News Continuous Bureau | Mumbai
New Panvel નવી મુંબઈના ન્યુ પનવેલ વિસ્તારમાં આવેલી એક હાઉસિંગ સોસાયટીમાં પુનઃવિકાસ ના મુદ્દે યોજાયેલી મીટિંગ હિંસક બની હોવાની ચોંકાવનારી ઘટના સામે આવી છે. સેક્ટર-૧૪ માં આવેલી સિડકો કોલોનીની સોસાયટીમાં રિડેવલપમેન્ટની શરતો અંગે ચાલી રહેલી ચર્ચા દરમિયાન બહારના અજાણ્યા વ્યક્તિઓએ ધસી આવી રહીશો પર હુમલો કર્યો હતો. આ હુમલાને કારણે અનેક રહીશોમાં ફાળ પડી છે અને સમગ્ર સોસાયટી પરિસરમાં તણાવપૂર્ણ શાંતિ જોવા મળી રહી છે.ઘટનાની વિગત મુજબ, ન્યુ પનવેલ સેક્ટર-૧૪ ની સિડકો કોલોનીમાં સોસાયટીના પુનઃવિકાસ માટેની શરતો અને કરાર અંગે રહીશોની એક મહત્વની મીટિંગ બોલાવવામાં આવી હતી. આ ચર્ચા દરમિયાન સોસાયટીના સભ્યો વચ્ચે આંતરિક મતભેદોને કારણે ઉગ્ર બોલાચાલી થઈ હતી. આરોપ છે કે, આ ગરમાગરમીનો લાભ ઉઠાવી કેટલાક ‘બહારના તત્વો’ સોસાયટીના પરિસરમાં ઘૂસી આવ્યા હતા અને તેમણે રહેવાસીઓ સાથે મારપીટ શરૂ કરી દીધી હતી.
આંતરિક મતભેદમાં બહારના શખ્સોની એન્ટ્રીથી મામલો બિચક્યો
સ્થાનિક રહીશોના જણાવ્યા અનુસાર, રિડેવલપમેન્ટના કરારમાં કેટલીક શરતોને લઈને રહીશો વચ્ચે અસંતોષ હતો. મીટિંગમાં જ્યારે આ મુદ્દે દલીલો ચાલતી હતી ત્યારે અચાનક બહારથી આવેલા વ્યક્તિઓ એ હુમલો કરી દીધો હતો. હુમલાખોરો કોણ હતા અને તેમને કોણે બોલાવ્યા હતા તે હજુ સુધી સ્પષ્ટ થયું નથી. આ હુમલામાં કેટલાક રહીશોને સામાન્ય ઈજાઓ પણ પહોંચી હોવાના અહેવાલ છે.
પોલીસે સીસીટીવી (CCTV) અને મોબાઈલ વીડિયો કબજે કર્યા
આ ઘટના બાદ રોષે ભરાયેલા રહીશોએ પનવેલ શહેર પોલીસ સ્ટેશનનો સંપર્ક સાધી ફરિયાદ નોંધાવવાની પ્રક્રિયા હાથ ધરી છે. પોલીસે આ મામલે ગંભીરતા દાખવી સોસાયટીના સીસીટીવી (CCTV) ફૂટેજ અને રહીશો દ્વારા ઉતારવામાં આવેલા મોબાઈલ વીડિયો કબજે કર્યા છે. આ પુરાવાઓના આધારે બહારથી આવેલા વ્યક્તિઓની ઓળખ કરી તેમની વિરુદ્ધ કડક કાર્યવાહી કરવાની ખાતરી પોલીસે આપી છે.
આ સમાચાર પણ વાંચો : Pune Investment Fraud: પુણેમાં રોકાણકારો સાથે ₹4 કરોડની છેતરપિંડી: શેરબજાર અને ભિશીના નામે ઊંચા વળતરની લાલચ આપી એક મહિલા સહિત 4 સામે ગુનો દાખલ
રિડેવલપમેન્ટ પ્રોજેક્ટ્સમાં પારદર્શિતા લાવવા રહીશોની માંગ
આ હિંસક ઘટના બાદ ન્યુ પનવેલના અન્ય રિડેવલપમેન્ટ પ્રોજેક્ટ્સમાં પણ સુરક્ષા અને પારદર્શિતા અંગે સવાલો ઉઠી રહ્યા છે. રહીશોએ માંગ કરી છે કે રિડેવલપમેન્ટની મીટિંગો પોલીસ પ્રોટેક્શનહેઠળ અથવા સત્તાવાર સરકારી અધિકારીઓની હાજરીમાં યોજવી જોઈએ જેથી કરીને કોઈ અસામાજિક તત્વો રહીશોને ડરાવી-ધમકાવી ન શકે. પનવેલ પોલીસ હવે આ હુમલા પાછળ કોઈ બિલ્ડર કે લોબીનો હાથ છે કે કેમ તે દિશામાં પણ તપાસ કરી રહી છે.
