News Continuous Bureau | Mumbai
Chembur News। મુંબઈના ચેમ્બુર વિસ્તારમાં આવેલી નવજીવન સોસાયટી પાસે માનવતાને શરમાવે તેવી ઘટના સામે આવી છે. અહીં કચરાના ઢગલામાંથી એક નવજાત શિશુનો મૃતદેહ મળી આવતા સમગ્ર વિસ્તારમાં ચકચાર મચી ગઈ છે. આ હૃદયદ્રાવક દ્રશ્ય જોઈને સ્થાનિક રહીશોમાં ભારે આઘાત અને રોષની લાગણી જોવા મળી રહી છે. પોલીસે ઘટનાસ્થળે પહોંચી તપાસના ચક્રો ગતિમાન કર્યા છે.
કચરાના ઢગલામાં માસૂમનો દેહ
મળતી માહિતી મુજબ, નવજીવન સોસાયટી નજીક કચરો ફેંકવાની જગ્યાએ સ્થાનિકોને એક નવજાત શિશુનો દેહ જોવા મળ્યો હતો. આ જોતા જ લોકોના શ્વાસ અધ્ધર થઈ ગયા હતા અને તુરંત આ અંગેની જાણ પોલીસને કરવામાં આવી હતી. માહિતી મળતા જ પોલીસ કાફલો ઘટનાસ્થળે દોડી ગયો હતો અને પંચનામું કરી તપાસ હાથ ધરી હતી. આ માસૂમ શિશુને કોણ અને કયા સંજોગોમાં અહીં છોડી ગયું તે મોટો પ્રશ્ન છે.
ફોરેન્સિક ટીમ દ્વારા ઝીણવટભરી તપાસ
ઘટનાની ગંભીરતાને ધ્યાનમાં રાખીને ફોરેન્સિક ટીમને પણ સ્થળ પર બોલાવવામાં આવી હતી. ફોરેન્સિક નિષ્ણાતોએ પુરાવા એકત્ર કરવા માટે વિસ્તારની ઝીણવટભરી તપાસ કરી છે. ત્યારબાદ કાયદાકીય પ્રક્રિયા પૂરી કરી શિશુના મૃતદેહને પોસ્ટમોર્ટમ માટે હોસ્પિટલ ખસેડવામાં આવ્યો છે. પોસ્ટમોર્ટમ રિપોર્ટ આવ્યા બાદ જ બાળકના મોતનું સાચું કારણ અને સમય જાણી શકાશે.
સીસીટીવી ફૂટેજ અને હોસ્પિટલ ડેટા પર પોલીસની નજર
પોલીસે આ મામલે અજાણ્યા શખ્સો વિરુદ્ધ ગંભીર કલમો હેઠળ ગુનો નોંધ્યો છે. પોલીસ હાલ આસપાસના વિસ્તારના સીસીટીવી ફૂટેજ તપાસી રહી છે જેથી જાણી શકાય કે આ માસૂમને કચરામાં ફેંકી જનાર વ્યક્તિ કોણ હતી. આ ઉપરાંત, નજીકની હોસ્પિટલો અને પ્રસૂતિ ગૃહોમાંથી પણ છેલ્લા થોડા દિવસોમાં થયેલા જન્મના ડેટા એકત્ર કરવામાં આવી રહ્યા છે. પોલીસને આશંકા છે કે કોઈ નજીકના વિસ્તારમાંથી જ આ કૃત્ય કરવામાં આવ્યું હોઈ શકે છે.
👉 આ સમાચાર વાચો:
Mira Bhayandar। મીરાભાયંદરમાં રિક્ષાચાલકની અદ્ભુત પ્રામાણિકતા 15 લાખના દાગીના ભરેલી બેગ મૂળ માલિકને પરત કરી જીત્યા દિલ!
