News Continuous Bureau | Mumbai
આર્થિક નગરી મુંબઈમાં ધાર્મિક કાર્યો અને દાનના નામે લોકોની શ્રદ્ધા સાથે ખીલવાડ કરી કિંમતી ઘરેણાંની ચોરી કરતી ટોળકીના એક સક્રિય સભ્યને અંધેરી પોલીસે ઝડપી પાડ્યો છે. આરોપીની ધરપકડથી મુંબઈના વિવિધ પોલીસ સ્ટેશનોમાં નોંધાયેલા અનેક જૂના અને વણઉકેલ્યા કેસો પરથી પડદો ઊંચકાયો છે. આ ઠગ મુખ્યત્વે સોનાના દાગીના પહેરેલા નિર્દોષ લોકોને નિશાન બનાવતો હતો. આરોપીની ગુના કરવાની પદ્ધતિ અત્યંત ચાલાકીભરી હતી. તે પોતાની ઓળખ નવા સોનાના વેપારી તરીકે આપતો અને દાવો કરતો કે તેણે નવો બિઝનેસ શરૂ કર્યો હોવાથી તે મંદિર કે મસ્જિદમાં દાન કરવા માંગે છે. વિશ્વાસ જીતવા માટે તે ફરિયાદીને રોકડ રકમ બતાવતો અને શુકન તરીકે ફરિયાદીની સોનાની ચેનને નોટોમાં વીંટાળવાનું નાટક કરી નજર ચૂકવી અસલી ચેન સેરવી લેતો હતો.
મુંબઈના અનેક વિસ્તારોમાં હતો આતંક
અંધેરી પોલીસની તપાસમાં બહાર આવ્યું છે કે આ આરોપીએ મુંબઈના પશ્ચિમ ઉપનગરો જેવા કે અંધેરી, વિલેપાર્લે, જોગેશ્વરી, વર્સોવા, દિંડોશી અને દહિસર માં અનેક લોકોને લૂંટ્યા છે. એટલું જ નહીં, પૂર્વીય વિસ્તારોમાં ટ્રોમ્બે અને MIDC પોલીસ સ્ટેશનની હદમાં પણ તેણે છેતરપિંડીના અનેક ગુનાઓ આચર્યા હતા. તાજેતરમાં એક તોલાની સોનાની ચેન ગુમાવનાર વ્યક્તિની ફરિયાદ બાદ પોલીસે તપાસ તેજ કરી હતી.
આ સમાચાર પણ વાંચો : Mumbai Police Recruitment Scam: મુંબઈ પોલીસ ભરતીમાં હાઈટેક ચોરી: દોડની કસોટીમાં ઈલેક્ટ્રોનિક ચિપ સાથે ચેડાં કરનારા ૪ ઉમેદવારો વિરુદ્ધ FIR.
ગુજરાત અને તેલંગણામાં પણ નોંધાયેલા છે ગુના
ઝડપાયેલો આરોપી માત્ર મહારાષ્ટ્ર પૂરતો મર્યાદિત નહોતો. પોલીસ રેકોર્ડ મુજબ તેની સામે તેલંગણા ના પહાડી શરીફ અને ગુજરાત ના સુરત (મહિધરપુરા અને DCB સ્ટેશન) માં પણ ગુના નોંધાયેલા છે. આ ઉપરાંત મહારાષ્ટ્રના રાયગઢ, જળગાંવ અને ભુસાવળ રેલવે પોલીસ સ્ટેશનમાં પણ તેની વિરુદ્ધ ૨૦થી વધુ કેસ નોંધાયેલા છે. અંધેરી પોલીસની ડિટેક્શન ટીમે ટેકનિકલ સર્વેલન્સના આધારે તેને કલ્યાણમાંથી ઝડપી પાડ્યો છે.
ચોરીના દાગીના હસ્તગત અને વધુ તપાસ
હાલમાં આરોપી જેલના સળિયા પાછળ છે અને પોલીસે તેની પાસેથી ચોરી કરેલા સોનાના દાગીના પણ હસ્તગત કર્યા છે. પોલીસ હવે એ તપાસ કરી રહી છે કે આ ટોળકીમાં અન્ય કેટલા સભ્યો સામેલ છે અને તેમણે ચોરીનું સોનું કોને વેચ્યું હતું. આ કાર્યવાહીથી મુંબઈમાં વર્ષોથી વણઉકેલાયેલા છેતરપિંડીના અનેક કેસોનો સફળતાપૂર્વક નિકાલ આવ્યો છે.
