News Continuous Bureau | Mumbai

ISRO, LVM3-M6 Mission Success  ઈસરોએ આજે સવારે આંધ્રપ્રદેશના શ્રીહરિકોટાથી અમેરિકન કંપની AST સ્પેસમોબાઈલ માટે એક ક્રાંતિકારી મિશન પૂર્ણ કર્યું છે. LVM3 રોકેટ દ્વારા મોકલવામાં આવેલી આ સેટેલાઈટ દુનિયાભરમાં મોબાઈલ કનેક્ટિવિટીની વ્યાખ્યા બદલી નાખશે. આ ન્યુસ્પેસ ઈન્ડિયા લિમિટેડ (NSIL) અને અમેરિકન કંપની વચ્ચેના કરાર હેઠળનું છઠ્ઠું ઓપરેશનલ મિશન છે. આ સેટેલાઈટ ખાસ કરીને એવા વિસ્તારોમાં ઈન્ટરનેટ પહોંચાડશે જ્યાં ગ્રાઉન્ડ નેટવર્ક પહોંચી શકતું નથી.આ સેટેલાઈટ અને રોકેટની ખાસિયતો નીચે મુજબ છે:

બ્લૂબર્ડ બ્લોક-૨ સેટેલાઈટની વિશેષતાઓ

વજન: અંદાજે ૬૧૦૦ થી ૬૫૦૦ કિલોગ્રામ. આ ઈસરો દ્વારા લોન્ચ કરવામાં આવેલું અત્યાર સુધીનું સૌથી વજનદાર પેલોડ છે.
ડાયરેક્ટ ટુ સેલ: આ સેટેલાઈટની સૌથી મોટી ખાસિયત એ છે કે તે કોઈ પણ સામાન્ય 4G કે 5G સ્માર્ટફોન પર સીધું સ્પેસમાંથી હાઈ-સ્પીડ બ્રોડબેન્ડ ઈન્ટરનેટ આપી શકશે.
વિશાળ કદ: આમાં ૨૨૩ ચોરસ મીટરનું વિશાળ એન્ટેના લાગેલું છે, જે તેને લો અર્થ ઓર્બિટ (LEO) માં સૌથી મોટી કોમર્શિયલ સેટેલાઈટ બનાવે છે.
ઝડપ: તે ૧૨૦ Mbps સુધીની પીક ડેટા સ્પીડ આપશે, જે વીડિયો કોલિંગ અને સ્ટ્રીમિંગ માટે પૂરતી છે.

LVM3 રોકેટ: ભારતનું શક્તિશાળી વાહન

LVM3 ને અગાઉ GSLV Mk-III તરીકે ઓળખવામાં આવતું હતું. આ રોકેટ સંપૂર્ણપણે સ્વદેશી ટેકનોલોજીથી બનેલું છે.
ઊંચાઈ: ૪૩.૫ મીટર અને વજન ૬૪૦ ટન.
ક્ષમતા: તે પૃથ્વીની નીચલી ભ્રમણકક્ષામાં ૮,૦૦૦ કિલો સુધીનું વજન લઈ જઈ શકે છે.
અગાઉના મિશન: આ રોકેટે ચંદ્રયાન-૨, ચંદ્રયાન-૩ અને વનવેબ મિશન (૭૨ સેટેલાઈટ્સ) ને સફળતાપૂર્વક લોન્ચ કર્યા છે. ભવિષ્યમાં ગગનયાન મિશન માટે પણ આ જ રોકેટનો ઉપયોગ થશે.

આ સમાચાર પણ વાંચો : Vighneshwar Chaturthi 2025: આજે વિઘ્નેશ્વર ચતુર્થી: ગણપતિ બાપ્પાની પૂજા માટે આ છે આજના શુભ મુહૂર્ત અને વિધિ; જાણો ક્યારે કરવા વ્રતના પારણા?

ઈસરો માટે આ મિશન કેમ ખાસ છે?

આ લોન્ચિંગથી ભારતની ગ્લોબલ કોમર્શિયલ લોન્ચ માર્કેટમાં પકડ વધુ મજબૂત બની છે. એલોન મસ્કની ‘સ્ટારલિંક’ જેવી સેવાઓ સામે AST સ્પેસમોબાઈલ એક મોટો સ્પર્ધક બની રહી છે અને તે માટે ઈસરોના રોકેટની પસંદગી થવી તે ભારત માટે ગર્વની વાત છે. આ મિશન પૃથ્વીથી ૬૦૦ કિમીની ઊંચાઈએ સેટેલાઈટને સ્થાપિત કરવામાં સફળ રહ્યું છે.