ન્યુઝ કન્ટિન્યુઝ બ્યુરો
મુંબઈ, ૨૫ જૂન 2021
શુક્રવાર
નક્સલવાદીઓ પર પણ કોરોના હાવી થયો છે. બસ્તરમાં અનેક મોટી નક્સલવાદી ઘટનાઓને અંજામ આપનાર ખૂનખાર માઓવાદી માડવી હિડમા પણ હવે કોરોનાના ચુંગાલમાં સપડાયો છે. હિડમા છેલ્લા ઘણા દિવસોથી બસ્તરનાં જંગલોમાં કોરોનાથી ઝઝૂમી રહ્યો છે. હિડમા માઓવાદીઓની દંડકારણ્ય વિશેષ ઝોનલ કમિટીનો સભ્ય છે અને તેના ઉપર 25 લાખનું ઇનામ પણ છે.
આ વાતની પુષ્ટિ કરતાં બસ્તરના IG સુંદરરાજ પી.એ સ્થાનિક મીડિયાને કહ્યું છે કે “હિડમાને કોરોના ચેપ લાગ્યો હોવાની માહિતી મળી છે, એ છેલ્લા ઘણા દિવસથી બીમાર છે.” હિડમા સિવાય અન્ય ઘણા મોટા કેડર નક્સલવાદીઓ પણ કોરોનાની ચપેટમાં છે. તેને દવાઓની સખત જરૂર છે. થોડા દિવસ પહેલાં બીજપુર પોલીસે નક્સલવાદીઓની સપ્લાય ટીમના બે સભ્યોની ધરપકડ કરી હતી. પોલીસને તેમની પાસેથી મોટી માત્રામાં દવાઓ, માસ્ક, સેનિટાઇઝર મળી આવ્યાં હતાં.
ઉલ્લેખનીય છે કે બસ્તરમાં અનેક મોટી નકસલી ઘટનાઓ બની છે. એમાંથી તાડમેટલાની ઘટનામાં 76 જવાનો, રાનીબોદલીમાં 55, બુરકાપાલમાં 25 અને ટેકલગુડામાં 22 જવાન શહીદ થયા હતા. નક્સલવાદી હિડમા આ બધી ઘટનાઓનો માસ્ટર માઇન્ડ હતો.
