News Continuous Bureau | Mumbai
Air India આ વર્ષે જૂનમાં અમદાવાદથી બ્રિટનના લંડન જઈ રહેલું એર ઇન્ડિયાનું વિમાન ટેકઓફ કર્યાના ગણતરીની સેકન્ડોમાં જ ક્રેશ થઈ ગયું હતું. આ ઘટના બાદ દુર્ઘટના પાછળ અનેક કારણોની ચર્ચા શરૂ થઈ ગઈ હતી, જેમાં બોઇંગ કંપનીના વિમાનોના ખરાબ રેકોર્ડથી લઈને પાઇલટની ભૂલો સુધીના અનેક દાવાઓ કરવામાં આવ્યા હતા. ભારતના એરક્રાફ્ટ એક્સિડન્ટ ઇન્વેસ્ટિગેશન બ્યુરો (AAIB)ના પ્રારંભિક તપાસ રિપોર્ટે આ દુર્ઘટનાના કારણો અંગે વધુ મૂંઝવણ ઊભી કરી હતી. હવે, આ દુર્ઘટનામાં પોતાના સ્વજનોને ગુમાવનારા પરિવારો વતી કેસ લડી રહેલા એક વકીલે ઘટના પાછળ એક એવો દાવો કર્યો છે, જેનાથી એક નવો ખુલાસો સામે આવ્યો છે.
દુર્ઘટનાનો શિકાર થયેલા મુસાફરોના વકીલના દાવા શું છે?
મૃત મુસાફરોના પરિવાર વતી બોઇંગ કંપની સામે કેસ લડી રહેલા વકીલ માઇક એન્ડ્રુસે તે તમામ દાવાઓને નકારી કાઢ્યા છે, જેમાં પાઇલટોએ જાણીજોઈને કે ભૂલથી ઇંધણનો પુરવઠો બંધ કરી દીધો હોવાનું કહેવામાં આવ્યું હતું. તેમણે એક ઇન્ટરવ્યુમાં જણાવ્યું કે, “પાઇલટે કોઈ ભૂલ કરી હોય કે જાણીજોઈને વિમાનને ક્રેશ કર્યું હોય તેવા દાવાઓને કોઈ પુરાવા સમર્થન આપતા નથી અને તે મૃતકો સાથે અન્યાય પણ છે.” અત્રે ઉલ્લેખનીય છે કે, દુર્ઘટનાના લગભગ એક મહિના પછી, ભારતીય તપાસ એજન્સીએ પ્રારંભિક રિપોર્ટ બહાર પાડ્યો હતો, જેમાં પાયલોટ વચ્ચેની વાતચીતનો ખુલાસો થયો હતો. રિપોર્ટમાં જણાવાયું હતું કે વિમાનના બંને એન્જિન ટેકઓફના થોડા સમય બાદ જ બંધ થઈ ગયા કારણ કે ઇંધણનો પુરવઠો અટકી ગયો હતો. બ્લેક બોક્સની તપાસમાં જાણવા મળ્યું કે એક પાઇલટે બીજાને પૂછ્યું હતું કે તેણે ઇંધણનો સ્વિચ કેમ બંધ કર્યો? જેના જવાબમાં બીજા પાઇલટે કહ્યું કે તેણે આવું કર્યું નથી. તપાસમાં જાણવા મળ્યું કે ઉડાન ભર્યા પછી તરત જ ઇંધણના સ્વિચ કટઓફ થઈ ગયા હતા, જેને દુર્ઘટનાનું મુખ્ય કારણ માનવામાં આવી રહ્યું છે.
તો દુર્ઘટનાનું કારણ શું હોઈ શકે?
વકીલ માઇક એન્ડ્રુસના જણાવ્યા અનુસાર, બોઇંગનું વિમાન પહેલેથી જ કેટલીક સમસ્યાઓથી પીડાઈ રહ્યું હતું, ખાસ કરીને તેની પાણી સ્ટોર કરવાની સિસ્ટમને લઈને. તેમણે કહ્યું કે આ સિસ્ટમ વિમાનના અત્યંત સંવેદનશીલ ઇલેક્ટ્રોનિક્સની ખૂબ નજીક છે. બોઇંગ અને અમેરિકાના ફેડરલ એવિએશન એડમિનિસ્ટ્રેશન (FAA) દ્વારા ભૂતકાળમાં પાણી લીક થવા અંગેની ચેતવણીઓ જારી કરવામાં આવી હતી.એન્ડ્રુસે અમેરિકાના FAAના નિર્દેશોનો ઉલ્લેખ કરતા કહ્યું કે, બોઇંગ-787 વિમાનોમાં ઇલેક્ટ્રોનિક સાધનોના રૂમમાં પાણી લીક થવાના કિસ્સાઓ સામે આવ્યા છે. આ રૂમ પાઇલટના કેબિનની બરાબર નીચે હોય છે અને તેમાં વિમાનના ડિજિટલ એન્જિન કંટ્રોલ (જેને ફડેક કહેવાય છે) સહિતના તમામ મહત્વપૂર્ણ સાધનો હોય છે. સીધા શબ્દોમાં કહીએ તો, ફડેક કોઈપણ વિમાનના મગજ સમાન છે, જે એન્જિનના તમામ કાર્યોનું નિયંત્રણ કરે છે. એન્ડ્રુસે દાવો કર્યો કે પાણીનું લીકેજ ફડેકને નુકસાન પહોંચાડી શકે છે, જેના કારણે એન્જિન એકસાથે બંધ થઈ જાય છે. તેમણે કહ્યું કે FAAએ ક્રેશના થોડા અઠવાડિયા પહેલા જ આ જોખમ અંગે ચેતવણી આપી હતી.
આ સમાચાર પણ વાંચો : Mumbai Monorail: મુંબઈમાં મોનોરેલ ફરી એકવાર પડી બંધ, એક જ મહિના માં આવી ત્રીજી વખત ખામી, જાણો કેવી રીતે મુસાફરોને બહાર કાઢવામાં આવ્યા
વકીલે તેમના દાવાઓને સમર્થન આપવા કયા પુરાવા રજૂ કર્યા?
એન્ડ્રુસે તેમના દાવાઓને સમર્થન આપતા જણાવ્યું કે, 14 મે 2025ના રોજ અમેરિકન ઉડ્ડયન નિયમનકારે એક આદેશ જારી કર્યો હતો. આ આદેશમાં જણાવાયું હતું કે વિમાનના પાણી સ્ટોર કરવાની સિસ્ટમમાં યોગ્ય રીતે ફિટ ન થયેલા કપ્લિંગને કારણે પાણી લીક થવાના કિસ્સા સામે આવ્યા છે. FAAએ ચેતવણી આપી હતી કે આ પ્રકારનું લીકેજ ફડેકને નુકસાન પહોંચાડી શકે છે, જેનાથી ઇલેક્ટ્રિકલ શોર્ટ સર્કિટ થવાની સંભાવના વધી જાય છે.આ ઉપરાંત, આ દુર્ઘટનામાં જીવતા બચી ગયેલા એકમાત્ર બ્રિટિશ નાગરિક વિશ્વાસકુમાર રમેશે એક ઇન્ટરવ્યુમાં જણાવ્યું હતું કે વિમાનના ટેકઓફના પાંચથી દસ સેકન્ડમાં જ અંદરની લાઇટો ઝબકવા લાગી હતી અને વારાફરતી લીલી અને સફેદ થઈ રહી હતી. આ ઘટના પણ પાણી લીક થવાથી ઇલેક્ટ્રિકલ સિસ્ટમમાં થયેલી ખરાબીના દાવાને સમર્થન આપે છે.
