ન્યુઝ કન્ટિન્યુઝ બ્યુરો
મુંબઈ, ૧3 જુલાઈ, ૨૦૨૧
મંગળવાર
નાસિક કરન્સી નોટ પ્રેસમાંથી પાંચ લાખ રૂપિયા ગાયબ થયા હોવાનો ચોંકાવનારો કિસ્સો પ્રકાશમાં આવ્યો છે. આ ઘટના બે સપ્તાહ પહેલાં બની હોવાનું અહેવાલો જણાવે છે. ચુસ્ત સુરક્ષા હોવા છતાં પાંચ લાખ રૂપિયા ગાયબ થઈ ગયા હોવાથી અધિકારીઓ પણ ચોંકી ગયા છે. સોમવારે પ્રેસના અધિકારીઓએ ફરિયાદ સાથે સંપર્ક કર્યા બાદ ઉપનગર પોલીસે તપાસ શરૂ કરી છે.
પંકજા મુંડે શાંત થઈ ગયાં,'અપને મુંહ મિયાં મીઠ્ઠુ' બન્યાં, કહ્યું: મોટા નેતા હંમેશાં ત્યાગ કરે છે
પોલીસે મીડિયાને જણાવ્યા અનુસાર પ્રેસ અધિકારીઓને તાજેતરમાં જ સમજાયું કે પાંચ લાખની કિંમતની ચલણી નોટો ચોરાઈ ગઈ છે. ૫૦૦ રૂપિયાની નોટના ૧૦ બંડલ ગુમ થયું હોવાનું અધિકારીઓને જણાતાં આંતરિક તપાસ હાથ ધરી હતી. ઉપનગર પોલીસ સ્ટેશનના ઇન્સ્પેક્ટર અનિલ શિંદેએ એક મીડિયા હાઉસને જણાવ્યું હતું કે અમે આ મામલે FIR નોંધવાની તૈયારીમાં છીએ અને તપાસ શરૂ થઈ ગઈ છે.
ઉલ્લેખનીય છે કે આ રીતે કરન્સી પ્રિન્ટિંગ પ્રેસમાંથી પૈસા ગુમ થયાની આ પહેલી ઘટના છે. નાસિક કરન્સી નોટ પ્રેસમાં સલામતીનું ઉચ્ચ સ્તર છે અને એથી નોટો ગુમ થયાની ઘટનાએ પ્રેસના અધિકારીઓને તેમ જ પોલીસને પણ હેરાન કરી દીધા છે.
