News Continuous Bureau | Mumbai
Mumbai Fake Currency મુંબઈ પોલીસે ભારતીય અર્થતંત્રને નુકસાન પહોંચાડતા એક મોટા આંતરરાષ્ટ્રીય નકલી નોટ રેકેટનો પર્દાફાશ કર્યો છે. બાંગ્લાદેશમાં છપાતી હાઈ-ક્વોલિટી નકલી નોટો પશ્ચિમ બંગાળ અને ઝારખંડના રૂટ મારફતે મુંબઈના ગીચ બજારોમાં ઠાલવવામાં આવતી હતી. મુંબઈ પોલીસની ટીમે ઝારખંડના સાહિબગંજ પહોંચી બાંગ્લાદેશ સરહદ નજીકથી એક મુખ્ય મહિલા સપ્લાયરને ઝડપી પાડી મોટી સફળતા મેળવી છે. આ કૌભાંડનો પર્દાફાશ ત્યારે થયો જ્યારે પોલીસે દાદરરેલવે સ્ટેશન પરથી એક વ્યક્તિને ₹72,000 ની નકલી નોટો સાથે ઝડપી પાડ્યો હતો. તેની પૂછપરછમાં ઝારખંડ કનેક્શન સામે આવ્યું હતું. તપાસમાં બહાર આવ્યું છે કે મુંબઈના વિશાળ બજારોમાં નકલી નોટો સરળતાથી વટાવી શકાય છે, તેથી આરોપીઓએ આ શહેરને પોતાનું મુખ્ય ટાર્ગેટ (Target) બનાવ્યું હતું.
બાંગ્લાદેશથી મુંબઈ સુધીનું સ્મગલિંગ નેટવર્ક
તપાસમાં ચોંકાવનારો ખુલાસો થયો છે કે નકલી નોટોનું મોટા પાયે પ્રિન્ટિંગ બાંગ્લાદેશમાં થાય છે. ત્યાંથી આ જથ્થો પશ્ચિમ બંગાળના માલદા જિલ્લામાં લાવવામાં આવતો અને ત્યારબાદ ઝારખંડના સાહિબગંજ પહોંચતો હતો. અહીંથી એજન્ટો રેલવે કે ખાનગી વાહનો મારફતે નકલી નોટો મુંબઈ મોકલતા હતા. સુરક્ષા એજન્સીઓના મતે, નેપાળ રૂટ પર ભીંસ વધતા હવે સ્મગલરો (Smugglers) આ નવા રૂટનો ઉપયોગ કરી રહ્યા છે.
કમિશનનો મોટો ખેલ: ₹30,000 માં ખરીદી ₹50,000 માં વેચાણ
આ નેટવર્કમાં નફાનો મોટો ખેલ ચાલી રહ્યો હતો. મુખ્ય આરોપી મહિલા બાંગ્લાદેશ સરહદ પર ₹1 લાખની ફેસ વેલ્યુ ધરાવતી નકલી નોટો માત્ર ₹30,000 માં ખરીદતી હતી અને આગળ મુંબઈના એજન્ટોને ₹50,000 માં વેચતી હતી. આમ, તેને દરેક વ્યવહાર પર ₹20,000 નો સીધો નફો થતો હતો. પોલીસે આશંકા વ્યક્ત કરી છે કે છેલ્લા બે વર્ષમાં આ ગેંગે લાખો રૂપિયાની નકલી કરન્સી મુંબઈના અર્થતંત્રમાં ઠાલવી દીધી છે.
આ સમાચાર પણ વાંચો : Mankhurd Crime: માનખુર્દમાં અજીબોગરીબ કિસ્સો: 19 વર્ષની યુવતીએ સગીર છોકરાનું કર્યું અપહરણ, જાતીય પજવણી મામલે ‘પોક્સો’ હેઠળ ગુનો દાખલ.
સેન્ટ્રલ એજન્સીઓની લેવાશે મદદ
પકડાયેલી મહિલા સપ્લાયરની ધરપકડ બાદ પોલીસ હવે આ રેકેટના મૂળ સુધી પહોંચવા માટે સેન્ટ્રલ એજન્સીઓનીમદદ લઈ રહી છે. આ આંતરરાષ્ટ્રીય રેકેટ હોવાથી તેની તપાસનો વ્યાપ વધારવામાં આવ્યો છે. પોલીસ એ જાણવાનો પ્રયાસ કરી રહી છે કે મુંબઈમાં અન્ય કેટલા એજન્ટો આ નેટવર્ક સાથે જોડાયેલા છે. મુંબઈ પોલીસે નાગરિકોને પણ અપીલ કરી છે કે મોટી રોકડની લેવડદેવડ વખતે નોટોની યોગ્ય ચકાસણી કરે.
