News Continuous Bureau | Mumbai

IndiGo Flight Operations: નાગરિક ઉડ્ડયન મહાનિર્દેશાલય (DGCA) એ ૨૯ માર્ચથી ૨૪ ઓક્ટોબર ૨૦૨૬ સુધીના સમયગાળા માટે ૯ શિડ્યુલ્ડ એરલાઇન કંપનીઓનું ડોમેસ્ટિક સમર ફ્લાઇટ શેડ્યૂલ જાહેર કર્યું છે. ગયા વર્ષે ડિસેમ્બરમાં ઈન્ડિગો એરલાઇન્સમાં સર્જાયેલી ગંભીર ઓપરેશનલ અવરોધો અને ફ્લાઈટ્સ કેન્સલેશનની ઘટનાઓને ધ્યાનમાં રાખીને, આ વખતે ઓથોરિટીએ સાવચેતીભર્યું વલણ અપનાવ્યું છે. સૂત્રોના જણાવ્યા અનુસાર, ગયા વર્ષની સરખામણીમાં ઈન્ડિગોના ફ્લાઇટ ઓપરેશન્સમાં લગભગ ૧૦ ટકાનો કાપ મૂકવામાં આવ્યો છે. નાગરિક ઉડ્ડયન મંત્રાલય અને DGCA નથી ઈચ્છતા કે ૨૦૨૫ના ડિસેમ્બર જેવી સ્થિતિ ફરીથી સર્જાય, જ્યાં હજારો મુસાફરોને હાલાકી ભોગવવી પડી હતી. આ વખતે એરલાઇન પાસે ઉપલબ્ધ વિમાનો, પાઇલટ્સ અને અન્ય સંસાધનોની ચકાસણી કર્યા બાદ જ શેડ્યૂલને મંજૂરી આપવામાં આવી છે.

સાપ્તાહિક ૨,૫૬૧ ફ્લાઈટ્સ ઘટશે

ડોમેસ્ટિક સમર ફ્લાઇટ શેડ્યૂલમાં ઈન્ડિગો ગયા વર્ષના સમાન સમયગાળાની સરખામણીમાં ઓછી ઉડાન ભરશે:
૨૦૨૫નું સમર શેડ્યૂલ: દર અઠવાડિયે ૨૫,૬૧૦ ફ્લાઈટ્સ.
૨૦૨૬નું સમર શેડ્યૂલ: ૧૦% ઘટાડા સાથે સાપ્તાહિક અંદાજે ૨૩,૦૪૯ ફ્લાઈટ્સ.
આ ઘટાડાને કારણે દર અઠવાડિયે અંદાજે ૨,૫૬૧ ઓછી ફ્લાઈટ્સ ઓપરેટ થશે.

પાઈલટ્સ અને વિમાનોની અછત મુખ્ય કારણ

અધિકારીઓએ સ્પષ્ટ કર્યું છે કે જ્યારે એરલાઇન્સ પાસે પૂરતા વિમાનો અને પાઇલટ્સ ઉપલબ્ધ હશે, ત્યારે જ ફ્લાઇટ્સની સંખ્યા વધારવાની મંજૂરી આપવામાં આવશે. ઈન્ડિગો એપ્રિલથી દરરોજ લગભગ ૨,૦૦૦ ફ્લાઇટ્સ સાથે તેની કામગીરી શરૂ કરવાની યોજના બનાવી રહ્યું છે. ઉલ્લેખનીય છે કે ડિસેમ્બર ૨૦૨૫માં મોટી સંખ્યામાં ફ્લાઈટ્સ રદ થવાને કારણે DGCA એ અગાઉ વિન્ટર શેડ્યૂલમાં પણ ૧૦ ટકાનો કાપ મૂક્યો હતો.

આ સમાચાર પણ વાંચો : Israel Chemical Plant Attack Iran: ઈરાનનો ઘાતક પ્રહાર: ઈઝરાયેલમાં ઝેરી ગેસની સુનામી! કેમિકલ પ્લાન્ટ સળગતા હજારો પરિવારો ઘરોમાં કેદ, જાણો લેટેસ્ટ સ્થિતિ..

મુસાફરો પર અસર

ફ્લાઈટ્સની સંખ્યા ઘટવાને કારણે પીક સમર સીઝન દરમિયાન લોકપ્રિય રૂટ પર ટિકિટના ભાવમાં વધારો થવાની શક્યતા સેવાઈ રહી છે. જોકે, સરકારનું માનવું છે કે છેલ્લી ઘડીએ ફ્લાઈટ્સ કેન્સલ થાય તેના કરતા પહેલેથી જ વ્યવસ્થિત શેડ્યૂલ હોવું મુસાફરો માટે વધુ હિતાવહ છે.