News Continuous Bureau | Mumbai
Railway Police Recruitment Death Mumbai મુંબઈમાં ચાલી રહેલી રેલવે પોલીસ ભરતી પ્રક્રિયામાં એક અત્યંત કરુણ ઘટના સામે આવી છે. બુલઢાણા જિલ્લામાંથી પોલીસ બનવાનું સપનું લઈને આવેલા ૩૦ વર્ષીય ઉમેદવારનું શારીરિક કસોટી દરમિયાન મોત નિપજ્યું છે. ૧,૬૦૦ મીટરની દોડ સફળતાપૂર્વક પૂર્ણ કર્યાના ગણતરીની મિનિટોમાં જ યુવાન બેભાન થઈને મેદાન પર ઢળી પડ્યો હતો, જેને હોસ્પિટલ લઈ જતાં તબીબોએ મૃત જાહેર કર્યો હતો.ઘટનાની વિગત મુજબ, ઘાટકોપર (પૂર્વ) સ્થિત રેલવે પોલીસ ગ્રાઉન્ડ પર શારીરિક કસોટી ચાલી રહી હતી. મૃતક યુવાન અગાઉ બે વખત ભરતીમાં નિષ્ફળ રહ્યો હતો, તેથી આ વખતે તે પૂરા જોશ અને મહેનત સાથે મેદાનમાં ઉતર્યો હતો. તેણે નિર્ધારિત ૧,૬૦૦ મીટરની દોડ સમયસર પૂર્ણ પણ કરી લીધી હતી. જોકે, દોડ પૂરી કર્યા બાદ જ્યારે તે આરામ કરવા બેઠો ત્યારે તેને અચાનક ચક્કર આવ્યા હતા અને તે બેભાન થઈ ગયો હતો.
હૃદયરોગના હુમલાની આશંકા
મેદાન પર હાજર પોલીસ અધિકારીઓ અને અન્ય ઉમેદવારો તેને તાત્કાલિક ઘાટકોપરની રાજાવાડી હોસ્પિટલ લઈ ગયા હતા. જોકે, ડોક્ટરોએ તેને તપાસ્યા બાદ મૃત જાહેર કર્યો હતો. પ્રાથમિક અંદાજ મુજબ, અતિશય શારીરિક શ્રમને કારણે હૃદય રોગનો હુમલો (Cardiac Arrest) આવ્યો હોવાની આશંકા સેવાઈ રહી છે. જોકે, મૃત્યુનું સચોટ કારણ પોસ્ટમોર્ટમ રિપોર્ટ આવ્યા બાદ જ સ્પષ્ટ થશે.
આ સમાચાર પણ વાંચો : Janvi Mistry Death Case Mumbai: જાનવી મિસ્ત્રી ડેથ કેસમાં મોટો ચુકાદો: બેદરકાર ઘોડા ચાલકને ૨ વર્ષની જેલની સજા; લાયસન્સ વગરની પ્રવૃત્તિઓ પર કોર્ટની લાલબત્તી.
પંત નગર પોલીસ દ્વારા તપાસ શરૂ
પંત નગર પોલીસે આ મામલે હાલ પૂરતો અકસ્માત મોત (ADR) નો ગુનો નોંધી વધુ તપાસ હાથ ધરી છે. પોલીસે યુવાનના પરિવારને આ દુઃખદ સમાચારની જાણ કરી છે. પોલીસ અધિકારીઓના જણાવ્યા મુજબ, ભરતીના મેદાન પર એમ્બ્યુલન્સ અને તબીબી સુવિધાઓ હાજર હતી, પરંતુ યુવાનને બચાવી શકાયો નહોતો. આ ઘટનાથી ભરતી આપવા આવેલા અન્ય યુવાનોમાં ભારે શોક અને ફફડાટ જોવા મળ્યો હતો.
