News Continuous Bureau | Mumbai
Namo Bharat Train ભારતીય રેલ્વે પોતાના મુસાફરોને અત્યાધુનિક સુવિધાઓ આપવાની સાથે હવે મનોરંજન અને ખાસ પળોને યાદગાર બનાવવાની તક પણ આપી રહી છે. નેશનલ કેપિટલ રિજન ટ્રાન્સપોર્ટ કોર્પોરેશન (NCRTC) એ નમો ભારત ટ્રેનમાં જન્મદિવસની ઉજવણી, પ્રી-વેડિંગ શૂટ અને અન્ય ખાનગી ઈવેન્ટ્સ માટે નવી પોલિસી જાહેર કરી છે. આ સુવિધા હેઠળ તમે ચાલતી ટ્રેન અથવા સ્ટેશન પર ઊભેલા કોચને ભાડે રાખી શકશો.
કેવી રીતે કરી શકાશે બુકિંગ?
નવી નીતિ મુજબ, કોઈ પણ વ્યક્તિ, ઈવેન્ટ પ્લાનર અથવા ફોટોગ્રાફી કંપની નમો ભારતનો કોચ બુક કરાવી શકે છે. દિલ્હી-મેરઠ કોરિડોર પર દોડતી આ ટ્રેનના ઈન્ટરનેશનલ ડિઝાઈનવાળા કોચ શૂટિંગ માટે આકર્ષક વાતાવરણ પૂરું પાડે છે. આ માટે દુહાઈ ડેપોમાં એક ‘મેક-અપ’ કોચ પણ ઉપલબ્ધ કરાવવામાં આવ્યો છે. આ સુવિધાનો મુખ્ય ઉદ્દેશ્ય લોકોને એક અનોખો અનુભવ આપવાનો છે.
શું છે ભાડું અને સમય મર્યાદા?
મીડિયા રિપોર્ટ મુજબ, નમો ભારત ટ્રેનમાં કોચ બુક કરવાનો ખર્ચ પ્રતિ કલાક 5,000 રૂપિયાથી શરૂ થાય છે. આમાં સજાવટ અથવા સાધનો ગોઠવવા અને હટાવવા માટે વધારાની 30 મિનિટનો સમય પણ આપવામાં આવશે. જોકે, આ માટેના નિયમો પણ કડક છે. કોઈપણ પ્રકારની ઉજવણી કે શૂટિંગ માત્ર સવારે 6 વાગ્યાથી રાત્રે 11 વાગ્યાની વચ્ચે જ કરી શકાશે, જેથી સામાન્ય મુસાફરોને કોઈ પણ પ્રકારની તકલીફ ન પડે અને ટ્રેન સંચાલનમાં અવરોધ ન આવે.
આ સમાચાર પણ વાંચો : Kishtwar Encounter: જમ્મુમાં ફરી સુરક્ષાબળોનો એક્શન મોડ! કિશ્તવાડમાં આતંકીઓ અને સેના વચ્ચે સામસામે ફાયરિંગ; ઘેરાયેલા આતંકીઓ પાસે મોટા પ્રમાણમાં હથિયારો હોવાની આશંકા
ફિલ્મી શૂટિંગ અને અન્ય સુવિધાઓ
રિપોર્ટ મુજબ, NCRTC એ માત્ર ખાનગી કાર્યક્રમો જ નહીં, પરંતુ ફિલ્મ શૂટિંગ, ડોક્યુમેન્ટ્રી અને જાહેરાતો માટે પણ સ્ટેશનો અને ટ્રેન ભાડે આપવાની વ્યાપક નીતિ તૈયાર કરી છે. આનંદ વિહાર, ગાઝિયાબાદ અને મેરઠ સાઉથ જેવા પ્રમુખ સ્ટેશનો આ માટે ઉપલબ્ધ રહેશે. આયોજકોને કોચમાં સામાન્ય સજાવટ કરવાની છૂટ છે, પરંતુ ટ્રેનના આંતરિક ભાગને નુકસાન પહોંચાડી શકાય નહીં. કાર્યક્રમ દરમિયાન સુરક્ષા અને વ્યવસ્થા જાળવવા માટે રેલ્વેના અધિકારીઓ હાજર રહેશે.
