News Continuous Bureau | Mumbai
Mathura Flood મથુરામાં યમુના નદીના વિકરાળ સ્વરૂપના કારણે પૂરની સ્થિતિ સર્જાઈ છે. આ પૂરનો ભોગ મથુરાનો ઐતિહાસિક વિશ્રામ ઘાટ બન્યો છે, જ્યાં ભગવાન શ્રીકૃષ્ણએ કંસનો વધ કર્યા બાદ વિશ્રામ કર્યો હતો. આખો ઘાટ પાણીમાં ગરકાવ થઈ ગયો છે, અને પાણી ઘાટના ગુંબજો અને મંદિરોના સ્તંભો સુધી પહોંચી ગયું છે. જોકે, આ ભયાવહ દ્રશ્ય હોવા છતાં, શ્રદ્ધાળુઓની આસ્થામાં કોઈ ઘટાડો થયો નથી
વિશ્રામ ઘાટનું ઐતિહાસિક મહત્ત્વ અને વર્તમાન સ્થિતિ
સ્થાનિક લોકોના જણાવ્યા અનુસાર, યમુના નદીના જળસ્તરમાં થયેલા વધારાને કારણે મથુરામાં પરિસ્થિતિ વણસી છે. સદીઓ જૂનો વિશ્રામ ઘાટ સંપૂર્ણપણે પાણીમાં ડૂબી ગયો છે. ઘાટ પર બનેલા મંદિરો અને તેમના સ્તંભો પણ પાણીમાં ડૂબેલા જોવા મળે છે. પૂરનું પાણી ઘાટના ગુંબદની નજીક પહોંચી ગયું છે, જે પૂરની ભયાનકતા દર્શાવે છે. આ એ જ ઘાટ છે જ્યાં ભગવાન કૃષ્ણએ કંસનો વધ કર્યા બાદ થોડો આરામ કર્યો હતો, જેના કારણે તેનું નામ વિશ્રામ ઘાટ પડ્યું છે.
પૂરના પાણીમાં પણ શ્રદ્ધાળુઓની અડગ આસ્થા
યમુનાના ભયાવહ પૂર છતાં, લોકોની આસ્થા અને હિંમત અકબંધ રહી છે. શ્રદ્ધાળુઓ ઘૂંટણ સુધી પાણીમાં ઊભા રહીને પણ પોતાની પૂજા-પાઠ કરી રહ્યા છે. આ દ્રશ્ય સ્પષ્ટપણે બતાવે છે કે પૂર પણ તેમની આસ્થાને ડગાવી શક્યું નથી. આ મુશ્કેલ પરિસ્થિતિમાં પણ ઘાટ પર હાજર લોકો તેમની ધાર્મિક પરંપરાઓનું પાલન કરી રહ્યા છે.
આ સમાચાર પણ વાંચો : Hyperinflation: RBI પાસે નોટ છાપવાની મશીન છે, તો પણ કેમ નથી છપાતા પુષ્કળ પૈસા? આ ભૂલ કરીને બે દેશો થઈ ગયા બરબાદ
વ્રજમાં પૂરની ભયાનકતા: પ્રશાસનનું બચાવ કાર્ય
ઉલ્લેખનીય છે કે, વ્રજમાં કાલીંદી એટલે કે યમુના પોતાનું રૌદ્ર સ્વરૂપ બતાવી રહી છે. તાજેવાલા અને ઓખલામાંથી પાણી છોડવામાં આવતા મથુરામાં યમુનાનું જળસ્તર સતત વધી રહ્યું છે અને નદી ખતરાના નિશાનથી 50 સેમી ઉપર વહી રહી છે. જેના કારણે ડઝનબંધ ગામો ટાપુ બની ગયા છે. જયસિંહપુરા સહિતની અનેક સોસાયટીઓ અને સેંકડો ઘરોમાં પૂરનું પાણી ઘૂસી ગયું છે, જેના કારણે લોકો સ્થળાંતર કરવા મજબૂર બન્યા છે. જિલ્લા પ્રશાસન પૂરગ્રસ્ત વિસ્તારોમાંથી લોકોને બોટ અને સ્ટીમર દ્વારા સુરક્ષિત સ્થળોએ ખસેડી રહ્યું છે. વૃંદાવનથી લઈને ગોકુળ સુધી પૂરના કારણે હાહાકાર મચી ગયો છે. પ્રશાસને 5 પૂર રાહત કેન્દ્રો પણ સ્થાપિત કર્યા છે.
