News Continuous Bureau | Mumbai
ONGC Theft Gang મુંબઈના અરબ સાગરમાં આવેલા ઓએનજીસી (ONGC) ના અત્યંત સુરક્ષિત ઓફશોર પ્લેટફોર્મ્સ પરથી કિંમતી સાધનો ગાયબ થવાની ઘટનાઓનો આખરે પર્દાફાશ થયો છે. મુંબઈ પોલીસે એક એવી ગેંગને દબોચી લીધી છે જે માછીમારીના બહાને મધ્ય દરિયે જઈને ઓએનજીસીના પ્લેટફોર્મ પરથી મોંઘી બેટરીઓ અને ટેકનિકલ સાધનોની ચોરી કરતી હતી. પોલીસે આ મામલે બોટ માલિક સહિત ત્રણ આરોપીઓની ધરપકડ કરી છે અને લાખો રૂપિયાનો મુદ્દામાલ જપ્ત કર્યો છે.
માછીમારીનો ઢોંગ કરીને પ્લેટફોર્મ પર લગાવતા હતા સેંધ
પોલીસ તપાસમાં બહાર આવ્યું છે કે, આ ગેંગનો મુખ્ય આરોપી રાયગઢ જિલ્લાનો માછીમાર છે. તે પોતાની બોટ અને સાથીદારો સાથે દરિયામાં માછીમારી કરવા જતો હોવાનો ઢોંગ કરતો હતો જેથી સુરક્ષા એજન્સીઓને કોઈ શંકા ન જાય. તક મળતા જ તેઓ પોતાની બોટને ઓએનજીસીના પ્લેટફોર્મ નજીક લંગારતા અને ત્યાંથી પાવર બેકઅપ માટે વપરાતી કિંમતી બેટરીઓ અને અન્ય સાધનોની ચોરી કરીને નાસી છૂટતા હતા.
આ સમાચાર પણ વાંચો : Mumbai Airport Drugs Seizure: મુંબઈ એરપોર્ટ પર કસ્ટમ્સનો સપાટો: ₹૬૪ કરોડનું ‘હાઈડ્રોપોનિક વીડ’ જપ્ત, વિદેશી નાગરિક સહિત ૪ની ધરપકડ
યલો ગેટ પોલીસે બિછાવી જાળ, ₹૧૫ લાખનો મુદ્દામાલ જપ્ત
છેલ્લા કેટલાક મહિનાઓથી ઓએનજીસી (ONGC) દ્વારા સામાન ચોરી થવાની ફરિયાદો મળી રહી હતી, જેના આધારે યલો ગેટ પોલીસ મથકે ૪ અલગ-અલગ ગુનાઓ નોંધાયા હતા. એડિશનલ પોલીસ કમિશનર ના માર્ગદર્શન હેઠળ પોલીસે ટેકનિકલ તપાસ અને બાતમીદારોની મદદથી આ ગેંગને ઝડપી પાડી છે. પોલીસે આરોપીઓ પાસેથી કુલ ૪૯ નંગ બેટરીઓ જપ્ત કરી છે, જેની બજાર કિંમત આશરે ₹૧૦.૭૦ લાખ છે. ગુનામાં વપરાયેલી માછીમારીની બોટ સહિત કુલ મુદ્દામાલની કિંમત ₹૧૫ લાખ આંકવામાં આવી છે.
