News Continuous Bureau | Mumbai
Sanjay Raut vs Election Commission: મહારાષ્ટ્રમાં આવતીકાલે મતદાન થવાનું છે, ત્યારે પ્રચારના અંતિમ પડાવમાં રાજકારણ ગરમાયું છે. શિવસેના (UBT) ના સાંસદ સંજય રાઉતે ચૂંટણી પંચના એક નિર્ણય પર આકરા પ્રહારો કર્યા છે. પંચે મતદાનના આગલા દિવસે એટલે કે આજે રાત્રે 10 વાગ્યા સુધી ઘરે-ઘરે જઈને પ્રચાર કરવાની છૂટ આપી છે. રાઉતનો આરોપ છે કે ચૂંટણી પંચે આ નિર્ણય સત્તાધારી પક્ષને પૈસા વહેંચવામાં મદદ કરવા માટે લીધો છે. સંજય રાઉતે કટાક્ષ કરતા જણાવ્યું કે, ચૂંટણી પંચે સત્તાધારીઓને મકર સંક્રાંતિનો અલગ જ તિલગુળ આપ્યો છે. સામાન્ય રીતે પ્રચાર પૂરો થયા બાદ બહારની વ્યક્તિઓ કે જૂથમાં પ્રચાર પર પ્રતિબંધ હોય છે, પરંતુ આ વખતે નિયમોમાં છૂટછાટ આપીને ભ્રષ્ટાચારને પ્રોત્સાહન આપવામાં આવી રહ્યું હોવાનો દાવો તેમણે કર્યો છે. તેમણે કહ્યું કે ભાજપ અને શિંદે સેના પૈસા અને હિન્દુ-મુસ્લિમના મુદ્દા વગર ચૂંટણી જીતી શકે તેમ નથી.
‘જ્યાં દેખાય ત્યાં ઠોકો’ – ઠાકરે બંધુઓનો કાર્યકર્તાઓને આદેશ
સંજય રાઉતે જણાવ્યું હતું કે સત્તાના દુરુપયોગ અને પૈસાના જોરે ચૂંટણી જીતવાના પ્રયાસો થઈ રહ્યા છે. આ પરિસ્થિતિને જોતા ઉદ્ધવ ઠાકરે અને રાજ ઠાકરે બંનેએ પોતાના કાર્યકર્તાઓને સ્પષ્ટ આદેશ આપ્યો છે કે જો કોઈ પૈસા વહેંચતા પકડાય તો તેને ત્યાં જ પાઠ ભણાવવો. રાઉતે કહ્યું કે, “જ્યાં દેખાય ત્યાં ઠોકવાનો આદેશ આપવામાં આવ્યો છે.” રાજ્યના અનેક વિસ્તારોમાં પૈસા વહેંચતા કાર્યકર્તાઓ વચ્ચે ઘર્ષણના બનાવો પણ સામે આવ્યા છે.
આ સમાચાર પણ વાંચો : Makar Sankranti 2026: મકર સંક્રાંતિ પર સર્જાયો અદ્ભુત ‘વૃદ્ધિ યોગ’; આ 3 રાશિના જાતકોના બેંક બેલેન્સમાં થશે જંગી વધારો, લક્ષ્મીજી થશે પ્રસન્ન.
ચૂંટણી પંચે ‘લક્ષ્મી દર્શન’ માટે આજનો દિવસ દાનમાં આપ્યો
રાઉતે આરોપ લગાવ્યો કે પ્રચારની સમયમર્યાદા પૂરી થઈ ગઈ હોવા છતાં ડોર-ટુ-ડોર પ્રચારની મંજૂરી આપવી એ લોકશાહીની મજાક છે. તેમણે આક્ષેપ કર્યો કે આ પરવાનગી પાછળનો હેતુ મતદારોને ખરીદવા માટે ‘લક્ષ્મી દર્શન’ (Money Distribution) કરવાનો છે. ચૂંટણી પંચ સત્તાધારીઓના દબાણમાં કામ કરી રહ્યું હોવાનો ગંભીર આક્ષેપ પણ તેમણે કર્યો હતો. તેમણે કહ્યું કે જનતા બધું જોઈ રહી છે અને બેલેટ બોક્સ (Ballot Box) માં તેનો જવાબ આપશે.
અજિત પવારને પડકાર અને સિંચાઈ કૌભાંડનું તોફાન
બીજી તરફ, રાજ્યમાં ફરી એકવાર સિંચાઈ કૌભાંડના (Irrigation Scam) મુદ્દે રાજકારણ તેજ બન્યું છે. અજિત પવારે યુતિ સરકાર પર કરેલા નિવેદન અંગે રાઉતે કહ્યું કે, અજિત પવારે કોયડામાં વાત કરવાને બદલે સીધા નામ લેવા જોઈએ. જો તેઓ નામ જાહેર નથી કરતા તો તે એક પ્રકારનું ‘બ્લેકમેલિંગ’ (Blackmailing) છે. તેમણે ગણેશ નાઈક અને શિંદેના જેલ જવાના મુદ્દે પણ ખુલાસો કરવાની માંગ કરી હતી.
