News Continuous Bureau | Mumbai
Vile Parle Cyber Fraud: માયાનગરી મુંબઈમાં સાયબર ગુનેગારો હવે ‘કોન બનેગા કરોડપતિ’ (KBC) જેવા લોકપ્રિય શોના નામે નિર્દોષ લોકોને નિશાન બનાવી રહ્યા છે. પશ્ચિમ ઉપનગર વિલે પાર્લેમાં રહેતી એક ૪૭ વર્ષીય મહિલાને લોટરીમાં આલીશાન કાર અને લાખોની રોકડ જીત્યા હોવાનું કહી ઠગબાજોએ ₹૧,૧૨,૬૫૦ પડાવી લીધા છે. મહિલાને જ્યારે છેતરપિંડીનો અહેસાસ થયો ત્યારે તેણે વિલે પાર્લે પોલીસ સ્ટેશનમાં ફરિયાદ નોંધાવી છે.
ફેસબુક ક્વિઝ અને નકલી ઈનામની લાલચ
ઘટનાની વિગતો મુજબ, મહિલાએ ફેસબુક પર એક પેજ જોયું હતું જેમાં પ્રશ્નોના જવાબ આપીને ઈનામ જીતવાનો દાવો કરાયો હતો. બે દિવસ સુધી આ નકલી ક્વિઝમાં ભાગ લીધા બાદ મહિલાને અજાણ્યા નંબર પરથી ફોન આવ્યો કે તેણે એક લક્ઝરી કાર અને ₹૮.૫ લાખની રોકડ જીતી લીધી છે. ઠગબાજોએ વિશ્વાસ જીતવા માટે વોટ્સએપ પર નીચે મુજબના નકલી દસ્તાવેજો મોકલ્યા હતા:
લક્ઝરી કારના ફોટા.
બેંકના નકલી ચેક અને વિજેતા હોવાનું પ્રમાણપત્ર.
વિશ્વાસ જીતવા માટે ગુનેગારોના નકલી આધાર કાર્ડ અને પાન કાર્ડ.
આ સમાચાર પણ વાંચો : ISRO Income Tax:ટેક્સ ચોરો પર હવે આકાશમાંથી નજર: ISRO ના સેટેલાઈટ પકડશે ખેતીના નામે ‘કાળા ખેલ’
ટેક્સ અને પ્રોસેસિંગ ફીના નામે ઉઘાડી લૂંટ
મહિલા આ લાલચમાં આવી જતાં ઠગબાજોએ તેને ઈનામની રકમ રિલીઝ કરવા માટે અલગ-અલગ બહાના હેઠળ પૈસા મંગાવવાનું શરૂ કર્યું. પ્રોસેસિંગ ફી, TDS (ટેક્સ) અને GST ભરવાના નામે મહિલા પાસેથી કટકે-કટકે કુલ ₹૧.૧૨ લાખથી વધુની રકમ UPI દ્વારા ટ્રાન્સફર કરાવી લીધી હતી. જ્યારે મહિલાએ તેના પતિને આ વિશે જણાવ્યું, ત્યારે તેમને તુરંત અહેસાસ થયો કે આ એક સાયબર ફ્રોડ (Cyber Fraud) છે અને તેમણે પોલીસનો સંપર્ક કર્યો હતો.
પોલીસ તપાસ અને કાયદાકીય કાર્યવાહી
વિલે પાર્લે પોલીસે આ મામલે ભારતીય ન્યાય સંહિતા (BNS) ની કલમ ૩૧૮(૪) (છેતરપિંડી) અને આઈટી એક્ટની કલમ ૬૬(C) તથા ૬૬(D) હેઠળ ગુનો નોંધ્યો છે. પોલીસ હાલમાં જે મોબાઈલ નંબરો પરથી ફોન આવ્યા હતા તેનું લોકેશન ટ્રેસ કરી રહી છે.જે UPI આઈડી પર પૈસા ટ્રાન્સફર થયા છે તે બેંક ખાતાઓની વિગતો મેળવી રહી છે.પોલીસે નાગરિકોને અપીલ કરી છે કે કોઈપણ અજાણી લોટરી કે KBC ના નામે આવતા ફોન પર વિશ્વાસ ન કરવો અને કોઈને પણ ઓનલાઈન પૈસા ટ્રાન્સફર ન કરવા.
