News Continuous Bureau | Mumbai
Mumbai Traffic Police 2026। મુંબઈના રસ્તાઓ અને રાહદારીઓ માટે બનેલી ફૂટપાથોને ગેરકાયદેસર દબાણો તેમજ આડેધડ પાર્કિંગથી મુક્ત કરાવવા માટે મુંબઈ ટ્રાફિક પોલીસે એક મોટું અને વ્યાપક અભિયાન શરૂ કર્યું છે. પોલીસે છેલ્લા ૧૬ દિવસની અંદર વિવિધ ટ્રાફિક નિયમોના ભંગ બદલ મુંબઈભરમાં કુલ ૮૪,૮૫૫ વાહનચાલકો વિરૂદ્ધ દંડાત્મક કાર્યવાહી કરીને મોટો સપાટો બોલાવ્યો છે. ટ્રાફિક વિભાગની આ આક્રમક ડ્રાઈવથી નિયમોનો ભંગ કરનારા ચાલકોમાં ભારે ફફડાટ વ્યાપી ગયો છે.
“રીક્લેમ્ડ રોડ્સ એન્ડ ફૂટપાથ ડ્રાઈવ” નો પ્રારંભ, ડબલ પાર્કિંગ કરનારા તત્વો સામે લાલ આંખ
મુંબઈ ટ્રાફિક પોલીસ પ્રશાસન તરફથી મળતી સત્તાવાર વિગતો અનુસાર, શહેરમાં ટ્રાફિકની સમસ્યા હળવી કરવા, અકસ્માતોનું પ્રમાણ ઘટાડવા અને ફૂટપાથો માત્ર રાહદારીઓ માટે જ ઉપલબ્ધ રહે તે હેતુથી “રીક્લેમ્ડ રોડ્સ એન્ડ ફૂટપાથ ડ્રાઈવ” નામનું વિશેષ અભિયાન ચલાવવામાં આવી રહ્યું છે. મુંબઈના ઘણા વિસ્તારોમાં રોડની બંને બાજુએ થતા ડબલ પાર્કિંગ અને ફૂટપાથ પર વાહનો ખડકી દેવાની પ્રવૃત્તિ વધી ગઈ હતી, જેના કારણે સામાન્ય રાહદારીઓને ભારે હાલાકી ભોગવવી પડતી હતી અને જીવના જોખમે મુખ્ય રસ્તા પર ચાલવું પડતું હતું.
ગેરકાયદેસર પાર્કિંગ બદલ ૭૧,૦૦૦ થી વધુ કેસ, ફૂટપાથ બ્લોક કરનારા ચાલકો પણ દંડાયા
ટ્રાફિક પોલીસે જાહેર કરેલા ૧૬ દિવસના સત્તાવાર આંકડા મુજબ અલગ-અલગ કેટેગરીમાં ખૂબ જ કડક કાર્યવાહી કરવામાં આવી છે. જેમાં સૌથી વધુ કાર્યવાહી ગેરકાયદેસર પાર્કિંગ (Illegal Parking) વિરૂદ્ધ થઈ છે, જ્યાં નિયમોનું ઉલ્લંઘન કરીને રસ્તા કિનારે વાહનો પાર્ક કરનારા ૭૧,૦૬૧ વાહનચાલકો સામે કેસ કરીને દંડ વસૂલવામાં આવ્યો છે. આ ઉપરાંત, રસ્તાની વચ્ચે સેકન્ડ લેનમાં વાહન ઊભું રાખી ટ્રાફિક જામ કરનારા ૫,૯૬૫ વાહનચાલકોને ડબલ પાર્કિંગ બદલ દંડ ફટકારવામાં આવ્યો છે.
મેટ્રો સ્ટેશનો નજીક ‘ઝીરો પાર્કિંગ ઝોન’ નો કડક અમલ, નિયમ તોડનારા ૩,૪૦૦ થી વધુ લોક ઝપટે ચડ્યા
રાહદારીઓનો હક છીનવીને ફૂટપાથ પર બાઈક કે કાર પાર્ક કરનારા ૪,૩૭૦ બેજવાબદાર ચાલકો સામે પણ ફૂટપાથ પાર્કિંગ અંતર્ગત કાનૂની પગલાં લેવાયાં છે. આ આંકડાકીય માહિતી મુજબ, મુંબઈના વિવિધ મેટ્રો સ્ટેશનોની આસપાસ ટ્રાફિક મુક્ત અવરજવર માટે વિશેષ રૂપે જાહેર કરાયેલા નો-પાર્કિંગ એટલે કે ‘ઝીરો પાર્કિંગ ઝોન’ (Zero Parking Zones) માં વાહનો ઊભા રાખનારા ૩,૪૫૯ લોકોને પોલીસે કડક હાથે દંડ્યા છે. ટ્રાફિક વિભાગના વરિષ્ઠ અધિકારીઓએ સ્પષ્ટ કર્યું છે કે આગામી દિવસોમાં પણ આ ડ્રાઈવ વધુ આક્રમક રીતે ચાલુ રાખવામાં આવશે, જેથી મુંબઈના રસ્તાઓ વાહનવ્યવહાર માટે સુગમ બની રહે.
👉 આ સમાચાર વાચો:
Mumbai Cyber Fraud। ફ્રીમાં ફિલ્મો જોવાની લાલચ મોંઘી પડી મોબાઈલ એપ ડાઉનલોડ કરતાં જ પરિણીતાના ૩.૨૫ લાખ સાફ
