News Continuous Bureau | Mumbai
Mumbai Minor Kidnapping Case। મુંબઈના આરે વિસ્તારમાંથી એક ૧૭ વર્ષીય સગીરાના અપહરણ અને ત્યારબાદ બિહારમાં તેની સાથે બળજબરીથી લગ્ન કરાવવાની ચોંકાવનારી ઘટના સામે આવી છે. ઇન્સ્ટાગ્રામ પર થયેલી મિત્રતા બાદ આરોપી સગીરાને પટલાવીફોસલાવી બિહાર લઈ ગયો હતો. જોકે, આરે પોલીસે સમયસૂચકતા વાપરી દિલ્હી અને બિહારમાં દરોડા પાડી સગીરાને હેમખેમ છોડાવી છે અને આરોપીની ધરપકડ કરી છે.
શાળાએ જવાનું કહી નીકળેલી સગીરા ગુમ થઈ
આરે પોલીસ સ્ટેશનની હદમાં રહેતી એક મહિલાએ ફરિયાદ નોંધાવી હતી કે તેની ૧૭ વર્ષની પુત્રી શાળામાં પુસ્તકો જમા કરાવવાનું કહીને ઘરેથી નીકળી હતી, પરંતુ તે પરત ફરી નહોતી. પરિવારજનોએ શોધખોળ કરવા છતાં પુત્રીનો પત્તો ન મળતા પોલીસે ભારતીય ન્યાય સંહિતા (BNS) હેઠળ અપહરણનો ગુનો નોંધી તપાસ શરૂ કરી હતી.
દિલ્હીથી બિહાર સુધી પોલીસે પીછો કર્યો
આરે પોલીસની વિશેષ ટીમે સીસીટીવી (CCTV) ફૂટેજ અને મોબાઈલ લોકેશન ટ્રેક કરતા સગીરાનું લોકેશન દિલ્હીમાં જોવા મળ્યું હતું. પોલીસની ટીમ તાત્કાલિક દિલ્હી પહોંચી, જ્યાંથી કડી મળતા બિહારના સમસ્તીપુર જિલ્લામાં દરોડો પાડવામાં આવ્યો હતો. પોલીસે ત્યાંથી સગીરાને સુરક્ષિત રીતે બચાવી લીધી હતી અને ૨૩ વર્ષીય આરોપીની ધરપકડ કરી હતી.
બળજબરીથી લગ્ન અને આરોપીની ધરપકડ
તપાસમાં સામે આવ્યું કે આરોપીએ બિહાર પહોંચતા જ સગીરા સાથે બળજબરીથી લગ્ન કરી લીધા હતા. આરોપીને ટ્રાન્ઝિટ રિમાન્ડ પર મુંબઈ લાવવામાં આવ્યો છે અને કોર્ટે તેને પોલીસ કસ્ટડીમાં મોકલી આપ્યો છે. પોલીસ અત્યારે આ મામલે અન્ય કોઈ શખ્સોની સંડોવણી છે કે કેમ તે અંગે વધુ તપાસ કરી રહી છે.
👉 આ સમાચાર વાચો:
Byculla Dockyard Road Firing Case। ભાયખલા ફાયરિંગ કેસનો ભેદ ઉકેલાયો અપમાનનો બદલો લેવા હુમલો કરાયો, બે શાર્પશૂટર ઝડપાયા
