News Continuous Bureau | Mumbai
Veterinary Hospital Malad મુંબઈના પાલતુ અને ભટકતા કૂતરાઓ, ઢોર, પ્રાણીઓ અને પક્ષીઓની આધુનિક સારવાર કરવાના હેતુથી, મુંબઈ મહાનગરપાલિકા દ્વારા માલાડમાં ૧૦૦ બેડની પશુચિકિત્સાલયની સ્થાપના કરવામાં આવશે. મુંબઈ મહાનગરપાલિકા અને શ્રીમદ રાજચંદ્ર જીવદયા ટ્રસ્ટના સંયુક્ત ઉપક્રમે જાહેર-ખાનગી ભાગીદારી ધોરણે આ પશુચિકિત્સાલયનું નિર્માણ થશે અને આગામી બે વર્ષમાં તે કાર્યરત થશે. આ હોસ્પિટલનું ભૂમિપૂજન મુખ્યમંત્રી દેવેન્દ્ર ફડણવીસના હસ્તે મંગળવારે કરવામાં આવ્યું હતું.
આધુનિક સારવારની સુવિધા મળશે
પશુ કલ્યાણના ઉદ્દેશ્યથી, મહાનગરપાલિકાના કમિશનર ભૂષણ ગાગરાણીના નિર્દેશન હેઠળ આ પ્રોજેક્ટ હાથ ધરવામાં આવ્યો છે. આ હોસ્પિટલમાં શહેર અને ઉપનગરના પાલતુ અને ભટકતા પ્રાણીઓ, પક્ષીઓ અને ઢોર માટે આધુનિક સારવારની સુવિધા ઉપલબ્ધ થશે. પશુચિકિત્સા વિભાગના વડા ડૉ. કલીમપાશા પઠાણે જણાવ્યું કે, માલાડમાં ૨,૨૪૦ ચોરસ મીટર જમીન પર બનનારી આ હોસ્પિટલમાં અદ્યતન સુવિધાઓ હશે.
હોસ્પિટલ માં ઉપલબ્ધ સુવિધાઓ
આ હોસ્પિટલમાં કુલ ૧૦૦ બેડ, અદ્યતન રોગ નિદાન માટે એક્સ-રે, એમઆરઆઈ, અદ્યતન સર્જરી અને સઘન સંભાળ વિભાગ, અને નાના પ્રાણીઓ માટે ખાસ સારવાર સુવિધાનો સમાવેશ થશે. અહીં ભટકતા પ્રાણીઓનું પાલન અને સંભાળ પણ રાખવામાં આવશે, જેમને પશુચિકિત્સા કચેરી હેઠળ પકડવામાં આવ્યા છે. વધુમાં, નાના પ્રાણીઓ માટે અંતિમ સંસ્કાર ભઠ્ઠી પણ અહીં કાર્યરત રહેશે.
આ સમાચાર પણ વાંચો : Kuno National Park ભારતમાં જન્મેલા ચિત્તા ના બચ્ચા એ કર્યું એવું કામ કે આફ્રિકન નિષ્ણાતો થયા આશ્ચર્યચકિત, જાણો વિગતે
પશુચિકિત્સકો માટે તાલીમ કેન્દ્ર
આરોગ્ય સારવાર અને સુવિધાઓની સાથે, હોસ્પિટલ પરિસરમાં પશુચિકિત્સકો માટે કૌશલ્ય વિકાસ કેન્દ્ર અને તાલીમ વિભાગ પણ હશે. ડૉ. પઠાણે જણાવ્યું કે, પશુચિકિત્સકો અને અન્ય કર્મચારીઓ માટે રહેવાની સુવિધા પણ આ સ્થળે ઉપલબ્ધ રહેશે.
