News Continuous Bureau | Mumbai
Anna Hazare RTI Hunger Strike દેશના જાણીતા સામાજિક કાર્યકર્તા અન્ના હજારે (Anna Hazare) ભ્રષ્ટાચાર અને વહીવટી મનસ્વીતા સામે ફરી એકવાર મોટું આંદોલન કરવાની તૈયારીમાં છે. મહારાષ્ટ્ર સરકાર દ્વારા માહિતીના અધિકાર (RTI) ના નિયમોમાં કરવામાં આવેલા તાજેતરના ફેરફારોનો તેમણે ઉગ્ર વિરોધ કર્યો છે. હજારેએ આ નવા નિયમોને ‘ગેરકાયદેસર’ ગણાવીને તેને તાત્કાલિક અસરથી પાછા ખેંચવાની માંગ કરી છે. તેમણે જાહેરાત કરી છે કે જો સરકાર આ ફેરફારો રદ નહીં કરે, તો તેઓ આગામી ૫ જુલાઈથી આમરણાંત ભૂખ હડતાળ પર બેસી જશે.
Anna Hazare RTI Hunger Strike – મુખ્યમંત્રી દેવેન્દ્ર ફડણવીસને પત્ર લખીને વ્યક્ત કરી નારાજગી
અન્ના હજારેએ મહારાષ્ટ્રના મુખ્યમંત્રી દેવેન્દ્ર ફડણવીસને (Devendra Fadnavis) એક સત્તાવાર પત્ર લખીને દાવો કર્યો છે કે, ‘મહારાષ્ટ્ર માહિતી અધિકાર નિયમ, ૨૦૨૬’ મૂળ આરટીઆઈ એક્ટની ધારને કુંઠિત કરી દેશે અને નાગરિકોને સરકારી માહિતી મેળવવાથી દૂર રાખશે. તેમના મતે, ૧૨ જૂનના રોજ સરકાર દ્વારા કરવામાં આવેલા ફેરફારો વર્ષ ૨૦૦૫ ના મૂળ RTI કાયદાની ભાવનાનું સરેઆમ ઉલ્લંઘન કરે છે અને સરકારી તંત્રમાં પારદર્શિતાને નબળી પાડે છે. ખાસ કરીને આરટીઆઈ અરજીની ફી વધારવા પાછળ કોઈ યોગ્ય કારણ કે નાણાકીય વિશ્લેષણ આપવામાં આવ્યું નથી, જે સામાન્ય જનતા માટે અન્યાયી છે.
Anna Hazare RTI Hunger Strike – RTI એ કમાણીનું સાધન નથી, આઈડી પ્રૂફ ફરજિયાત કરવાનો વિરોધ
સીએમને લખેલા પત્રમાં અન્ના હજારેએ કડક શબ્દોમાં કહ્યું છે કે, “RTI એ સરકાર માટે રેવન્યુ (આવક) ઊભી કરવાનું કોઈ સાધન નથી. જો ૨૦ વર્ષ પછી ફી વધારવામાં આવતી હોય, તો માહિતી આપવાનો ઈનકાર કરનારા કે મોડું કરનારા ભ્રષ્ટ અધિકારીઓ પરનો દંડ પણ તેટલો જ વધારવો જોઈએ.” તેમણે અરજી સાથે આઈડી પ્રૂફ (ઓળખ પત્ર) ફરજિયાત કરવાના નિયમનો પણ સખત વિરોધ કર્યો છે. તેમણે તર્ક આપ્યો કે આરટીઆઈ એક્ટની કલમ ૬(૨) મુજબ અરજદારે પોતાની અંગત વિગતો કે માહિતી માંગવાનું કારણ જાહેર કરવાની કોઈ જરૂર હોતી નથી. આ નવો નિયમ વ્હિસલબ્લોઅર્સ અને સામાજિક કાર્યકરોની સુરક્ષા માટે મોટો ખતરો ઉભો કરશે.
Anna Hazare RTI Hunger Strike – ‘એક વિષય, એક અરજી’ અને પારદર્શિતા પર તોળાતું જોખમ
અન્ના હજારેએ સરકારના ‘એક વિષય, એક અરજી’ (One Subject, One Application) નિયમની પણ આકરી ટીકા કરી છે અને તેને સામાન્ય લોકો માટે બોજ સમાન ગણાવ્યો છે. વહુવિધ અને જટિલ નિયમોને કારણે વહીવટી પ્રક્રિયા વધુ ટેકનિકલ, મોંઘી અને સત્તાધારી કેન્દ્રિત બની જશે, જેનાથી ભ્રષ્ટાચાર વધશે. અરજદારની ગેરહાજરીમાં અપીલ ફગાવી દેવી અને અરજદારના મૃત્યુ પર કેસ આપોઆપ બંધ કરી દેવા જેવા વિવાદાસ્પદ મુદ્દાઓ સામે તેમણે વાંધો ઉઠાવ્યો છે. અન્નાએ ચેતવણી આપતા લખ્યું છે કે, જો ૧૨ જૂનના સુધારા તાત્કાલિક પાછા ખેંચવામાં નહીં આવે, તો તેઓ ૫ જુલાઈએ અહમદનગર જિલ્લાના રાલેગણ સિદ્ધિ (Ralegan Siddhi) સ્થિત યાદવ બાબા મંદિરમાં પોતાના જીવનના ભોગે પણ અનશન શરૂ કરશે.
👉 આ સમાચાર વાચો:
Mahabharat Powerful Women Facts મહાભારતના યુદ્ધમાં પુરુષો જ નહીં, આ સ્ત્રીઓ પાસે પણ હતી અકલ્પનીય દૈવી શક્તિઓ; જાણો તેમની રોચક વાતો
