹૯.૭૫ લાખથી વધુની રકમ ડેબિટ થઈ ગઈ હતી.
આ સમાચાર પણ વાંચો : Vastu Tips for Success: શું તમારી પ્રગતિ અટકી ગઈ છે? વાસ્તુશાસ્ત્રના આ ૭ નિયમો અપનાવતા જ ખૂલી જશે સફળતાના દ્વાર; આજે જ કરો આ ફેરફાર
પોલીસે તપાસ હાથ ધરી
પોતાની સાથે છેતરપિંડી થઈ હોવાનું સમજાતા વૃદ્ધે તુરંત બોરીવલી પોલીસ સ્ટેશનનો સંપર્ક કર્યો હતો. પોલીસે આ મામલે છેતરપિંડી અને આઈટી એક્ટ (IT Act) હેઠળ FIR નોંધી છે. સાયબર સેલ હાલમાં જે બેંક ખાતાઓમાં પૈસા ટ્રાન્સફર થયા છે અને જે મોબાઈલ નંબર પરથી કોલ આવ્યો હતો તેને ટ્રેસ કરી રહી છે. નિષ્ણાતો સલાહ આપે છે કે, કોઈપણ વીજ કંપની ક્યારેય ફોન પર કે લિંક મોકલીને KYC અપડેટ કરવાનું કહેતી નથી.
